قۇلاق ەستىسە دە كوز كورمەگەن وقيعالار كارانتيندىك رەجىم ۋاقىتىندا دا بولىپ جاتىر. سولتۇستىك قازاقستان وبلىسىنداعى ءۋاليحانوۆ اۋدانىنىڭ 1967 جىلى تۋعان ءبىر تۇرعىنى كەشە ءۇي-ىشىندەگى جانجالدىڭ سالدارىنان تۋعان اشۋدان ۇستەلدىڭ ۇستىندە جاتقان باكى مەن وتتىقتى جۇتىپ قويىپتى...
اۋداندىق اۋرۋحاناعا جەتكىزىلگەن ونى قىزىلجارعا اپارۋ ۇزاق ۋاقىت الاتىندىقتان وبلىستىق اۋرۋحانانىڭ حيرۋرگ ماماندارى سانيتارلىق اۆياتسيامەن ۇشىپ بارىپ, اۋداندىق اۋرۋحانادا وتا جاساعان. ءبارىن ۇيىمداستىرىپ, وتانى جاساعان اۋرۋحانانىڭ كوپسالالى ورتالىعىنىڭ جەتەكشىسى حيرۋرگ رۋسلان ابەتوۆ. ءساتتى جاسالعان وتا بارىسىندا ناۋقاستىڭ قارنىنان باكى مەن وتتىق الىنىپ, ورىنى تىگىلگەن. قازىر ونىڭ جاعدايى قالىپتى. العاشىندا ەشكىممەن سويلەسپەگەن ول قازىر پسيحولوگيالىق سترەسستەن ارىلىپ, تىلگە كەلگەن.
«ازاماتتىڭ پسيحيكالىق اۋىتقۋلىعى جوقتىعى, ەشقانداي ديسپانسەردە ەسەپتە تۇرمايتىندىعى دا انىقتالدى. وقىس ارەكەتكە ءۇي ىشىندەگى جانجال عانا سەبەپ بولعان دەگەن العاشقى قورىتىندى شىعارىلعان», دەيدى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
ءسويتىپ, ايدىڭ كۇنى امانىندا وقىستان كەلىپ قالعان اجالدان ءبىر ازامات اۋپىرىممەن امان قالدى.
سولتۇستىك قازاقستان وبلىسى