كوروناۆيرۋستىڭ كەسىرىنەن كاريب تەڭىز ارالدارىندا قامالىپ قالعان نيدەرلانديالىق 25 وقۋشى كەشە كەمەمەن ءوز ۇيلەرىنە ورالدى.
14 جانە 17 جاس ارالىعىنداعى بۇل جەتكىنشەكتەر 1920 جىلى وندىرىلگەن «Wylde Swan» اتتى جەلكەندى كەمەمەن التى اپتالىق وقۋ-جاتتىعۋ جاساۋ ءۇشىن وسىندا كەلگەن ەكەن. بىراق حالىقارالىق كارانتين سالدارىنان ۇيلەرىنە قايتا الماي كۋبا جاعالاۋىندا تۇرىپ قالعان.
جوعارىداعى وقۋ-جاتتىعۋ شاراسىن ۇيىمداستىرۋشىلار اقىرى امالى تاۋسىلىپ, بۇلاردى جەلكەندى كەمەمەن ەلىنە جەتكىزىپ سالۋ ءۇشىن جولعا شىققان. تاجىريبەلى 12 تەڭىزشى جەتكىنشەكتەردى 3 ۇستازىمەن بىرگە كەمەگە وتىرعىزىپ, بەس اپتانىڭ ىشىندە اتلانت مۇحيتىن كوكتەي ءوتىپ, 7 مىڭ شاقىرىم جول ءجۇرىپ, قارت قۇرلىقتاعى پورتۋگاليا پورتىنا تۇمسىق تىرەپ توقتاعان ەكەن.
جەلكەندى كەمەمەن جولعا شىققان جولاۋشىلاردىڭ جول جابدىعىن كاريب ايماعىنا قاراستى سەينت ليۋسي ارالىنىڭ تۇرعىندارى دايىنداپ, ۇزاق ساپارعا اتتاندارىپ سالعان.