تالاسباەۆانىڭ تاساسىندا كىم تۇر؟

ەندى وسىناۋ ءاپ-ادەمى ۇجىمنىڭ بەرەكەسى وسىدان ەكى جىل بۇرىن جانار تالاسباەۆا دەگەن ازاماتشانىڭ وسى مەكەمەگە جۇمىسقا تۇرۋىنان كەيىن بۇزىلعان كورىنەدى. اقپاراتتىق بيبليوگرافيالىق ءبولىمىنىڭ مەڭگەرۋشىسى بولىپ جۇمىسقا كىرىسكەن تالاسباەۆانىڭ كوپ ۇزاماي-اق كوپشىلىكپەن ءتىل تابىسا المايتىنى انىق بايقالعان. مەيلى عوي, ۇجىم بولعان سوڭ ءارتۇرلى ادامدار بولادى, جۇمىس كەزىندە ءتۇرلى جاعدايلار بولادى, قىزمەت بارىسىندا كىم-كىممەن رەنجىسپەي جاتىر دەيسىز... بىراق, تالاسباەۆا ءوزىنىڭ دورەكىلىگىمەن, ءتىلىنىڭ اششىلىعىمەن كوزگە تۇسكەن كورىنەدى. سودان بەرگى ەكى جىلدا ۇجىمدا تالاسباەۆانى تارتىپكە شاقىرعان بىرنەشە جينالىس وتەدى. الايدا, ودان ناتيجە جوق. اقىرىندا جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىنىڭ ۇجىمى مادەنيەت باسقارماسىنا, ودان ەلىمىزدىڭ مادەنيەت جانە سپورت ءمينيسترى اقتوتى رايىمقۇلوۆاعا ارىز جازادى. رەداكتسياعا جولدانعان ول ارىزدىڭ ءماتىنى مىنانداي:

«قۇرمەتتى اقتوتى راحمەتوللاقىزى! ءبىز وسى ارىزدى قازاق سوقىرلار قوعامىنىڭ اتىنان جولداپ, جان ايقايىمىزدى جەتكىزبەكپىز. ارىزدا جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىندا قىزمەت ىستەيتىن جانار تالاسباەۆانىڭ شەتتەن شىققان تەرىس ءىس-ارەكەتتەرى تۋرالى جازىپ وتىرمىز. بۇل قىزمەتكەر ارنايى كىتاپحاناعا كەلىپ, اقپاراتتىق بيبليوگرافيالىق ءبولىمىنىڭ مەڭگەرۋشىسى بولىپ جۇمىس ىستەگەنىنە 2 جىلدىڭ كولەمى بولدى. وسى ەكى جىلدىڭ ىشىندە بۇل ۇجىمدا بىرنەشە مارتە ءتارتىپ بۇزۋشىلىق ورىن الدى. جانار تالاسباەۆا كىتاپحانادا جۇمىس ىستەپ جۇرگەن كوز مۇگەدەكتەرى قىزمەتكەرلەرى مەن زاعيپ وقىرمانداردىڭ قيتىعىنا ءتيىپ, اۋىر سوزدەر ايتقان. «سوقىر», «شولاق», «باسىن ۋنيتازعا تىعۋ كەرەك», «اجالدارىڭ مەنەن», «كوزدەرىڭنەن قان اققىزامىن, پىشاق سۇعىپ ولتىرەمىن» دەگەن سياقتى سوزدەر ايتىپ قورقىتقان, زاعيپ ازاماتتارعا تەلەفون ارقىلى حابارلاسىپ, قىسىم جاساعان.

وسىنداي ءىس-ارەكەتىنەن كەيىن بۇل قىزمەتكەردىڭ جۇيكەسىندە اقاۋ بار ما دەگەن تۇجىرىمعا كەلدىك. ويتكەنى, ادامدارمەن قارىم-قاتىناسى وتە ناشار, دورەكى, بالاعات سوزدەر ايتادى, ادامدارمەن ءتىل تابىسا المايدى. قىزمەتكەرلەر اراسىندا دا ۇلكەن-كىشىسىنە قاراماي ار-ۇجدانىن تاپتايتىن, انايى سوزدەردى كوپ ايتادى ەكەن. ەكى-ءۇش مارتە قىزمەتكەرلەر مەن قازاق سوقىرلار قوعامىنىڭ اقساقالدار مۇشەلەرىمەن بىرىگە تارتىپكە شاقىرۋ جينالىسى ءوتىپ, جانار تالاسباەۆانىڭ ءتارتىبى قارالىپ, ەسكەرتۋ جاسالدى. سول جينالىستا سوزگە قوناق بەرمەي, ءوزىنىڭ قانداي ادام ەكەنىن ءىس-ارەكەتىنەن-اق بايقاتتى. بىراق ەسكەرتۋدەن ەش ناتيجە بولمادى. جامبىل وبلىسى اكىمدىگىنىڭ مادەنيەت, ارحيۆتەر جانە قۇجاتتاما باسقارماسىنا وقىرمانداردىڭ سۇرانىسى بويىنشا ارنايى كىتاپحانادا جۇمىس ىستەيتىن زاعيپ قىزمەتكەرلەر تالاسباەۆا جاناردىڭ تارتىبىنە بايلانىستى ارىز جولداعان, بىراق, جاۋاپسىز قالدى. ۇجىم قىزمەتكەرلەرىنىڭ ىشىندە تيفلولوگيا ءبولىمىنىڭ ءبولىم مەڭگەرۋشىسى ج-عا بالاعات ءسوز ايتىپ, ءوزىن «جەزوكشە» دەپ ايىپتاعانى ءۇشىن جەكە باسىن قورعاۋ ماقساتىندا تالاسباەۆا جاناردى سوتقا بەردى. زاعيپ وقىرماندار بۇگىندە ارنايى كىتاپحانانىڭ قىزمەتىن قولدانۋعا قورقاتىندارىن ايتتى. ءبىز, زاعيپ وقىرماندار كىتاپحانادا دورەكى سويلەيتىن, سىيلامايتىن, زاعيپ جانداردىڭ ار-نامىسىن قورلايتىن ازاماتشانىڭ جۇمىس ىستەگەنىن قالامايمىز. وسى جايتتەردى ەسكەرە وتىرىپ, تالاسباەۆا جاناردىڭ تەرىس ءىس-ارەكەتتەرىنە شارا قولدانىپ, قىزمەتىنەن بوساتىلۋىن سۇرانامىز».

مىنە, ۇجىمنىڭ جانايقايى وسى بولاتىن. بىراق, بۇل حات مينيسترگە جەتپەدى. باسشىنىڭ قىسىمىنان كەيىن قىزمەتكەرلەر حاتقا قول قويۋدان اينىپ شىعادى. وبالى نە كەرەك, بۇل داۋعا جامبىل وبلىسى اكىمدىگىنىڭ مادەنيەت, ارحيۆتەر جانە قۇجاتتاما باسقارماسى بىردەن نازار اۋدارادى. بىراق, وسى جەردە جۇرت كۇتپەگەن شەشىم قابىلداندى. ياعني, جانار تالاسباەۆانىڭ وسىناۋ قىلىعىنا شىداي الماعان كىتاپحانانىڭ ديرەكتورى ايگۇل ورازقۇلوۆا ءوز ەركىمەن قىزمەتىنەن بوساپ, ورنىنا زەينەت جاسىنداعى جانات ايتجانوۆا تاعايىندالادى. ال, جانار تالاسباەۆا تىپ-تىنىش جۇمىسىن جالعاستىرا بەرگەن. ياعني, بۇلار ۇجىمنىڭ شىرقىن بۇزعان قىزمەتكەردى تارتىپكە شاقىرامىز دەپ جۇرگەندە كوپشىلىككە بولىسىپ جۇرگەن مەكەمە باسشىسى جۇمىسىنان كەتىپ قالادى. امال جوق, اشىنعان ۇجىم اقپارات قۇرالدارىنىڭ وكىلدەرىن شاقىرىپ, وسى ماسەلەگە بايلانىستى سۇحبات بەرەدى. بىراق, الدەبىر كۇشتەر ارالاسىپ, تىلشىلەردىڭ ەشقايسىسى بۇل سۇحباتتى جاريالاماعان كورىنەدى. ياعني, كىتاپحانا باسشىلىعىن اۋىستىرۋ داۋدى باسپايدى. قايتا ورشىتە تۇسەدى. قىرىق كىسى ءبىر جاق, قىڭىر كىسى ءبىر جاق بولىپ تۇرعان ۇجىمدا وسىلايشا قىزمەتكەرىنىڭ قىلىعى ءۇشىن باسشى جۇمىسىنان بوسايدى.

جازيرا مۇلكىبەكوۆا, جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىنىڭ بۇرىنعى قىزمەتكەرى:

مەن 2019 جىلدىڭ 4-قاراشاسىندا الماتىدان تارازداعى وسى كىتاپحاناعا اۋىسىپ كەلدىم. بۇعان دەيىن الماتىداعى «سەنىم» قورىندا مۇگەدەك جاندارمەن بىرگە جۇمىس ىستەگەن بولاتىنمىن. ءبىر اپتادان كەيىن-اق تالاسباەۆانىڭ دورەكى مىنەزدەرىن بايقاي باستادىم. العاشىندا ۇندەمەي ءجۇردىم. 2009 جىلدان بەرى وسى سالادا جۇمىس ىستەپ كەلە جاتسام دا مۇنداي دورەكى قىزمەتكەردى ءبىرىنشى مارتە كورۋىم. تالاسباەۆا تەك قىزمەتكەرلەرگە عانا ەمەس, ءىس-شارالارعا قاتىسۋعا كەلگەن زاعيپ جاندارعا دا دورەكى سويلەپ, «سوقىر» دەگەن سياقتى مىسقىلداپ وتىرادى. سودان مادەنيەت باسقارماسىنىڭ باسشىسىنا حات جازدىم. بىراق, ءبىر ايدان اسا ۋاقىت وتسە دە جاۋاپ بولمادى. امال جوق, وبلىس اكىمىنىڭ قابىلداۋىنا جازىلماقشى بولىپ ەدىم, ول ارەكەتىمنەن ەشتەڭە شىقپادى. وسى ارالىقتا ۇجىمداعى جاعداي تىپتەن, ءورشىپ, تالاسباەۆا دالىزدە كەتىپ بارا جاتقان ماعان اياعىن توسىپ, شالىپ قۇلاتىپ, دەنە جاراقاتىن الدىم. وسىدان كەيىن شىدامىم تاۋسىلىپ, وبلىستىڭ باس ەڭبەك ينسپەكتورىنا باردىم. ول كىسى ء«بىز تالاسباەۆانىڭ جەكە باسىن ۇستاۋىنا بايلانىستى ەشقانداي شارا قولدانا المايمىز» دەپ اشىق ايتتى. «قىزمەتتىك ەتيكا قايدا قالدى؟» دەپ ەدىم, ول «بۇل قىزمەتتىك ەتيكاعا جاتپايدى» دەدى. سودان مادەنيەت جانە سپورت ءمينيسترى ا. رايىمقۇلوۆاعا حات جازدىم. بىراق, كىتاپحانا ديرەكتورى «ويباي, ارىزدى مينيسترگە بەرمە, ءبارىن ءوزىم رەتتەيمىن, جوندەيمىن» دەپ ەلورداعا كەتكەن ماعان حابارلاسىپ, حاتتى بەرگىزبەدى. ديرەكتور ءتىپتى, ۇجىمدى ۇگىتتەپ, مينيسترگە جازىلعان حاتقا قول قويدىرماي تاستادى. مەنىڭ جانارىم مۇلدەم كورمەيدى, ەكى كوزىمدى دە الىپ تاستاپ, پروتەز سالعان. كوزىم كورمەسە دە كوشەدە, دالىزدە كەلە جاتقاندا قارسى الدىمدا ادامنىڭ تۇرعانىن تۇيسىك ارقىلى سەزەمىن. جۇمىستا تالاسباەۆانىڭ الدىمدا كەسە كولدەنەڭ تۇرعانىن بىرنەشە رەت بايقاپ, اينالىپ ءوتىپ ءجۇردىم. بىراق, بىردە دارەتحانادان شىعىپ كەلە جاتقاندا بايقاماي قالىپ, ادەيى توسقان اياعىنا شالىنىپ قۇلادىم. سوندا تالاسباەۆا «سەنىڭ كوزىڭ كورەدى, سەن جۇرتتىڭ ءبارىن الداپ ءجۇرسىڭ, وتىرىكشىسىڭ» دەپ قولىمەن نۇقىپ-نۇقىپ جىبەردى. تاعى ءبىر بايقاعانىم, ول كىسى لەزدە پوليتسيا, جەدەل-جاردەمنىڭ دارىگەرىن شاقىرىپ الادى. كەلگەن دارىگەردىڭ ء«سىزدىڭ قان قىسىمىڭىز قالىپتى, نە تومەن ەمەس, نە جوعارى ەمەس» دەپ ايتقانىن ءوز قۇلاعىممەن ەستىدىم. سوندا دا جەدەل-جاردەم كولىگىنەن تۇسپەي, سولارمەن كەتىپ قالىپ, ارادا ون-ون بەس ءمينوت وتكەندە قايتىپ كەلىپ ءجۇردى. اقىرىندا مەن ءوز ەركىممەن جۇمىستان بوساپ كەتتىم. قازىر الماتىدامىن. تالاسباەۆا جۇمىسىن جالعاستىرىپ جاتىر.

ءيا, كىتاپحانا قىزمەتكەرلەرىنىڭ ايتۋىنا قاراعاندا جانار تالاسباەۆانىڭ تارتىبىنە بايلانىستى بىرنەشە مارتە اكت تولتىرىلعان. مىسالى, 2020 جىلدىڭ 4-اقپانى كۇنى جانار تالاسباەۆا ارىز بويىنشا باق وكىلدەرىنىڭ قاتىسۋىمەن وتكىزىلگەن جيىننان كەيىن كىتاپحانا باسشىسىنىڭ رۇقساتىنسىز ساعات 17-00-دە جۇمىس ورنىن تاستاپ كەتىپ قالعان. ال, 2018 جىلدىڭ 20-جەلتوقسانىندا ج. تالاسباەۆا ديرەكتوردىڭ كابينەتىنە كىرىپ, اۋزىنا كەلگەنىن ايتىپ, ديرەكتورعا «سەن ديرەكتور ەمەسسىڭ, توپاسسىڭ», ء«بىردى بىرگە قوسا المايسىڭ», «باستىقتىڭ الدىنا بارعاندا ءمۇلايىمسىپ قالاسىڭ» دەگەن دورەكى سوزدەر ايتقان. قىسقاسى, تالاسباەۆانىڭ ۇستىنەن بىرنەشە رەت وسىندا  اكت تولتىرىلىپ, ۇجىم مۇشەلەرى وعان كۋا رەتىندە قول قويعان. (بۇل اكتىلەردىڭ كوشىرمەسىنىڭ ءبارىن رەداكتسياعا جولداپتى). راس, تالاسباەۆا كەيىننەن جۇمىستا بولماعان كەي كۇندەرىنە ەڭبەككە جارامسىزدىعى تۋرالى انىقتاما اكەلىپ وتكىزىپتى.

ەندى قۇرمەتتى وقىرمان, ەشقانداي ەموتسياعا بەرىلمەي, وسى ءبىر داۋدى اقىلعا سالىپ ساراپتاپ كورەيىكشى. بۇكىل ءبىر ۇجىمنىڭ جاقسى بولىپ, جۇمىسقا كەيىننەن كەلگەن ءبىر ادامنىڭ جامانى بولۋىنىڭ استارىندا نە جاتۋى مۇمكىن؟ ياعني, ءدال وسى جەردە تالاسباەۆاعا بولىسىپ كورەيىكشى. مۇمكىن تالاسباەۆا مىقتى مامان شىعار. شىنىندا جۇمىستاعى كەمشىلىكتىڭ ءبارىن انىقتاپ, ونى كوزگە شۇقىپ كورسەتىپ, ۇجىمنىڭ بەتىنە باسقان بولار. ونىڭ بۇل قىلىعىن ديرەكتور مەن ونىڭ ىقپالىنداعى قىزمەتكەرلەر جاراتپاعان بولار. قول استىنداعى قىزمەتكەرلەردى جاتقىزىپ-تۇرعىزىپ جۇرگەن ديرەكتورعا كەيىننەن كەلگەن بىرەۋ باعىنعىسى كەلمەسە, بار بالەنى سونىڭ باسىن ءۇيىپ-توگىپ تاستايتىن ءادىس ءبىزدىڭ باسشىلاردا بار ەمەس پە؟ جاسىراتىنى جوق, ءبىز بۇل داۋدا جانار تالاسباەۆانى ءدال وسىلاي اقتاپ العىمىز كەلگەن. بىراق, تالاسباەۆا ەڭبەك ەتكەن بۇعان دەيىنگى ۇجىمداردا دا ءدال وسىنداي جاعدايدىڭ ورىن العانىن بىلگەندە تىپتەن, نە ايتارىمىزدى بىلمەدىك.

تالاسباەۆا 2014 جىلى تاراز قالاسىنداعى نۇرعيسا تىلەنديەۆ اتىنداعى كوپ بالالى جانە از قامسىزداندىرىلعان وتباسى بالالارىنا ارنالعان مەكتەپ-ينتەرناتىندا كىتاپحاناشى بولىپ ەڭبەك ەتىپ جۇرگەن كەزدە دە وسى ءبىلىم شاڭىراعىمەن سوتتاسقان ەكەن. قىسقاشا بايانداساق, جۇمىسقا سەبەپسىز كەلمەي قالعانى ءۇشىن مەكتەپ ديرەكتورى ونى 2014 جىلدىڭ 18 شىلدەسىندە قىزمەتىنەن بوساتقان. تالاسباەۆا سوتقا جۇگىنەدى. بىراق, تاراز قالالىق سوتىنىڭ سۋدياسى ا. نۇرلىبەكوۆا 2014 جىلدىڭ 4-جەلتوقسانىندا تالاسباەۆانىڭ تالابىن قاناعاتتاندىرماي, مەكتەپ ديرەكتورىنىڭ شەشىمىن زاڭدى دەپ تاپقان.

سودان ج. تالاسباەۆا تاراز قالاسىنداعى د. قوناەۆ اتىنداعى جامبىل وبلىستىق بالالار مەن جاسوسپىرىمدەر كىتاپحاناسىنا جۇمىسقا كىرگەن. بۇل جەردە وسى مەكەمەنىڭ قىزمەتكەرى ميرا راسۋلوۆامەن سوتتاسادى. 2019 جىلدىڭ 16-قاڭتارىندا شىققان سوت شەشىمىندە بىلاي دەپ جازىلعان: «جەكە ايىپتاۋشى م. راسۋلوۆا تومەندەگى ءمان-جايلارعا سۇيەنە وتىرىپ, سوتقا قورلاعانى ءۇشىن ج.تالاسباەۆانى قك-ءنىڭ 131 بابىنىڭ 1 بولىگىمەن جاۋاپكەرشىلىككە تارتۋ تۋرالى جەكە ايىپتاۋ شاعىمىمەن جۇگىنگەن: 22 قىركۇيەك 2018 جىلى ساعات 10.00 مەن 11.00 ارالىعىندا تاراز قالاسى, «LL» ءدامحاناسىنا قاراما قارسى ورنالاسقان ايالداما جانىندا سەنبىلىك كەزىندە سوتتالۋشى ج.تالاسباەۆا وعان قاتىستى سەبەپسىز بىلاپىت سوزدەر ايتىپ, ونى قورلادى». ءسويتىپ تاراز قالاسى N2 سوتى قۇرامىندا توراعالىق ەتۋشى سۋديا ن. داۋىلباەۆ «راسۋلوۆا ميرا المەتوۆنانىڭ جەكە ايىپتاۋ شاعىمى بويىنشا قوزعالعان قىلمىستىق ءىسى سوتقا دەيىنگى تەرگەپ-تەكسەرۋ جۇرگiزۋ تۋرالى ماسەلەنi شەشۋ ءۇشiن تاراز قالاسىنىڭ پروكۋرورىنا جىبەرىلسىن» دەگەن شەشىم شىعارعان. الايدا بەلگىسىز سەبەپتەرمەن بۇل ءىس اياعىنا دەيىن جەتپەگەن.

قولىمىزعا جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ ج. تالاسباەۆاعا قاتىستى وبلىستىق اكىمدىككە بەرگەن انىقتاماسى ءتۇستى. انىقتامادا جازىلعان مالىمەتتەرگە قاراعاندا 2018 جىلى ج. تالاسباەۆا د. قوناەۆ اتىنداعى جامبىل وبلىستىق بالالار مەن جاسوسپىرىمدەر كىتاپحاناسىندا جۇمىس ىستەپ جۇرگەن كەزدە وسى مەكەمەنىڭ ديرەكتورى گ. ينكاربەكوۆانىڭ ۇستىنەن بىرنەشە مارتە ارىزدانادى. بۇل ارىز بويىنشا وبلىستىق ەڭبەك ينسپەكتسياسى, «نۇر وتان» پارتياسىنىڭ وبلىستىق فيليالى, وبلىستىق مادەنيەت, ارحيۆتەر جانە قۇجاتتاما باسقارماسى تەكسەرۋ جۇرگىزگەن, بىراق, ارىزدا جازىلعان ءمان-جايلار دالەلىن تاپپايدى. ودان سول جىلى وسى كىتاپحانانىڭ ۇجىمى تالاسباەۆانىڭ ۇستىنەن ارىزدانىپ, ونىڭ تاراپىنان ۇجىمنىڭ قىزمەتكەرلەرىنە قاتىستى دورەكى سويلەۋ جانە ار-نامىسىنا تيەتىن سوزدەر ايتۋ فاكتىلەرى بويىنشا شارا قولدانۋدى وتىنەدى. بىراق, باسقارما مۇنداي فاكتىلەر بويىنشا تەكسەرۋ جۇرگىزۋ قۇزىرەتىنە كىرمەيتىنىن, تەك سوتقا ارىزدانۋ كەرەكتىگىن ايتقان.

2018 جىلى تالاسباەۆا ديرەكتور ا. ورازقۇلوۆانىڭ اتىنا ءوتىنىش جازىپ, جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىنا ءبولىم مەڭگەرۋشىسى بولىپ اۋىسادى. ءبىر جىلدان كەيىن ياعني, 2019 جىلدىڭ جەلتوقسان ايىندا ول «مەنى بالالار جانە جاسوسپىرىمدەر كىتاپحاناسىنان كوزى كورمەيتىن جانە ءالسىز كورەتىن ازاماتتار كىتاپحاناسىنا زاڭسىز اۋىستىرعان» دەپ باسشىسى ورازقۇلوۆانىڭ ۇستىنەن ەڭبەك ينسپەكتسياسىنا ارىز جازادى. ينسپەكتسيا جان-جاقتى تەكسەرىس جۇرگىزگەنىمەن ارىزدا جازىلعان دۇنيەلەر دالەلىن تاپپايدى. ەندى كىتاپحانا ۇجىمى تالاسباەۆانىڭ ۇستىنەن وبلىستىق مادەنيەت, ارحيۆتەر جانە قۇجاتتاما باسقارماسىنا ارىزدانىپ, ونىڭ سەبەپسىزدەن سەبەپسىز بالاعاتتاپ, ار-نامىستارىنا تيەتىنىن ايتادى. باسقارمادان كەلگەن كوميسسيا تالاسباەۆانىڭ مىنەز-قۇلقىنا بايلانىستى ۇجىم مۇشەلەرىنەن تۇسىنىكتەمەلەر العاندا ونىڭ وسى مەكەمەدەگى قىزمەتكەرلەردىڭ 90 پايىزىنا دورەكى سويلەپ, ار-نامىستارىنا تيگەنى انىقتالادى. وسىعان وراي ۇجىمدا ارنايى جينالىس ۇيىمداستىرىلىپ, كىتاپحانا ديرەكتورى ا. ورازقۇلوۆاعا ۇجىمداعى مورالدىق-پسيحولوگيالىق احۋالدى قالپىنا كەلتىرۋ ءۇشىن ءتيىستى شارالار قابىلداۋ ۇسىنىلادى. ورازقۇلوۆا ءتيىستى شارالار قابىلدايدى, بىراق, ول ناتيجە بەرمەيدى.

ەندى جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىندا جۇمىس ىستەيتىن ج. تالاسباەۆا 2019 جىلى وسى مەكەمەنىڭ قىزمەتكەرى ج-مەن سوتتاسادى. ناقتىراق ايتساق, تيفلولوگيا ءبولىمىنىڭ ءبولىم مەڭگەرۋشىسى ج. ءوزىن بالاعات ءسوز ايتىپ «جەزوكشە» دەپ ايىپتاعانى ءۇشىن تالاسباەۆا جاناردى جەكە باسىن قورعاۋ ماقساتىندا سوتقا بەرگەن. سوت جارتى جىلعا سوزىلىپ, وتكەن اپتادا عانا سۋديا ج. تالاسباەۆاعا 50 500 تەڭگە ايىپپۇل سالۋ تۋرالى شەشىم شىعارادى. راس, سوت شەشىمى ءالى كۇشىنە ەنگەن جوق.

وسى ماقالا جاريالانار الدىندا جانار تالاسباەۆانىڭ وزىنە حابارلاسىپ, ءمان-جايدى بىلمەك بولدىق. اماندىق-ساۋلىقتان كەيىن رەداكتسياعا كەلگەن ارىز تۋرالى ايتىپ, «جازيرا مۇلكىبەكوۆا دەگەندى تانيسىز با؟» دەپ سۇراعانبىز.

جوق... – دەپ قالدى العاشىندا ج. تالاسباەۆا. بىرگە جۇمىس ىستەپسىزدەر عوي... وي, ول بالە بىزدە جۇمىس ىستەپ كەتكەن... ءسويتىپ جۇمىستان قاشىپ كەتكەن. ارىزدا مۇلكىبەكوۆا ءسىزدى اياعىمنان شالىپ قۇلاتتى, وتە دورەكى ادام دەپ جازىپتى. جوق, ول قىز جۇمىستان كەتىپ قالعان. ديرەكتور شىعارىپ جىبەرگەن. سونىڭ كەسىرىنەن ديرەكتور جۇمىسىنان بوساپ كەتتى. مەن سىزگە ول قىزدىڭ قالاي جۇمىستان شىققانى تۋرالى بۇيرىقتى جىبەرەيىن. قازىر كارانتينگە بايلانىستى ۇيدە وتىرمىن, 4-مامىر كۇنى جۇمىسقا شىعامىن. سول قىزدىڭ كەسىرىنەن 11 جىلدان بەرى وتىرعان ديرەكتوردى جۇمىستان شىعارىپ جىبەردى. ءسويتىپ, ول قىز بالە ەكەن. ديرەكتور دا سونىڭ كەسىرىنەن جۇمىستان شىقتىم دەپ قاتتى رەنجىدى...

قىسقاسى, جانار تالاسباەۆانى قانشا اڭگىمەگە تارتساق تا بۇدان ارتىق ەشتەڭە ايتا المادى.

ەندى ءوزىڭىز ويلاپ كورىڭىزشى, تالاسباەۆا ەڭبەك ەتكەن ۇجىمنىڭ ءبارى نەمەسە ول قىزمەتتەس بولعان جانداردىڭ بارلىعى  بالەقور, ارىزقوي, سوتتاسقىش بولۋى مۇمكىن بە؟ ءبىز ارينە, جانار تالاسباەۆانى باستان-اياق قارالاۋدان اۋلاقپىز. ءبىز تەك بولعان جايتتى عانا ايتىپ وتىرمىز. ءبىز ەمەس, سوت شەشىمدەرىنىڭ ءوزى كوپ نارسەنى ايتىپ وتىر ەمەس پە؟ بۇل سوت شەشىمدەرىنىڭ بارلىعى قولىمىزدا بار. ەندەشە جامبىل وبلىسى اكىمدىگىنىڭ مادەنيەت, ارحيۆتەر جانە قۇجاتتاما باسقارماسى بۇل ىستە نەگە سولقىلداقتىق تانىتىپ وتىر؟ الدە باسقارما باسشىلارى بۇل ىستە باتىلدىق تانىتۋدا الدەبىرەۋلەردەن سەسكەنە مە؟ شىنىندا تالاسباەۆانىڭ تاساسىندا كىم تۇر؟ ال, بۇل داۋدان جامبىل وبلىسىنىڭ اكىمى بەردىبەك ساپارباەۆتىڭ حابارى بار ما؟ مۇگەدەك جاندار, بۇتىندەي ءبىر ۇجىم قاشانعى سەرگەلدەڭگە تۇسەدى؟ وسى ءىستىڭ تورەلىگىن ايتاتىن جان بار ما؟