پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا كوكتەمگى ەگىس ناۋقانى مەن شارۋالاردى قارجىلاندىرۋ جۇمىستارىنىڭ اتقارىلۋ بارىسىنا ارنالعان ءباسپاسوز ءماسليحاتى ءوتتى.
جيىندا بەلگىلى بولعانداي, كارانتينگە قاراماستان, اۋىل شارۋاشىلىعى تاۋارىن وندىرۋشىلەر كوكتەمگى ەگىس جۇمىستارىن قارقىندى اتقارىپ جاتىر. ەگىس ناۋقانى 7 وڭىردە جۇرگىزىلۋدە. سونىڭ ىشىندە ەلىمىزدىڭ وڭتۇستىك ايماقتارىندا جازدىق ەگىس القابىنىڭ 80 پايىزى ەگىلدى.
– مەملەكەت باسشىسى كوكتەمگى ەگىس جۇمىستارىن ءتيىستى مەرزىمدە جۇرگىزۋ ءۇشىن جاعداي جاساۋدى تاپسىردى. بۇل تاپسىرمانىڭ ورىندالۋى مينيسترلىكتە دە, اكىمدىكتە دە بارلىق دەڭگەيدە جۇزەگە اسىرىلۋدا. جامبىل وبلىسىندا – 326 مىڭ, الماتى وبلىسىندا – 239 مىڭ, تۇركىستاندا – 230 مىڭ, قىزىلوردادا – 28 مىڭ گەكتار جەرگە ەگىن ەگىلدى. وزگە وڭىرلەردە دە ەگىس جۇمىستارى باستالۋ ساتىسىندا. وڭىرلەر ارزانداتىلعان جانار-جاعارمايمەن, تۇقىممەن قامتاماسىز ەتىلگەن, تىڭايتقىش جىبەرىلىپ جاتىر. تەحنيكالار دايىن, – دەدى اۋىل شارۋاشىلىعى ءمينيسترىنىڭ ءبىرىنشى ورىنباسارى ايداربەك ساپاروۆ.
كارانتين كەزىندە ازاماتتاردىڭ ءجۇرىپ-تۇرۋىن شەكتەۋگە بايلانىستى بلوك-بەكەتتەردەن ءوتۋ قيىندىعىنا قاتىستى رەداكتسيامىزعا فەرمەرلەردەن, سالالىق قاۋىمداستىقتاردان كوپتەگەن شاعىم كەلىپ تۇسكەن بولاتىن. ا.ساپاروۆتىڭ اقپاراتى بويىنشا, بۇل ماسەلە شەشىمىن تاپقان سىڭايلى.
– بۇل رەتتە ىشكى ىستەر مينيسترلىگى كوكتەمگى ەگىس جۇمىستارىن جۇرگىزۋدىڭ ماڭىزدىلىعىن جەر-جەردەگى بارلىق پوليتسيا قۇرىلىمدارىنا جەتكىزدى. اقمولا جانە قاراعاندى وبلىستارى بلوك-بەكەتتەردىڭ جۇمىسىن جەكە تەكسەردىك. فەرمەرلەر كەدەرگىسىز وتۋدە. ارينە تۇسىنىسپەۋشىلىكتەر بولۋى مۇمكىن, دەسە دە ءبىز بارىنشا جەدەل جۇمىس ىستەپ جاتىرمىز. ەڭ باستىسى, اكىمدىكتەر جەرگىلىكتى جەرلەردە دەر كەزىندە ارەكەت ەتىپ, شۇعىل شتابپەن بايلانىس ۇستاۋى قاجەت. ويتكەنى شۇعىل شتاب وكىلدەرى كۇندە بلوك-بەكەتتەردە جۇمىس ىستەيدى, – دەدى ءبىرىنشى ۆيتسە-مينيستر.
سونىمەن قاتار ا.ساپاروۆ كوكتەمگى ەگىس جۇمىستارىنا ەلباسىنىڭ تاپسىرماسى بويىنشا 100 ملرد تەڭگە بولىنگەنىن اتاپ ءوتتى. بۇل قارجى تولىعىمەن اۋىل شارۋاشىلىعىن قولداۋعا جۇمسالادى.
ءباسپاسوز ءماسليحاتى بارىسىندا «ۇلتتىق اگرارلىق عىلىمي-ءبىلىم بەرۋ ورتالىعى» كەاق باسقارما توراعاسى تولەۋتاي راقىمبەكوۆ ەڭبەك وڭىمدىلىگى 2,5 ەسەگە ارتاتىنىن تىلگە تيەك ەتتى.
– كوكتەمگى ەگىس جۇمىستارى باستالعانعا دەيىن توپىراق جاعدايىن, كليماتتى ەسكەرە وتىرىپ فەرمەرلەرگە 100-دەن استام ۇسىنىس جاسادىق. ديقاندارمەن 52 ونلاين-كەڭەس وتكىزدىك. شەتەلدەن مامانداردى دا تارتتىق. كەڭەسكە 60 مىڭنان استام ادام قاتىستى. ەفير بارىسىندا تۇسكەن سۇراقتار ساراپتالىپ, ءتيىستى جاۋاپ بەرىلدى. الداعى ۋاقىتتا 400-گە جۋىق ونلاين-كەڭەس وتكىزۋدى جوسپارلاپ وتىرمىز, – دەدى ت.راقىمبەكوۆ.
ايتا كەتەيىك, بيىل فەرمەرلەردىڭ ءونىمىن فورۆاردتىق ساتىپ الۋعا ەرەكشە نازار اۋدارىلماق. بۇل تۋرالى «ازىق-ت ۇلىك كەلىسىمشارت كورپوراتسياسى» ۇك» اق باسقارما توراعاسى قانات قاراۋىلوۆ ايتتى.
– فورۆاردتىق ساتىپ الۋعا قاجەتتى بيۋدجەت قاراجاتىنىڭ جالپى سوماسى 24,5 ملرد تەڭگەنى قۇرايدى. قارجىلاندىرۋ الدىن الا تولەم ارقىلى جۇزەگە اسىرىلادى. مىسالى, بيدايعا قاتىستى الدىن الا تولەم ءبىر تونناسىنا 50 مىڭ تەڭگەدەن بولادى. قالعان سوما كۇزدە قالىپتاساتىن نارىقتىق باعالار نەگىزىندە ەسەپتەلەدى, – دەدى ق.قاراۋىلوۆ.
ال «اگرارلىق نەسيە كورپوراتسياسى» اق باسقارما توراعاسى باعلان قۇلتاەۆ نەسيە بويىنشا پايىزدىق مولشەرلەمە 7%-دان 5%-عا دەيىن تومەندەيتىنىن جەتكىزدى. ءارى «كەڭ دالا» نەسيەلەندىرۋ باعدارلاماسى بويىنشا جەڭىلدەتىلگەن نەسيەمەن 2346 اگروونەركاسىپ سۋبەكتىسىنە قولداۋ كورسەتىلمەك. سونداي-اق شارۋالار ۇسىناتىن قۇجاتتار تىزبەسى دە قىسقارتىلادى. بۇل نەسيە الۋ ءۇشىن ەسىكتەن ەسىككە جۇگىرگەن فەرمەرلەرگە ۇلكەن كومەك بولماق.