ەلوردا اكىمى التاي كولگىنوۆ «جاستار» شاعىن اۋدانىندا كوللەكتورلاردى قالپىنا كەلتىرۋ مەن تازارتۋ قۇبىرلارىنىڭ قۇرىلىس بارىسىمەن, سونداي-اق, ا. توقپانوۆ پەن ب. مومىش ۇلى كوشەلەرىنىڭ قيىلىسىنداعى نوسەرلىك سۋ كارىزىنىڭ قۇرىلىسىمەن تانىستى.
مەملەكەت باسشىسى نوسەرلى جاڭبىر سۋ جينالۋىنىڭ الدىن الۋ ءۇشىن كارىزدەردى سالۋ جۇمىستارىنىڭ قارقىنىن ارتتىرۋدى تاپسىردى. «جاستار» شاعىن اۋدانىنداعى جاڭا قۇرىلىستاردىڭ قۋاتى تاۋلىگىنە 42 مىڭ تەكشە مەتردەن اسادى. بۇل نوسەرلىك سۋ كاناليزاتسياسىنىڭ وتكىزۋ قابىلەتىن ايتارلىقتاي جاقسارتۋعا مۇمكىندىك بەرەدى: بوگەتسىز جيناۋدى, جەر ءۇستى اعىندارىن بۇرۋدى جانە تازارتۋدى قامتاماسىز ەتەدى.
تازارتۋ قۇرىلعىلارى تاشەنوۆ, باراەۆ, ءۋاليحانوۆ, يمانباەۆ جانە رەسپۋبليكا داڭعىلدارىنىڭ جاڭبىرلى سۋ باسۋىن بولدىرماۋعا مۇمكىندىك بەرەدى. تازارتۋ قۇرىلعىلارى جەر استىندا ورنالاسقاندىقتان, قۇرىلعى ۇستىندەگى اۋماقتا اباتتاندىرۋ جۇمىستارىن جۇرگىزۋ, شاعىن ساۋلەت نىساندارىن ورناتۋ قاراستىرىلعان.
قۇرىلىس جۇمىستارىن 2021 جىلى اياقتاۋ جوسپارلانىپ وتىر. ەكىنشى نىسان ب. مومىش ۇلى جانە توقپانوۆ كوشەلەرىنىڭ قيىلىسىنداعى نوسەرلى سۋ كارىزدىك تازارتۋ قۇرىلعىسىنىڭ قۇرىلىسى بولدى. قازىرگى ۋاقىتتا قۇرىلىس-مونتاجداۋ جۇمىستارى جۇرگىزىلىپ جاتىر. بەس ۇڭعىما ۋچاسكەلەرىندە سۋ اعىزۋ جانە سۋ دەڭگەيىن تومەندەتۋ جۇمىستارى ورىندالدى, 130 مەتردەن استام ماگيسترالدى كوللەكتور جانە ت. ب. سالىندى.
قازىرگى تاڭدا ەلوردانىڭ نوسەرلىك سۋ كارىز جۇيەسى 15 تازارتۋ قۇرىلعىسىنان, 3 جيناعىش توعاننان, 390 كم ماگيسترالدى كوللەكتوردان, ارىق جەلىسىنەن, 64 سورعى ستانتسياسىنان, شامامەن 20 مىڭ جاڭبىر سۋلارىن قابىلدايتىن قۇدىقتان تۇرادى. 2019 جىلى مىڭجىلدىق اللەياسى اۋماعىندا ەكى ۋچاسكەدەگى نوسەرلىك سۋ كارىزىنىڭ ماسەلەسى شەشىلدى.