باتىس قازاقستان وبلىسىندا COVID-19 ينفەكتسياسىن جۇقتىرعان ادامداردىڭ سانى 26 ءساۋىر تاڭەرتەڭ 116-عا جەتتى. سوڭعى تاۋلىكتە انىقتالعان 13 ادامنىڭ ءبارى دە – رەسەي فەدەراتسياسىنان كەلگەن جۇمىسشىلار.
كوروناۆيرۋس ينفەكتسياسى تابىلعان ادامداردىڭ بارلىعى دا رەسەي فەدەراتسياسىندا جۇمىس ىستەيتىن قازاقستان رەسپۋبليكاسىنىڭ ازاماتتارى. ولاردىڭ 6-ۋى – باتىس قازاقستان وبلىسىنىڭ, 5-ءى – الماتى وبلىسىنىڭ, 2-ءى – تۇركىستان جانە قاراعاندى وبلىستارىنىڭ تۇرعىندارى. بۇلاردىڭ كەيبىرى ماسكەۋ قالاسىنان كەلگەن, ساراتوۆ وبلىسىندا جەكە قۇرىلىسپەن اينالىسىپ, ەلگە ورالعاندارى دا بار. ولار شەكارا بەكەتىنەن وتكەن سوڭ تاسقالا اۋدانىنداعى كارانتيندىك ورتالىقتا بولدى. سول جەردە ءتيىستى دياگنوستيكالىق زەرتتەۋلەر جۇرگىزىلگەن سوڭ 13 ازامات تا وبلىستىق جۇقپالى اۋرۋلار اۋرۋحاناسىنا جاتقىزىلدى, - دەدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك ەرمەك ۇلى.
بۇل ازاماتتاردىڭ جاسى 19 بەن 49 ارالىعىندا.
بۇگىنگى جاقسى جاڭالىق – وسى كەزگە دەيىن كوروناۆيرۋستان جازىلىپ شىققان 2 ادامنىڭ قاتارىنا تاعى 4 ادام قوسىلدى. ولار ەكى مارتە تەست ناتيجەسىنەن كەيىن جازىلعانى انىقتالىپ, ۇيلەرىنە جىبەرىلگەن.
ءدال قازىر باتىس قازاقستان وبلىستىق جۇقپالى اۋرۋلار اۋرۋحاناسىندا – 110 ادام, پروۆيزورلىق ستاتسيوناردا – 25, كارانتيندىك ستاتسيوناردا – 89, ال ءۇي كارانتينىندە – 1450 ادام وقشاۋلاندى.
- ماماندارىمىز قازىر كۇنى-ءتۇنى جۇمىس ىستەپ, قاتەرلى دەرتپەن كۇرەسىپ جاتىر. بۇل تەك وبلىس تۇرعىندارىن ەمەس, بۇكىل قازاقستان حالقىن امان ساقتاۋ, ىندەتتى ودان ءارى تاراتپاۋ ءۇشىن جاسالىپ وتىرعانىن تۇسىنسەڭىزدەر ەكەن. جەكە باس گيگيەناسىن, كارانتين تالاپتارىن ساقتاۋدى سۇرايمىز, - دەدى نۇرلىبەك مۇستاەۆ قوشتاساردا.
باتىس قازاقستان