بۇعان ەشكىمدى كىنالاۋعا بولمايتىن شىعار, ۇيدە 3 بالانى جالعىز باعىپ وتىرمىن. تاعدىردىڭ جازۋى سولاي بولدى, ءدام-تۇزىمىز جاراسپاي وتاعاسىمەن اجىراستىق. تۇڭعىشىم 4 جاستا, كەنجەم 9 ايلىق. كوپتىڭ قول-اياعىن بايلاپ وتىرعان ىندەت تە بىزگە اۋىر تيۋدە. وسىندايدا ءاربىر كومەك باعالى, ءاربىر جىلى ءسوز كوڭىلگە دەمەۋ.
جاسىراتىنى جوق, بالالارىما بەرىلەتىن جاردەماقىنى بۇل كۇندەرى بارلىق قاجەتتىلىككە جەتكىزۋ قيىن. ال ەندى قايىرىمدى جانداردىڭ قولداۋى بىزگە قاجەت-اق. وسىنداي قيىن ساتتە مەملەكەت تاراپىنان كورسەتىلىپ جاتقان كومەكتى دەر كەزىندە بەرىلگەن جانە ەرتەڭگە دەگەن سەنىمدى نىعايتقان قولداۋ دەپ ەسەپتەيمىن. اكىمدىك وكىلدەرى اكەلىپ تابىس ەتكەن كەپىلدەندىرىلگەن الەۋمەتتىك توپتاما بۇگىنگى قيىندىقتى ۇمىتتىرعانداي بولدى. بۇل ءۇشىن وسىنداي قولداۋلار جونىندە تاپسىرما بەرگەن پرەزيدەنتكە, ونى بۇلجىتپاي ورىنداعان جەرگىلىكتى باسشىلارعا ايتار العىسىمىز شەكسىز. وسىنداي كومەكتەردىڭ ارقاسىندا قيىندىقتان دا شىعارمىز, ۇيدەن شىعارماعان ۇرەيلى ىندەتتى جەڭەرمىز.
بالالارىمنىڭ اماندىعى قىمبات جانە ولارعا قيىن ساتتە قولۇشىن بەرگەن مەملەكەتتىڭ كومەگىنە, قايىرىمدى جاندارعا العىس ايتامىن.
سەۆارا ابدراسيلوۆا,
تۇركىستان قالاسىنىڭ تۇرعىنى