اتىراۋ وبلىسىنداعى «تەڭىزشەۆرويل» سەرىكتەستىگىنىڭ مۇناي ءوندىرۋ ايلاعىندا جۇمىس ىستەيتىن الماتى وبلىسىنىڭ 64 تۇرعىنى ۇيىنە ورالدى. ولار بۇگىن اتىراۋدان ۇشقان اۋە رەيسىمەن الماتى اۋەجايىنا كەلىپ قوندى.
جۇقپالى ىندەتتىڭ ورشۋىنە بايلانىستى ۆاحتالىق اۋىسىمنان قايتقاندار اۋەجايدا كوروناۆيرۋسقا قارسى تەكسەرۋدەن ءوتىپ, حاتتاماعا سايكەس وقشاۋلانادى. قازىر كەلگەن 64 ادام ارنايى اۆتوبۋسپەن قاپشاعاي قالاسىنىڭ ماڭىنا جەتكىزىلىپ, «كۇنشۋاق» دەمالىس ورنىنا ورنالاستىرىلعان.
- ۇيىنە ورالعان سەرىكتىكتىك قىزمەتكەرلەرى سوڭعى ايدا تەڭىز كەنىشىندە ۆاحتالىق اۋىسىمدا جۇمىس ىستەگەن, بىراق COVID-19 ينفەكتسياسى انىقتالعان ۆاتەرناس ۆاحتالىق كەنتىندە تۇرماعان. دەگەنمەن, قاۋىپسىزدىك ماقساتىندا اۋە رەيسىنە كوروناۆيرۋس ينفەكتسياسىنا تەكسەرۋ ەكسپرەسس-تەستىنىڭ ناتيجەسى تەرىس بولعاندار عانا وتىرعىزىلدى. ولار قاپشاعاي قالاسىنا جەتكىزىلگەننەن كەيىن ەكى كۇن كارانتينگە الىنادى. وبلىس باسشىلىعىنىڭ تاپسىرماسىمەن اتالعان دەمالىس ورنىندا بارلىق سانيتارلىق-دەزينفەكتسيالىق شارالاردى ساقتاي وتىرىپ, كارانتين كەزىندە جولاۋشىلاردىڭ ءومىر سۇرۋىنە قاجەتتى بارلىق جاعدايلار تولىق قاراستىرىلعان. ەكى كۇننەن كەيىن اتالعان جولاۋشىلار تۇرعىلىقتى جەرلەرىنە ارنايى اۆتوبۋستارمەن جەتكىزىلەتىن بولادى, - دەپ حابارلادى جاعدايعا وراي تۇسىنىك بەرگەن الماتى وبلىسى اكىمىنىڭ ءباسپاسوز قىزمەتى.