قازاقستان رەسپۋبليكاسى پرەزيدەنتىنىڭ توتەنشە جاعداي مەن كارانتين ۋاقىتىندا تۇرعىنداردىڭ كوممۋنالدىق قىزمەتكە تولەيتىن اقىسىنىڭ مولشەرىن ازايتۋ بويىنشا جۇيەلى شارالار ازىرلەۋ تۋرالى تاپسىرماسىن ورىنداۋ اياسىندا يندۋستريا جانە ينفراقۇرىلىمدىق دامۋ مينيسترلىگى كوممۋنالدىق قىزمەت جەتكىزۋشىلەرىمەن كەلىسىمشارتى بار تۇتىنۋشىلار ءۇشىن كوممۋنالدىق قىزمەتتى تولەۋدى قاراستىراتىن تەتىك ازىرلەدى.
وسىلايشا كارانتين ەنگىزىلگەن وڭىرلەردە اكىمدىكتەر تۇتىنۋشىلاردىڭ دەربەس (ابونەنتتىك) شوتتارىنا 2 اي بويى اي سايىن 15 مىڭ تەڭگەدەن جىبەرىپ وتىرادى. مەملەكەتتىك ورگانداردىڭ ۇسىنىسى نەگىزىندە تولەم الۋشىلاردىڭ كەلەسى ساناتتارى انىقتالدى:
1) 1, 2, 3 توپ مۇگەدەكتەرى;
2) مۇگەدەك بالالاردى تاربيەلەپ وتىرعان وتباسىلار;
3) كوپ بالالى وتباسىلار;
4) ۇلى وتان سوعىسىنىڭ مۇگەدەكتەرى مەن قاتىسۋشىلارى, ۇلى وتان سوعىسى مۇگەدەكتەرى مەن قاتىسۋشىلارىنا تەڭەستىرىلگەن تۇلعالار;
5) مەملەكەتتىك نەمەسە قوعامدىق مىندەتتەرىن, اسكەري قىزمەتىن ورىنداۋ بارىسىندا, عارىش كەڭىستىگىنە ۇشۋعا دايىندىق بارىسىندا نەمەسە ۇشۋ كەزىندە, ادام ءومىرىن قۇتقارۋ جانە قۇقىق ءتارتىبىن ساقتاۋ كەزىندە قازا تاپقان تۇلعالاردىڭ وتباسىلارى;
6) تومەن جانە ودان از زەينەتاقى الاتىن زەينەتكەرلەر;
7) اتاۋلى الەۋمەتتىك كومەك الاتىن ازاماتتار, ونىڭ ىشىندە جالعىزباستى زەينەتكەرلەر.
تولەمدى الۋ ءۇشىن تۇتىنۋشى اقپاراتتىق جۇيەلەر نەمەسە call-ورتالىق ارقىلى جەكە سايكەستىندىرۋ ءنومىرىن, الەۋمەتتىك دارەجەسىن جانە دەربەس شوت دەرەكتەرىن كورسەتە وتىرىپ, اكىمدىككە ءوتىنىم بەرۋى كەرەك. اكىمدىك ۇسىنىلعان دەرەكتەردى تەكسەرەدى, مالىمەتتەر راس بولعان جاعدايدا كوممۋنالدىق قىزمەتتەر تۇتىنۋشىسىنىڭ دەربەس (ابونەنتتىك) شوتىنا قارجى اۋدارادى.
اكىمدىك تۇتىنۋشىلاردان وتىنىمدەردى قابىلداۋ جانە ولاردىڭ راستىعىن تەكسەرۋدى دۇرىستاپ ۇيىمداستىرۋى ءتيىس.