ارالاس جەكپە-جەكتەن UFC ۇيىمىنىڭ باسشىلىعى كوروناۆيرۋس پاندەمياسىنا بايلانىستى تۋرنيرلەرىن تاعى دا وتكىزە المايتىن بولدى. UFC بۇگىن ءساۋىر مەن مامىر ايىنا جوسپارلانعان ءتورت ءىرى ءتۋرنيرىن وتكىزبەيتىنىن رەسمي تۇردە مالىمدەدى.
ۇيىمنىڭ رەسمي سايتىندا حابارلانعانداي, 9 مامىردا سان-پاۋلۋ (برازيليا) قالاسىندا جوسپارلانعان UFC 249 ءتۋرنيرى وتپەيتىن بولدى. سونىمەن قاتار UFC Fight Night باسەكەسىنىڭ ءۇش بىردەي جارىسى دا, ياعني 25 ساۋىردە اقش-تىڭ لينكولن, 2 مامىردا وكلاحوما-سيتي جانە 16 مامىردا سان-ديەگو قالاسىندا ءوتۋى ءتيىس بولعان تۋرنير دە ۇيىمداستىرىلمايتىن بولدى.
«اتالعان تۋرنيرلەرگە بيلەت العان جانكۇيەرلەرگە اقشاسىن تولىق قايتارامىز. سونداي-اق ينتەرنەت پەن تەلەفون ارقىلى العان بيلەتتەردىڭ قۇنى دا اۆتوماتتى تۇردە قايتارىلادى. UFC تۋرنيرلەرى تەز ارادا قايتا ورالادى», دەلىنگەن رەسمي حابارلامادا.
ايتا كەتەيىك, UFC بۇعان دەيىن دە پاندەمياعا بايلانىستى بىرقاتار ءتۋرنيرى مەن 18 ساۋىرگە جوسپارلانعان حابيب نۋرماگومەدوۆ پەن توني فەرگيۋسون اراسىنداعى جەكپە-جەكتى دە وتكىزە الماعان بولاتىن.