قازاقستان رەسپۋبليكاسى پارلامەنتى سەناتى الەۋمەتتىك-مادەني دامۋ كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەڭبەك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. بۇل تۋرالى سەناتتىڭ ءباسپاسوز قىزمەتى حابارلادى.
زاڭ جوباسىنىڭ ماقساتى – قازاقستان رەسپۋبليكاسىنىڭ ەڭبەك قاتىناستارى سالاسىنا قاتىستى زاڭنامانى ودان ءارى جەتىلدىرۋ جانە دامىتۋ بولىپ تابىلادى.
ەڭبەك قاتىناستارىن رەتتەۋ, ونىڭ ىشىندە ازاماتتاردىڭ ەڭبەك جانە الەۋمەتتىك قۇقىقتارىن تولىق جۇزەگە اسىرۋعا جاعداي جاساۋ, الەۋمەتتىك ارىپتەستىكتى رەتتەۋ, ونىڭ ىشىندە جۇمىس بەرۋشىلەر مەن جۇمىسشى وكىلدەرىنىڭ وكىلەتتىلىك ءتارتىبىن بەلگىلەۋ, ەڭبەك جانە ادام قاۋىپسىزدىگىن رەتتەۋ, اتاپ ايتقاندا ەڭبەك قاۋىپسىزدىگىن باسقارۋ جۇيەسىن ەنگىزۋ زاڭنامانىڭ نەگىزگى مىندەتتەرىنە جاتادى.
سەناتور ناريمان تورەعاليەۆ وسى زاڭ جوباسى ەلىمىزدىڭ ەڭبەك زاڭناماسىن حالىقارالىق ەڭبەك ۇيىمىنىڭ كونۆەنتسيالارىندا ايتىلعان حالىقارالىق ستاندارتتارعا جاقىنداتۋعا باعىتتالعانىن اتاپ ءوتتى. «زاڭ جوباسى ەڭبەك شارتتارىن ەلەكتروندىق جۇيەلەندىرۋ جانە ءبىر جۇيەگە شوعىرلاندىرۋ ماقساتىندا ەلەكتروندىق ەڭبەك كەلىسىمشارتتارىن ەسەپكە الۋدىڭ بىرىڭعاي جۇيەسىن ەنگىزۋگە باعىتتالعان», - دەدى ول.
ەڭبەك قاتىناستارىنا قاتىستى جاڭا زاڭ جوباسىن قابىلداۋ, جۇمىسشىلارعا لايىقتى ەڭبەك جانە تۇرمىس جاعدايىن قۇرۋعا, سۋبەكتىلەردىڭ ەڭبەك قاتىناستارىندا جۇمىسشىلاردىڭ ەڭبەك جانە جەكە باسىنىڭ قاۋىپسىزدىگى سالاسىنداعى ءتيىستى قۇقىقتارى مەن مىندەتتەرىن بەلگىلەۋگە, ەڭبەك زاڭناماسىن قاداعالاۋ بويىنشا باقىلاۋ جۇيەسىن جەتىلدىرۋگە, الەۋمەتتىك-ەڭبەك سالاسىندا تسيفرلاندىرۋ ەنگىزۋ اياسىن كەڭەيتۋگە, ەڭبەك زاڭناماسىنداعى تارتىپتەر بويىنشا ءتۇرلى تۇسىنىسپەۋشىلىككە جول بەرمەۋگە مۇمكىندىك بەرەدى.
قۇجات پالاتا وتىرىسىنىڭ قاراۋىنا جىبەرىلدى.