الماتىدا 700-گە جۋىق مەدقىزمەتكەر كوروناۆيرۋسپەن كۇرەس تاسىلدەرىن ۇيرەتۋ ءۇشىن قىتايدان كەلگەن دەلەگاتسيانىڭ ونلاين ترەنينگىن تىڭدادى.
ونلاين ترەنينگتە شىڭجاڭ وكرۋگىندەگى دوستىق گوسپيتالىنىڭ اعا مەدبيكەسى يۋ يانسيا ينفەكتسيالىق ستاتسيوناردى زاراراسىزداندىرۋ تاسىلدەرىمەن ءبولىستى.
«وقشاۋلاۋدىڭ باستى شارتى - «1 ناۋقاس – 1 پالاتا». ءبىز اۋرۋحانالاردى 3 تيپكە بولدىك. جاسىل - تازا ايماق, سارى - جارتىلاي تازا ايماق, قىزىل - جۇقتىرۋ ايماعى. بۇل ايماقتاردىڭ ارقايسىسىن وزىنشە تازالايتىنبىز. ورتا ەسەپپەن كۇنىنە 2 رەت زارارسىزداندىراتىنبىز. اۋانى, قابىرعالاردى, ەدەن مەن قۇرال-جابدىقتاردى دەزينفەكتسيالادىق. تولىق زارارسىزداندىرۋعا 30 مينۋت ۋاقىت كەتەدى. دەزينفەكتسيادان شىققان سوڭ بارلىق ماتەريالدار جويىلادى», دەدى اعا مەدبيكە يۋ يانسيا.
سونداي-اق ول قورعانىس كوستيۋمدەرىن كيۋ, ماسكا تاعۋ, قولدى قالاي جۋ كەرەكتىگىن كورسەتتى.
ءوز كەزەگىندە س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ رەكتورى تالعات نۇرعوجين قىتايدان كەلگەن دارىگەرلەرگە العىس ءبىلدىردى.
«ەڭ الدىمەن وسىنداي كەزدەسۋ تۋرالى ۋاعدالاستىققا قول جەتكىزگەن مەملەكەت باسشىسى قاسىم-جومارت توقاەۆقا العىس ايتامىن. بۇرىن-سوڭدى كورمەگەن ينفەكتسيامەن كۇرەستە بۇل مامانداردىڭ كەلۋى ءبىزدىڭ مىندەتتەرىمىزدى ايقىندادى. ەڭ الدىمەن مەديتسينا ماماندارى بۇل ۆيرۋسپەن كۇرەسۋدە ءبىلىمىن كەڭەيتكەنى ءجون. ساباققا قاتىسقان دارىگەرلەردىڭ ساۋالى وتە كوپ. قىتاي بۇل ۆيرۋستى از ۋاقىتتا توقتاتا ءبىلدى. سوندىقتان ولاردىڭ تاجىريبەسى, ءبىلىمى ءبىز ءۇشىن ماڭىزدى», دەدى س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ رەكتورى تالعات نۇرعوجين.
ايتا كەتەيىك, قىتايلىق دارىگەرلەردىڭ كوروناۆيرۋس تۋرالى ونلاين ساباعىنا قاتىسۋ - تەگىن. بۇل ساباقتار تەك قازاقستاندىق قانا ەمەس, شەتەلدىك مامانداردىڭ دا قىزىعۋشىلىعىن تۋدىرۋدا. بۇگىن سەمينارعا وزبەكستاننان سامارقان مەن بۇحارانىڭ دارىگەرلەرى دە قاتىستى.
ەسكە سالا كەتەيىك, بۇگىن الماتىعا قىتايدان 10 مامان كوروناۆيرۋسپەن كۇرەس تۋرالى بىلىمىمەن بولىسۋگە كەلدى. دەلەگاتسيا قۇرامىندا ينفەكتسيونيست, ەپيدەميولوگ, پۋلمونولوگ سىندى ماماندار بار.