قر سىبايلاس جەمقورلىققا قارسى ءىس-قيمىل اگەنتتىگى اقمولا وبلىستىق دەپارتامەنتىنىڭ تەرگەۋ باسقارماسى قىزمەتكەرلەرىنىڭ توتەنشە جاعداي رەجيمىن بۇزۋ فاكتىسى بويىنشا قىزمەتتىك تەكسەرۋ جۇرگىزدى, دەپ حابارلايدى قازاقپارات.
اگەنتتىك مالىمەتىنشە, اتالعان باسقارمانىڭ باسشىسى ر.تۇرعامبەكوۆتىڭ جانە وعان باعىنىشتى تەرگەۋشىلەر ن.مىرزاگەلديننىڭ, ا.قاعارماننىڭ, ج.اقمولديننىڭ, ب.لۇقمانوۆتىڭ توتەنشە جاعداي رەجيمىنىڭ قازىرگى شەكتەۋلەرىنە قاراماستان, كەشكى دەمالىستى كوكشەتاۋداعى مونشا كەشەندەرىنىڭ بىرىندە وتكىزگەنى انىقتالعان.
«وسىعان بايلانىستى 20 ساۋىردە اگەنتتىكتىڭ ورتالىق اپپاراتىنىڭ تارتىپتىك كوميسسياسى وتىرىسى ءوتتى. وقيعانىڭ بارلىق جاعدايلارىن جانە ادىلەتتىلىك, پاراساتتىلىق, سەنىم قۇندىلىقتارىن قاتاڭ ساقتاۋدى ەسكەرە وتىرىپ, اگەنتتىك توراعاسىنىڭ بۇيرىعىمەن اتالعان قىزمەتكەرلەر كەلەشەكتە مەملەكەتتىك ءارى قۇقىق قورعاۋ ورگاندارىندا جۇمىس ىستەۋ قۇقىعىنسىز جاعىمسىز سەبەپتەر بويىنشا جۇمىستان بوساتىلدى», - دەلىنگەن تاراتىلعان اقپاراتتا.
سونىمەن قاتار تارتىپتىك كوميسسيانىڭ ۇسىنىسى بويىنشا وبلىستىق دەپارتامەنت باسشىسى م.تولەۋباەۆ جەكە قۇراممەن الدىن الۋ جۇمىسىن ناشار ۇيىمداستىرعانى ءۇشىن قىزمەتىنە تولىق سايكەس ەمەستىگى تۇرىندە جاۋاپقا تارتىلدى.
«سىبايلاس جەمقورلىققا قارسى ءىس-قيمىل اگەنتتىگى ءوز ارىپتەستەرىنىڭ تەرىس قىلىقتارىنىڭ سالدارىن تۇسىنە وتىرىپ, ازاماتتاردىڭ كارانتين رەجيمىن ساقتاۋ كەزىندەگى جاۋاپكەرشىلىگىن مويىنداپ قۇرمەتتەي كەلە, ورىن العان جاعداي ءۇشىن شىنايى كەشىرىم سۇرايدى جانە ءاربىر قىزمەتكەردىڭ اتاعى مەن دارەجەسىنە قاراماستان زاڭ بۇزۋشىلىق فاكتىسى ءۇشىن جازانىڭ بۇلتارتپاستىعىنا كەپىلدىك بەرەدى», - دەدى ۆەدومستۆودان.