توتەنشە جاعدايدىڭ تالابى بۇرىنعىدان وزگەشە. ءتىپتى سولاي بولعان كۇننىڭ وزىندە شىعارماشىلىق جاندار نەبىر تۋىندىلاردى جاساپ, اينالاسىنداعىلارعا ءتالىم-تاربيە بەرە الادى ەكەن.
ارماندار ورىندالادى. وعان بەلگىلى قىلقالام شەبەرى, پەداگوگ, ديزاينەر انار ساتتىباەۆا كامىل سەنىمدى. ول وبلىس ورتالىعىندا «گرانات» شىعارماشىلىق ستۋدياسىن اشقان بولاتىن. كارانتين كەزىندە سۋرەتشى بولۋدى ارماندايتىن ادامدارعا ونلاين-ساباق وتكىزۋدە. ۇيرەنۋشىلەردىڭ جاس ەرەكشەلىگى دە ءارتۇرلى. ەڭ ەگدەسى 76 جاستا. ءتىپتى 3 جاستاعى بالالار دا ساباققا قاتىسا الادى.
–نەگىزىندە توتەنشە جاعداي ءبىزدىڭ قابىلەتىمىزدىڭ وزگە تۇستارىن اشۋعا ۇلكەن مۇمكىندىك تۋدىرىپ وتىر. وسكەلەڭ ۇرپاققا نە بەرە الامىز دەگەن ساۋالدى سارالايتىن ءسات تۋعىزىپ وتىرعانداي. سوندىقتان كۇردەلى جاعدايعا قاراماستان, بار بىلگەنىمىزدى بالالارعا ۇيرەتۋگە تىرىسامىز. بالعىن بۇلدىرشىندەر قۋانا قابىلدايدى. قازىر ءتۇرلى ءبىلىم بەرۋ باعدارلامالارىن ينتەرنەت ارقىلى جۇزەگە اسىرۋدامىز. ناتيجەسىن ۋاقىت كورسەتەدى, دەيدى پەداگوگ انار ساتتىباەۆا.
انار ساتتىباەۆانىڭ ايتۋىنشا, كارانتين رەجىمى باستالعانعا دەيىن ستۋديادان ساباق العانداردىڭ قاتارى 100-دەن اسقان. قازىر ولار ونلاين-ساباقتارعا يكەمدەلە الماي جۇرگەن كورىنەدى. تەحنيكالىق اقاۋلار دا ءجيى كەزدەسەدى. سكايپ, ۆاتساپ, زۋم, قولدا بار الەۋمەتتىك جەلىلەردى قولدانادى. وقۋشىلار ورىنداعان جۇمىستارىن ۇستازدارعا جولدايدى. ولار قاتەلەرىن تۇزەتەدى. ءتىپتى قولىنا قىلقالام ۇستاپ كورمەگەن, جاسى ەگدە تارتقان ادامدار دا شەبەرلىك ساعاتتارىنا قاتىسۋدا. ەرەسەك جاستاعى وقۋشىلارعا اكادەميالىق كاسىبي كۋرستار دا ازىرلەنىپتى. ال, جاسى كىشى بالاقايلارعا سايكەسىنشە باعدارامالار جاسالىپ جاتىر. سەبەبى, ولارمەن قاشىقتىقتان جۇمىس ىستەۋ بىرقاتار قيىندىق تۋدىراتىن كورىنەدى.
كوكشەتاۋ قالاسى