ۇستىمىزدەگى جىلدىڭ العاشقى توقسانىنداعى ەكونوميكالىق كورسەتكىشتەردى قورىتىندىلاعان وبلىس اكىمدىگىنىڭ وتىرىسىندا ءوڭىر باسشىسى قۇمار اقساقالوۆ ەكونوميكانىڭ قالىپتى دەڭگەيدە دامىپ كەلە جاتقاندىعىن ايتتى, سونىمەن بىرگە ول الداعى ۋاقىتقا جوسپارلانعان شارالاردى ورىنداي بەرۋ كەرەكتىگىن اتاپ ءوتتى.
وبلىس ەكونوميكاسىنىڭ دامۋ بارىسى تۋرالى بايانداعان ەكونوميكا باسقارماسىنىڭ باستىعى ارسەن قازىبەكوۆ جىل باسىنان بەرگى ەكونوميكانىڭ ءوسىمى 2,4 پايىز, ياعني 26,7 ملرد تەڭگە بولعانىن اتاپ ءوتتى. سونىمەن بىرگە ول ءاربىر اۋداننىڭ دامۋ ديناميكاسىنا توقتالىپ, ءوسىمنىڭ قىزىلجار اۋدانىندا تومەن ەكەنىن ايتتى. بۇعان سەبەپ بولعان جۇمىرتقا ءوندىرۋدىڭ 30 پايىزعا قۇلدىراپ كەتكەندىگى جەتكىزىلدى. ەت ونىمدەرىن شىعارۋ وبلىستا وسى كەزەڭدە 6,6 پايىزعا, ءسۇت 6 پايىزعا ارتقان. سونىڭ ىشىندە ەت ءوندىرۋ تايىنشا, اققايىڭ, ەسىل اۋداندارىندا, ال ءسۇت ونىمدەرىن شىعارۋ مامليۋت, اققايىڭ, ع.مۇسىرەپوۆ اۋداندارىندا ارتقان. ونەركاسىپ ونىمدەرىنىڭ ءوندىرىسى دە 65,5 ملرد تەڭگەگە ارتىپ وتىر.
2020 جىلدىڭ ءبىرىنشى توقسانىنداعى بيۋدجەت ءتۇسىم بولىگى دە جوسپارداعىدان ارتقان, ال شىعىس بولىگىنىڭ ورىندالۋى 99,2 پايىز. بۇل تۋرالى جيىندا وبلىستىق قارجى باسقارماسىنىڭ باستىعى ناتاليا دىشكانت ايتتى.
وتىرىستى قورىتىندىلاعان وبلىس اكىمى قۇمار اقساقالوۆ «قالىپتاسىپ وتىرعان داعدارىس ەكونوميكانىڭ دامۋىنا كەرى اسەر ەتپەۋى كەرەك. ءبىز كەرىسىنشە, ءوز ونىمدەرىمىزدى شىعارۋعا كۇش سالىپ, «قاراپايىم زاتتاردىڭ ەكونوميكاسى» باعدارلاماسىن ىسكە اسىرۋىمىز كەرەك. بۇل ىسكە ەلىمىزدە ءبىر تريلليون تەڭگە قاراستىرىلعان», - دەدى ول.
سونىمەن قاتار ول اۋدان اكىمدەرى مەن وبلىس قۇرىلىمدارىنىڭ باسشىلارىنا ءىجو-ءنىڭ ءوسىمىن جىل قورىتىندىسى بويىنشا 4 پايىزدان تومەندەتپەۋ كەرەكتىگى تۋرالى مىندەت قوياتىنىن ايتتى.
سولتۇستىك قازاقستان وبلىسى