باتىس قازاقستان وبلىسىندا 17 ءساۋىر كۇنى كوروناۆيرۋس ىندەتىن جۇقتىرعانداردىڭ سانى 32-گە جەتتى. سوڭعى انىقتالعان ەكى ادامنىڭ ءبىرى – اقتوبە وبلىسىنىڭ تۇرعىنى.
«باتىس قازاقستان وبلىسىندا كوروناۆيرۋس ينفەكتسياسىن جۇقتىرعان تاعى 2 ادام انىقتالدى. ناۋقاستىڭ ءبىرى - 22 جاستا, باتىس قازاقستان وبلىسىنىڭ تۇرعىنى, ال ەكىنشىسى – اقتوبە وبلىسىنىڭ تۇرعىنى, 23 جاستا» دەپ حابارلادى باتىس قازاقستان وبلىسى كوميسسياسىنىڭ شۇعىل شتابى.
ەكى ناۋقاس تا رەسەي فەدەراتسياسىندا ۆاحتالىق ادىسپەن جۇمىس جاسايتىن ازاماتپەن بىرگە كورشى ەلدەن كەلگەن. ۆاحتالىق جۇمىسشىنىڭ اۋىرعانى شەكارادان وتكەندە بەلگىلى بولعان ەدى. ال بۇل ازاماتتار ناۋقاسپەن بايلانىستا بولعان تۇلعا رەتىندە كارانتيندىك ستاتسيونارعا وقشاۋلانعان بولاتىن. سوڭعى دياگنوستيكالىق زەرتتەۋ قورىتىندىسى ەكەۋىنە دە «COVID-19» دياگنوزىن قويدى.
قازىر ناۋقاستار وبلىستىق جۇقپالى اۋرۋلار اۋرۋحاناسىنا جاتقىزىلدى. اۋرۋ وشاقتارىندا دەزينفەكتسيالىق جۇمىستار جۇرگىزىلدى. ەپيدەمياعا قارسى ءىس-شارالار جالعاسۋدا.
سونىمەن, باتىس قازاقستان وبلىسىندا كوروناۆيرۋستىق جۇقپادان 2 ادام جازىلىپ شىقتى, 30 ادام وبلىستىق جۇقپالى اۋرۋلار اۋرۋحاناسىندا ەم الىپ جاتىر. سونداي-اق پروۆيزورلىق ستاتسيوناردا – 148, كارانتيندىك ستاتسيوناردا – 81, ءۇي جاعدايىندا – 1396 ادام وقشۋالانىپ, دارىگەر باقىلاۋىنا الىنعان.
باتىس قازاقستان