كۇنى كەشە كاسىپقوي بوكسقا قايتا ورالعانىن مالىمدەگەن قازاقستاندىق بوكسشى فيرۋزا ءشارىپوۆانىڭ التى ايلىق ۇزىلىستەن كەيىن وتكىزەتىن العاشقى جەكپە-جەگىنىڭ مەرزىمى بەلگىلى بولدى. بۇل تۋرالى بوكسشىنىڭ ءباسپاسوز قىزمەتى حابارلادى.
جامبىل وبلىسىنىڭ تۋماسى فيرۋزا ءشارىپوۆا اۋەسقوي بوكستا وتە تابىستى ونەر كورسەتكەن, تاجىريبەلى بوكسشىلارىمىزدىڭ ءبىرى. ول 2012 جانە 2013 جىلدارى 60 كيلو سالماقتا قازاقستان بىرىنشىلىگىندە توپ جارسا, كەلەسى جىلى كۇمىس جۇلدەگەر اتانعان. سونىمەن قاتار 2012 جىلى ازيا چەمپيوناتىنىڭ جارتىلاي فينالىنا دەيىن جەتكەن بولاتىن.
وسىنداي تابىستى جەتىستىگىنەن سوڭ جەرلەسىمىز 2016 جىلى كاسىپقوي بوكسقا اۋىسىپ, 2019 جىلعا دەيىن 11 جەكپە-جەك وتكىزدى. 10 كەزدەسۋىندە قارسىلاستارىنان باسىم تۇسسە, تەك ءبىر ايقاسىندا رەسەيلىك بوكسشى سوفيا وچيگاۆادان جەڭىلگەن ەدى.
سول كەتكەن ەسەنى قايتارۋ ءۇشىن ءشارىپوۆا 19 ماۋسىمدا سوفيا وچيگاۆاعا قارسى شارشى الاڭعا شىقپاق. ەكى بوكسشى اراسىنداعى جەكپە-جەك 58,9 كيلو سالماق دارەجەسىندە وتەدى جانە 10 راۋندقا جوسپارلانعان. جەڭىسكە جەتكەن بوكسشى IBA بەلبەۋىن يەلەنەدى.
ايتا كەتەيىك, وتكەن جىلدىڭ قىركۇيەك ايىندا ءشارىپوۆا كارەراسىن اياقتاعانىن حابارلاعان بولاتىن. ال كۇنى كەشە ۇلكەن سپورتقا قايتا ورالعانىن مالىمدەدى.