حالىقارالىق كونكيمەن جۇگىرۋشىلەر وداعى (ISU) مانەرلەپ سىرعاناۋدان 2020 جىلعى الەم چەمپيوناتىن وتكىزبەۋ تۋرالى شەشىم قابىلدادى. بۇل تۋرالى ISU رەسمي سايتىندا جازىلدى دەپ حابارلايدى Olympic.kz.
مانەرلەپ سىرعاناۋدان الەم چەمپيوناتى 16-22 ناۋرىز ارالىعىندا كانادانىڭ مونرەال قالاسىندا ءوتۋى ءتيىس بولاتىن. الايدا, COVID-19 ىندەتىنىڭ ورشۋىنە بايلانىستى الەمدىك وداق جارىستى بەلگىسىز مەرزىمگە شەگەرگەن بولاتىن.
«ISU ونلاين وتىرىس كەزىندە 2020 جىلعى الەم چەمپيوناتتارىن وتكىزبەۋ تۋرالى ورتاق شەشىمگە كەلدى. ويتكەنى, اتالعان تۋرنيرلەردى كەيىنگە قالدىرۋ بۇدان ءارى مۇمكىن ەمەس. ال 2021 جىلعى ماۋسىمعا كەلەر بولساق, كوروناۆيرۋسقا قاتىستى جاعداي رەتتەلمەگەن سوڭ, ءالى شەشىم شىعارۋعا ەرتە. سول سەبەپتى, ءبىز 28 ءساۋىر كۇنى تاعى ونلاين جينالىس وتكىزەمىز», - دەلىنگەن حابارلامادا.