ايەلدەر اراسىنداعى تانىمال قازاقستاندىق كاسىپقوي بوكسشى فيرۋزا ءشارىپوۆا ۇلكەن سپورتقا قايتا ورالعانىن مالىمدەدى. ول بۇل تۋرالى ءوزىنىڭ الەۋمەتتىك جەلىدەگى پاراقشاسىندا حابارلادى.
وتانداسىمىز بىلتىر قىرقۇيەك ايىندا چەمپيوندىق جەكپە-جەگىنە دەمەۋشى بولماعاندىقتان ۇلكەن سپورتپەن قوشتاساتىنىن مالىمدەگەن-ءدى. ارادا التى ايدان استام ۋاقىت وتكەندە ول قايتا كاسىپقوي بوكستا باق سىناعىسى كەلەتىنىن جەتكىزدى.
ءشارىپوۆا ءوزىنىڭ Instagram پاراقشاسىندا سوفيا وچيگاۆاعا قارسى وتكەن كاسىپقوي بوكستاعى العاشقى جەكپە-جەگىنىڭ افيشاسىن جاريالاپ, «رەسمي! مەن ورالدىم! رەۆانش قالايسىزدار ما؟» دەگەن جازبا قالدىردى. سول جەكپە-جەكتە وتانداسىمىز تورەشىلەردىڭ ءبىراۋىز شەشىمىمەن جەڭىلگەن بولاتىن.
ەسكە سالا كەتسەك, ءشارىپوۆا كارەراسىن اياقتاعانعا دەيىن 61,2 سالماق دارەجەسىندە WIBA جانە WBU بەلبەۋلەرىنىڭ يەسى اتانعان.