ۇزدىكتەر باسەكەگە قابىلەتتىلىكتەرىن دالەلدەدى
ء“بىلىم – ينەمەن قۇدىق قازعانداي” دەگەن. جاستاردىڭ وسى باعا جەتكىسىز اسىل قۇندىلىققا دەگەن ىنتا-ىقىلاسى جالپى ءبىلىم بەرەتىن پاندەر بويىنشا وتكەن وليمپيادادا جاڭا قىرىنان تانىلدى. وعان اۋداندىق, قالالىق وسىنداي سىننان وتكەن 518 شاكىرت قاتىسىپ, باق سىنادى.
وبلىستىق وليمپيادا تالدىقورعان قالاسىندا العاش رەت ۇيىمداستىرىلدى. بۇرىن الماتى قالاسىنداعى وبلىستىق ينتەرناتتا وتكىزىلەتىنىن ەسكەرسەك, شالعاي اۋىلدان كەلگەن جاس جەتكىنشەكتەردىڭ شاھاردىڭ بۇگىنگى مادەني جانە رۋحاني دامۋىمەن جان-جاقتى تانىسۋىنا مۇمكىندىك تۋعىزىلعانى دا قۇپتارلىق.
وتكەن جىلى ءوڭىردىڭ دارىندى تۇلەكتەرى رەسپۋبليكا دەڭگەيىندە “ەڭ ۇزدىك وليمپيادالىق كوماندا” اتاعىنا يە بولىپ, ەلىمىزدىڭ نامىسىن حالىقارالىق وليمپيادالاردا جوعارى ۇستاپ, 96 مەدالعا قول جەتكىزگەن-ءدى. وسى ورايدا ولارعا ءبىلىم بەرگەن ۇستازداردىڭ ەڭبەگى ەرەن دەۋگە بولادى.
– كوبىنە جۇرتشىلىق مۇناي مەن گازدى بايلىق دەيدى. جاستاردىڭ بىلىمدىلىگىنەن وتكەن بايلىق جوق ەكەنىن ۋاقىت ءدالەلدەۋدە. جاستار – قوعامنىڭ قوزعاۋشى كۇشى, ەلىمىزدىڭ دامۋىنا, قالىپتاسۋىنا, گۇلدەنۋىنە قوساتىن ۇلەستەرى ۇلكەن. ءبىلىم سايىسىنا ءۇمىت ارتار ۇلاندار قاتىسۋدا. جاستاردىڭ الداعى جولى اشىق بولسىن, دەگەن ءتىلەگىن قازىلار القاسىنىڭ ءمۇشەسى, دوتسەنت س.قوجاعۇلوۆ ورتاعا سالدى.
وليمپياداعا تۇلەكتەردى قاتىستىرۋدا تالدىقورعان قالاسى العاشقى ورىندا بولىپ, 118 وقۋشى بىلىمدەرىن سىناسا, قاپشاعايلىقتار 51 شاكىرتىن شىڭداپ, ۇمىتتەرىن ۇكىلەپتى. ال الاكول اۋدانى, تالدىقورعان قازاق-تۇرىك, №20 ءۇش تىلدە وقىتىلاتىن دارىندى بالالارعا ارنالعان, الماتى قازاق-تۇرىك قىز بالالار, ەسىك قازاق-تۇرىك ليتسەيلەرى مەن ج.سماعۇلوۆ اتىنداعى وبلىستىق مەكتەپ-ينتەرناتتى ەرەكشە اتاۋعا بولادى. “دارىن” اۋىسىم مەكتەبىنەن سايىسقا قاتىسقان 60 وقۋشى تەرەڭ بىلىمدەرىن ناقتىلادى. ال, دانەش راقىشەۆ اتىنداعى №3 مەكتەپ-ينتەرنات قابىرعاسىندا وتكەن باسەكەدە 15 ءپان بويىنشا باق سىناعان شاكىرتتەر بىلىمدەرىن ورتاعا سالسا, قازىلار قۇرامىندا جەتەكشى ۋنيۆەرسيتەتتەردىڭ عالىمدارى مەن وقىتۋشىلارى بولعانى دا تالاپ پەن تالعامنىڭ جوعارى ەكەندىگىن كورسەتتى.
بايقاۋدا مەملەكەتتىك تىلگە دەگەن قىزىعۋشىلىعىمەن تانىلعان وزگە ۇلت بالالارىنىڭ قابىلەت-قارىمى دا جوعارى. ءماسەلەن, قاراتال اۋدانىنداعى كەمەل توقاەۆ اتىنداعى مەكتەپ پەن ەسىك قالاسىنان كەلگەن شاكىرتتەردىڭ ءتىلدى بىلۋگە دەگەن پەيىلدەرى ەرەكشە بولدى. شاكىرتتەر ۇلت قۇندىلىعى ماقال-ماتەلدى تالداپ, مەملەكەتتىك تىلدە وزدەرىنىڭ ويىن ەركىن جەتكىزۋىمەن ەرەكشەلەندى. بىرىنەن ءبىرى اسىپ تۇسكەندەر ابايدىڭ, جامبىلدىڭ, ءىلياستىڭ, مۇقاعالي سىندى جىر دۇلدۇلدەرىنىڭ ولەڭدەرىن مانەرلەپ, جاتقا وقىپ, باسەكەدەن سۇرىنبەدى. ارينە, جۇزدەن جۇيرىك شىققاندارمەن قاتار دايىندىعى جەتكىلىكسىزدەرى دە كەزدەستى. دەيتۇرساق تا, وليمپيادادا وقۋشىلاردىڭ قازاق ءتىلىن بىلۋگە, ەركىن سويلەۋگە دەگەن تالاپتارىن قازىلار دا ەرەكشە باعالادى.
ءبىلىمى مەن بىلىگى دارالانعان وليمپيادا جەڭىمپازدارى 45 التىن, 90 كۇمىس, 135 قولا مەدالدى ەنشىلەگەن شاكىرتتەر ۇستازدارى مەن التىن ۇيا مەكتەپتەرىنىڭ ابىرويىن اسىردى. وسى جەڭىمپاز وقۋشىلارعا “ۇزدىك وليمپيادالىق كوماندا – 2010” اتاعى بەرىلدى.
وليمپياداعا سۋ تاسقىنىن باسىنان وتكەرگەن قىزىلاعاش اۋىلىنان ەكى وقۋشى قاتىستى. ولار 9 سىنىپ وقۋشىلارى ماليكا تۇشپاروۆا مەن دامير انيتوۆ ەدى. تاريح پانىنەن ءبىلىم دەڭگەيىن سىناعان ماليكا ءجۇلدەلى ورىنعا قول جەتكىزىپ, قۇربىلارىنىڭ قۋانىشىنا بولەندى. ءبىلىم سايىسىندا باق سىناپ, جۇلدەلى ورىنداردان تانىلعان جەڭىمپازداردىڭ جۇمىستارى رەسپۋبليكالىق “دارىن” ورتالىعىنا جىبەرىلسە, ولاردان وبلىستىق كوماندا قۇرىلىپ, رەسپۋبليكالىق ءپان وليمپياداسىندا ولار جەتىسۋدىڭ نامىسىن قورعايتىن بولدى.
تاعى ءبىر قۋانىشتى جايت, اعىمداعى جىلدىڭ شىلدە ايىندا استانادا اشىلاتىن جاڭا ۋنيۆەرسيتەتكە ستۋدەنتتەردى قابىلداۋ بارىسىمەن وقۋ ورنىنان ارنايى كەلگەن وكىلدەر تانىستىردى. ەلدىڭ بولاشاق ەليتاسىن قالىپتاستىرۋدى ماقسات ەتكەن مەملەكەت باسشىسى نۇرسۇلتان نازارباەۆتىڭ تاپسىرماسىمەن حالىقارالىق دەڭگەيدەگى العاشقى ۋنيۆەرسيتەتكە تەك ۇزدىك ءبىلىم دەڭگەيىن دالەلدەگەن وقۋشىلار قابىلداناتىنىن ەسكەرسەك, ولاردىڭ قاتارىن بۇگىنگى توپ جارعان تۇلەكتەر تولىقتىراتىنى داۋسىز.
التىننان القا تاققان ءۇزدىكتەر وزدەرىنىڭ وسى ۋنيۆەرسيتەت ستۋدەنتى بولۋعا ىنتالى ەكەندىكتەرىن دالەلدەپ, قانداي سىناقتاردان ءوتۋ قاجەتتىگىمەن جەتە تانىسىپ جاتتى.
كۇمىسجان بايجان.
الماتى وبلىسى.