قىتايدا باستالعان كوروناۆيرۋس ىندەتى بارلىق سپورتتىق جارىستارعا توقتاۋ سالدى. ەندىگى كەزەك سەمسەرلەسۋ سپورتىنا دا كەلىپ جەتتى. حالىقارالىق سەمسەرلەسۋ فەدەراتسياسى (FIE) 2020 جىلدىڭ ءساۋىر, مامىر جانە ماۋسىم ايىنا دەيىنگى جارىستاردى كەيىنگە شەگەردى دەپ جازادى Olympic.kz.
«بىرنەشە ايدان بەرى Covid-19 ىندەتى بۇكىل الەمدى اياعىنان تىك تۇرعىزدى. بارلىق سپورتشىلاردى, فەدەراتسيالار مەن سەمسەرلەسۋ سپورتىنىڭ جانكۇيەرلەرىن دۇنيەجۇزىلىك دەنساۋلىق ساقتاۋ ۇيىمى مەن ءوز ەلدەرىڭىز ۇسىنعان نۇسقاۋلىقتاردى ساقتاۋعا شاقىرامىن. حالىقارالىق وليمپيادا كوميتەتى توكيو ويىندارىنىڭ مەرزىمىن اۋىستىرعان سوڭ, FIE اتقارۋشى كوميتەتى دە باسەكەلەردى كەيىنگە شەگەرۋگە شەشىم قابىلدادى», دەلىنگەن FIE پرەزيدەنتى اليشەر ۋسمانوۆتىڭ جازباسىندا.
الەمدەگى احۋالدى ەسكەرە وتىرىپ, FIE ءساۋىر, مامىر جانە ماۋسىم ايلارىنا جوسپارلانعان تۋرنيرلەردى وتكىزبەيدى. 2020 جىلدىڭ ناۋرىز ايىنا دەيىنگى ناتيجەلەر مەن ىرىكتەۋ سىندارىنداعى ۇپايلار ساقتالادى. وليمپياداعا ىرىكتەۋ تۋرنيرلەرى قايتا باستالعان سوڭ, رەيتينگ دە ىسكە قوسىلماق.
ەرلەر مەن ايەلدەر اراسىنداعى الەم كۋبوگىنىڭ ءتورت كەزەڭى كەيىنگە شەگەرىلدى. اتالعان باسەكەلەر كوروناۆيرۋسقا قاتىستى جاعداي رەتتەلگەن سوڭ وتكىزىلەتىن بولادى.