اتى جامان اۋرۋ كۇن سايىن ءورشىپ كەلەدى. ازىرگە ىندەت تۋرالى سۋىت حابار سۇيىلماي تۇر.
دارىگەرلەردىڭ ايتۋىنشا, ۆيرۋس جۇقتىرعان ازاماتشا 25 جاستاعى قالا تۇرعىنى. ول وسىدان ەكى كۇن بۇرىن قاتەرلى ىندەت انىقتالعان 22 جاسار قالا تۇرعىنىمەن بايلانىستا بولعان. 24 ناۋرىز كۇنى ناۋقاس وتباسىلىق ءىس-شاراعا بارعان. ول جەرگە الماتىدان قوناقتار كەلىپتى. بارلىعى 6 ادام بايلانىستا بولعان. ونىڭ تورتەۋى ءۇي كارانتينىنە قالدىرىلدى.
ەكىنشى ۆيرۋس جۇقتىرۋ جاعدايى تسەلينوگراد اۋدانىندا انىقتالدى. ول بولاشاق انا. ازاماتشا بۇعان دەيىن كارانتيندىك ستاتسيوناردا جاتقان. الەۋمەتتىك قىزمەت كورسەتۋ ورتالىعىندا سانيتار بولىپ جۇمىس ىستەگەن. ءبىر ءسۇيىنىشتىسى, وبلىستىق تۋبەركۋلەزگە قارسى كۇرەس ديسپانسەرىندە 4 ناۋقاس قاتەرلى ىندەتتەن ەمدەلىپ, اۋرۋحانادان شىعارىلدى. دەرتتەن ايىققان ناۋقاستار قايتادان تەكسەرۋدەن وتكىزىلىپ, كەشە كەشكە ۇيلەرىنە قايتارىلدى. ولاردىڭ بارلىعى تسەلينوگراد اۋدانىنا قاراستى قوسشى اۋىلىنىڭ تۇرعىندارى.
وكىنىشكە وراي, 4 ادام قايتىس بولدى. بۇگىنگى كۇنى وبلىستىڭ ستاتسيونارلارىندا 364 پاتسيەنت ەم الىپ جاتىر, ءۇي كارانتينىندە-554 ادام.