بيىلعى قاردىڭ كوپتىگىنە قاراعاندا سولتۇستىكتە تاسقىن سۋى قاتتى بولار دەگەن ابىگەر كوپ بولعان ەدى. بىراق ايتەۋىر, تىم بولماسا وسى تاراپتاعى قىسىم ءبىرشاما تومەن.
دەگەنمەن, تج دەپارتامەنتىنىڭ قىزمەتكەرلەرى ارقاشاندا قىراعى قالپىندا. ولاردىڭ سوڭعى مالىمەتتەرىنە قاراعاندا ءوڭىردىڭ وڭتۇستىك-باتىس اۋماقتارىنداعى جاعداي ءبىرشاما كۇردەلى. شارىق, جەمباراق وزەندەرىنىڭ سۋلارى چيستوپولە مەن رۋزاەۆكا اۋىلدارىنىڭ شەتكى ۇيلەرىنە جەتىپ قالعان. بىراق ۋاقىتىنندا جەتكىزىلگەن ينجەنەرلىك تەحنيكالاردىڭ كۇشىمەن سۋدىڭ باعىتى وزگەرتىلىپ, اعىس جولدارى تازالانىپ, اپاتتىڭ الدى الىندى.
تاۋلىك بويى ءۇزىلىسسىز جۇرگىزىلگەن جۇمىستاردىڭ ناتيجەسىندە تيميريازەۆ اۋدانىنداعى اۋىلداردى دا سۋ باسۋ قاۋپى جوعالدى. مۇندا موتوپومپالاردىڭ كۇشىمەن قار سۋلارى جايىلىپ, قاتەرى تومەندەتىلدى. بۇل باعىتتاعى قۇتقارۋ جۇمىستارىنا تج دەپارتامەنتىنىڭ 53 قىزمەتكەرى جانە جەرگىلىكتى بيلىك ورگاندارىنىڭ 50 مامانى قاتىستىرىلدى. قازىر ايىرتاۋ مەن ع.مۇسىرەپوۆ اۋداندارىنداعى شاعىن وزەندەر سۋلارىنىڭ دا كوتەرىلۋى دەڭگەيى تومەندەدى. ەندى بارلىق نازار سەرگەەۆ سۋ قويماسىنا اۋعان.
قارعىن سۋى باستالعاننان بەرى وبلىس اۋماعىنداعى رەسپۋبليكالىق, جەرگىلىكتى ماڭىزى بار 40 جولدى سۋ شايعان ەدى. قازىر سونىڭ 36 قالپىنا كەلتىرىلدى. وبلىستىڭ بارلىق گيدروتەحنيكالىق قۇرىلىستارى قالىپتى جاعدايدا جۇمىس ىستەۋدە. وسىدان ەكى كۇن بۇرىن وبلىستىق تج باستىعىنىڭ ورىنباسارى ن.اتىعاەۆ سەرگەەۆ سۋ قويماسىنداعى سۋ دەڭگەيىنىڭ كوتەرىلۋى 165 سم دەگەن ەدى, سوڭعى اقپارات ونىڭ تاعى بەس سم-گە تومەندەگەنىن جەتكىزدى. بۇل قويماداعى سۋدىڭ ەڭ جوعارى كوتەرىلگەن رەكوردى 2017 جىلى بولعان. وندا سۋ 332 سم-گە كوتەرىلگەن. ال بيىل ەڭ كوبى 195 سم-عا كوتەرىلدى.
الايدا ەسىلدىڭ قىزىلجار قالاسىنىڭ تۇبىندەگى قاۋپى ءالى دە زور. سونىڭ كەسىرىنەن قالا ماڭىنداعى زارەچنىي كەنتىندەگى ۇيلەر مەن ميچۋرينو جانە پريبرەجنوە اۋىلىنا باراتىن جولدار شايىلۋى مۇمكىن.
سولتۇستىك قازاقستان وبلىسى