حالىقارالىق فۋتبول فەدەراتسياسىنىڭ (فيفا) ۆيتسە-پرەزيدەنتى ۆيكتور مونتالياني بيىل فۋتبولدان ۇلتتىق قۇرامالار كوروناۆيرۋس پاندەمياسىنا بايلانىستى ماتچ وتكىزە الماۋى مۇمكىن ەكەنىن ايتتى.
«مەنىڭشە, بيىل ماتچتاردى جالعاستىرۋ قيىنعا سوعاتىن سياقتى. قازىر الەم دەنساۋلىعى مەن وعان دايىندىق دارەجەسىنىڭ ءارتۇرلى بولۋىنا بايلانىستى حالىقارالىق ساپارلارعا قاشان ورالاتىنىمىز بەلگىسىز. قىركۇيەك ايىندا ماتچ وتكىزەمىز دەگەن جوسپار بار, بىراق بۇعان سەنىمدى ەمەسپىز.
سونىمەن قاتار العاشقى ماتچتاردى جانكۇيەرلەرسىز وتكىزۋدى دە كوزدەپ وتىرمىز. بىراق بۇل وتە تاۋەكەلدى قادام بولماق. بالكىم باسقا سالالار سياقتى فۋتبولعا دا كەزەڭ-كەزەڭىمەن كەلەتىن شىعارمىز. دەسە دە 2021 جىلدىڭ ناۋرىز ايىنا دەيىن ءبارى قالىپقا كەلەدى دەگەن ويدامىز. ءبىز قازىر ەڭ باستىسى ۇلتتىق بىرىنشىلىكتەردى جالعاستىرۋدى ويلاستىرۋىمىز كەرەك. ال ۇلتتىق قۇرامالاردىڭ ويىندارىن كەيىن قاراستىرا بەرەمىز», دەيدى ول.
بۇعان دەيىن فيفا-نىڭ جۇمىس توبى كوروناۆيرۋسقا بايلانىستى ۇلتتىق قۇرامالاردىڭ ويىندارىن ماۋسىمعا دەيىن شەگەردى. سونداي-اق ەۋروپا چەمپيوناتى مەن امەريكا كۋبوگىن كەلەسى جىلعا اۋىستىرعان بولاتىن.
ەگەر بيىل ۇلتتىق قۇرامالار ماتچ وتكىزبەيتىن بولسا قازاقستان قۇراماسى كۇزدە باستالاتىن ۇلتتار ليگاسى دوداسىنا قاتىسا المايدى. سونىمەن قاتار ۇلتتىق قۇراما وسىمەن تاريحتا ءۇشىنشى رەت جىل بويى ماتچ وتكىزبەۋى مۇمكىن. ەلىمىزدىڭ باستى قۇراماسى ەڭ العاش 1993 جىلى فيفا قۇرامىنا ەنبەگەن سوڭ ماتچ وتكىزە الماعان-دى. ال قازاقستان فيفا-عا 1994 جىلى مۇشە بولدى. جانە دە 1999 جىلى دا قازاقستان قۇراماسى جاسىل الاڭدا ونەر كورسەتپەگەن.