وتىز جىلدىققا ونلاين كونتسەرت

چاپاەۆ كەنتىندە ماقسوت پەن دينا حاسانوۆتاردى ۇلكەن-كىشى جاقسى بىلەدى. ماقسات اعا ەڭبەك جولىن چاپاەۆ اۋداندىق مادەنيەت ۇيىنەن باستاعاندا, دينا اپاي اۆتوكلۋب مەڭگەرۋشىسى ەكەن. سوناۋ 1973 جىلى وتاۋ كوتەرگەن ونەرلى جاستار وسىدان 30 جىل بۇرىن وتباسىلىق انسامبل قۇرىپ, سودان بەرى حالىق الدىندا ونەر كورسەتىپ كەلەدى.

شاعىن عانا وتباسىلىق ۇجىمنىڭ قول جەتكىزگەن جەتىستىكتەرى وتە كوپ. 1977 جىلى قازان توڭكەرىسىنىڭ 60 جىلدىعىنا ارنالعان حالىقارالىق فەستيۆالدىڭ لاۋرەاتى اتانسا, 1985 جىلى ۇلى جەڭىستىڭ 40 جىلدىعىنا ارنالعان وتباسىلىق انسامبلدەر سايىسىندا دا جۇلدەگەر قاتارىنان كورىندى. بولگاريا, رۋمىنيا ەلدەرىندە, ماسكەۋ, كيشينەۆ قالالارىنىندا وتكەن حالىقارالىق فەستيۆالدا وبلىستىق «اقجايىق» ءانسامبلىنىڭ قۇرامىندا ونەر كورسەتىپ, تالانتىمەن تالايدى تامساندىردى.

«ۇيادا نە كورسەڭ, ۇشقاندا سونى ىلەسىڭ» دەمەي مە؟ ونەرلى وتباسىندا تۋعان التى بالانىڭ تورتەۋى بۇگىندە ونەر سالاسىندا قىزمەت ەتىپ ءجۇر. سونىڭ ىشىندە جاڭىلسىن حاسانوۆانىڭ ورنى بولەك. 1997 جىلى وبلىستىق «جاس قانات» بايقاۋىندا ء«اليا» ءانىن ورىنداپ, جۇلدەلى I-ءشى ورىندى جەڭىپ العان جاڭىلسىندى اقجايىقتىقتار ء«بىزدىڭ ءانشى روزامىز» دەپ اتاپ كەتتى. ودان كەيىن دە جاڭىلسىن تالاي ساحنادا توپ جاردى. ەسكەندىر حاسانعاليەۆ اتىنداعى رەسپۋبليكالىق «اتامەكەن» بايقاۋىنىڭ I ورىن يەگەرى, حالىقارالىق «شابىت» فەستيۆالىنىڭ ديپلومانتى اتاندى. 2006 جىلى رەسپۋبليكالىق «جاس قانات» بايقاۋىندا II-ءشى جۇلدەلى ورىندى جەڭىپ الىپ, «كۇمىس قانات» بەلگىسىنە يە بولدى. 2006 جىلى قازاقستان رەسپۋبليكاسى پرەزيدەنتىنىڭ جارلىعىمەن قازاقستان رەسپۋبليكاسىنىڭ قۇرمەت گراموتاسىمەن ماراپاتتالىپ, 2012 جىلى «ەرەن ەڭبەگى ءۇشىن» مەدالىنە يە بولدى.

ال جاڭىلسىنمەن تەتە وسكەن قايرات بۇگىندە مادەني-دەمالىس ورتالىعىنىڭ باعدارلاماشىسى, حالىقتىق ۇلت-اسپاپتار وركەسترىندە داۋىلپازدى باسقارادى.

اۋلەتتىڭ بەسىنشى پەرزەنتى اسحات قۇرمانعازى اتىنداعى قازاق ۇلتتىق كونسەرۆاتورياسىن ۇزدىك بىتىرگەن ونەر يەسى. قازىر باتىس قازاقستان وبلىستىق كامەرلىق وركەسترىندە باس ديريجەر بولىپ قىزمەت ەتەدى.

ال, ءۇيدىڭ كەنجەسى مەدەت كەزىندە اتا-اناسى ەڭبەك ەتكەن جايىق اۋىلدىق كلۋبىندا كينومەحانيك, مۋزىكانت بولىپ قىزمەت ەتەدى. انشىلىك ونەرى دە ەشكىمنەن كەم ەمەس.

مىنە, ونەرلى شاڭىراق كارانتيندە قامالىپ جاتقان كورەرمەندەرىنە ارناپ كەرەمەت كونتسەرت جولداپتى. الدىمەن ماقسوت اعا مەن دينا اپاي ءسوز الىپ, الەمدى ابىگەرگە سالعان ىندەت كەزىندە قاۋىپسىزدىك ساقتاۋ, ۇيدە وتىرۋ قاجەت ەكەندىگىن ايتىپ, كورەرمەنگە سابىر مەن ساقتىق تىلەدى. ودان كەيىن بايان ۇنىنە قوسىلىپ جەرگىلىكتى سازگەر راقىم جانايىسوۆتىڭ «اتامەكەنگە ساعىنىش» ءانى اۋەلەدى. گيتارا, كونتراباس, سكريپكا, دومبىرا اسپاپتارى ارالاسقان ادەمى كونتسەرتكە اۋلەتتىڭ كەلىندەرى مەن نەمەرەلەر دە اتسالىستى. وسىلايشا, وتباسىلىق ءانسامبلدىڭ وتىزجىلدىق مەرەيتويى ونلاين كونتسەرتىمەن ەستە قالدى.

باتىس قازاقستان