باتىس قازاقستاندا دارىگەرگە ۆيرۋس جۇقتى

- 49 جاستاعى ناۋقاس پروۆيزورلىق ستاتسيوناردا مەديتسينالىق قىزمەتكەر بولىپ جۇمىس ىستەيدى. قازىرگى تاڭدا ناۋقاستىڭ جاعدايى قاناعاتتانارلىق. وبلىستىق جۇقپالى اۋرۋلار اۋرۋحاناسىنا جەكە بوكسقا ورنالاستىرىلدى. بەكىتىلگەن حاتتاماعا سايكەس ەم قابىلداپ جاتىر, - دەدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى مۇحامعالي ارىسپاەۆ.

ارناۋلى قاۋلىعا سايكەس COVID-19 جۇقتىرۋ قاۋپى جوعارى مەديتسينالىق قىزمەتكەرلەر تۇراقتى تەكسەرىلىپ تۇرادى. اتالعان قىزمەتكەر دە 9 ءساۋىر كۇنى بولعان تەكسەرىستە ساۋ بولعان. الايدا 12 ءساۋىر كۇنى وتكىزىلگەن دياگنوستيكالىق زەرتتەۋ ناتيجەسى ونىڭ بويىنان COVID-19 دياگنوزىن انىقتاعان.

- ءبىز ناۋقاسپەن جاقىن قارىم-قاتىناستا بولعان 7 ادامدى انىقتاپ, زەرتحانالىق زەرتتەۋ جۇرگىزدىك. 6 ادامنان ۆيرۋس تابىلمادى, جەتىنشىسىنىڭ زەرتتەۋ ناتيجەسىن كۇتىپ وتىرمىز. ولاردىڭ ءبارى دە بىرگە قىزمەت ەتەتىن ارىپتەستەر. «ۇلتتىق ساراپتاما ورتالىعى» فيليالىنىڭ ماماندارىمەن ناۋقاستىڭ پاتەرىنە, كىرەبەرىسى مەن ءۇيدىڭ ىرگەلەس اۋماعىنا قورىتىندى دەزينفەكتسيا جۇرگىزىلدى. ناۋقاس پاتەردە جالعىز تۇرعان. قازىر ءۇيدىڭ پودەزى كارانتينگە جابىلدى. بارلىق تۇرعىنداردى جاسالىپ جاتقان شارالارعا تۇسىنىستىكپەن قاراپ, كارانتين رەجيمىن قاتاڭ ساقتاۋدى سۇرايمىز, - دەيدى مۇحامعالي قايىرجان ۇلى.

باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆتىڭ ايتۋىنشا, كوروناۆيرۋس دەرتىنە شالدىققان ناۋقاستارمەن جاقىن جۇمىس ىستەيتىن دارىگەرلەر جەكە قورعانىش كيىمدەرىمەن تولىق جابدىقتالعان. ياعني ورالدىق دارىگەردىڭ ۆيرۋس جۇقتىرىپ الۋى ءوزىنىڭ ساقتىق شارالارىن تولىق ساقتاماۋىنان بولۋى مۇمكىن.

ايتا كەتەيىك, 29 ساۋىردەن بەرى باتىس قازاقستان وبلىسىندا كوروناۆيرۋس ىندەتىن جۇقتىرعان 9 ادام تىركەلدى. 1 ادام ۆيرۋستى اتىراۋ وبلىسىنان, 7 ادام رەسەي فەدەراتسياسى اۋماعىنان جۇقتىرىپ كەلگەنى انىقتالعان. ناۋقاستىڭ ءبىرى جازىلىپ, جاقىندا ۇيىنە شىقتى. قالعان 8 ناۋقاس وبلىستىق جۇقپالى اۋرۋلار اۋرۋحاناسىندا قاجەتتى ەم-دومىن الىپ جاتىر.

دارىگەرلەردىڭ ايتۋىنشا, ولاردىڭ بارلىعىنىڭ دا جاعدايى قاناعاتتانارلىق.

باتىس قازاقستان