توراڭقۇل كولى سولتۇستىك قازاقستانداعى ۇلكەن سۋ قويمالارىنىڭ ءبىرى. ونىڭ كولەمى 35 شارشى شاقىرىم. جازى-قىسى ونىڭ بويىندا بالىقشىلار قاپتاپ وتىرادى, ويتكەنى بالىعى مول, قازاقتىڭ قۇنارلى كولدەرىنىڭ ءبىرى.
قازىر مۇز ابدەن جۇقارعان, كەيبىر جەردلەردە ساتىرلاپ ءتۇسىپ, سەڭ ءجۇرىپ جاتىر. سوعان قاراماي بەس اشكوز بالىقشى كولدىڭ ورتاسىنا تامان بارىپ, بالىق اۋلاپ وتىرعاندارىندا مۇز ءتۇسىپ كەتكەن. سەڭدە قالعان بالىقشىلار جانۇشىرىپ, قۇتقارۋشىلاردى شاقىرادى. قۇدايعا شۇكىر, قازىر قالتافون بار, ايتپەسە قۇتقارۋشىلار ءاربىر بالىقشىنى اڭدىپ وتىرمايدى عوي.
كول جاعاسىنداعى كورنەەۆكا سەلوسىندا تۇراتىن قۇتقارۋشى ۆياچەسلاۆ ياكوۆلەۆ دابىل تۇسكەن بويىندا, بالىقشىلاردى قۇتقارۋ ءۇشىن موتورلى قايىعىن تراكتورمەن اكەلىپ, كولگە قويىپ كەتەدى. ال بالىقشىلاردىڭ سەڭى بۇل ۋاقىتتا جاعادان الىستاي بەرەدى. جاندارى مۇرىندارىنىڭ ۇشىنا كەلگەن بالىقشىلار ايعايلاپ, جان داۋىستارى شىعادى. شامامەن جارتى شاقىرىمداي جۇزگەندە عانا قايىق ولارعا جەتە الادى. تابيعاتتىڭ دۇلەي كۇشىمەن ارپالىس ءبىر جارىم ساعاتتاي ۋاقىتقا سوزىلادى. دەنەلەرى جەڭىل جاس ەمەس, 55 پەن 72 جاستىڭ اراسىنداعى قارتاڭ بالىقشىلاردىڭ قايىققا ءمىنۋى دە ءبىر قيامەت بولادى. ولار وزدەرىنىڭ سۋعا كەتكەنىمەن قويماي, قايىقتى دا باتىرىپ جىبەرە جازدايدى.
ايتەۋىر, 20 جىلدان بەرى قۇتقارۋشى بولىپ ىستەپ جۇرگەن ۆياچەسلاۆ ياكوۆلەۆ ولاردى تەگىس قايىققا وتىرعىزىپ, جاعاعا الىپ شىققان. اپاتتى جاعدايدى ەلەمەگەن اشكوز بالىقشىلاردىڭ وعان ايتار العىستارى شەكسىز.
سولتۇستىك قازاقستان وبلىسى