كارانتيننىڭ نەگىزگى تالابى – اسا قاجەتتىلىگى جوق بولسا ۇيدەن شىقپاۋ ەكەنىنە قاراماستان, بەي-بەرەكەتسىز قاڭعي بەرۋگە داعدىلانعاندار وتباسى, وشاق قاسىنا سيار ەمەس. پەتروپاۆل قالاسىندا سوڭعى التى كۇندە عانا سونداي 106 ادام ۇستالدى.
«ارينە, ءبىزدىڭ مىندەتىمىز – حاتتامانىڭ سانىن كوبەيتۋ ەمەس, ازاماتتاردىڭ قاۋىپسىزدىگىن ساقتاۋ. كارانتين جاعدايىندا كۇشەيتىلگەن رەجىممەن ساقشىلىق قىزمەت اتقارىپ جۇرگەن پوليتسەيلەردىڭ الدىنا سونداي مىندەت قويىلعان. الايدا قوعامدىق ورىنداردا بەتپەردەلەرى بولسا دا اراققا بوگىپ العاندار كەزدەسىپ قالادى. مىسالى, كەشە كەشكى ساعات توعىزدار شاماسىندا نازارباەۆ پەن شاجىمباەۆ كوشەلەرىنىڭ قيىلىسىندا 52 جاستاعى سونداي ادام كەزدەستى. وندايدى قالاي جىبەرەرسىڭ, نە ءوزى ارانداپ نەمەسە جول اپاتىنىڭ تۋىنا سەبەپكەر بولۋى مۇمكىن عوي. سوندىقتان ول ايىقتىرعىشقا جەتكىزىلدى. مۇندا ءۇستى-باسى ديزەنفەكتسيالانىپ, ەسىن جيناعانشا جاتادى. سوسىن, ارينە بۇزۋشىلىق جاساعانى ءۇشىن ءتيىستى جازاسىن الادى», دەيدى قالالىق جەرگىلىكتى پوليتسيا قىزمەتىنىڭ باستىعى ايدىن اقماعامبەتوۆ.
وبلىستىڭ ءتارتىپ ساقشىلارى قازىر كوشەدە جۇرگەن كەز كەلگەن ادامدى توقتاتىپ, ءجۇرىسىنىڭ نە سەبەبى بارىن انىقتاۋىنا قۇقى بار. تەك ءۇي ماڭىنداعى دۇكەندەر مەن دارىحانالارعا بارۋعا عانا رۇقسات بەرىلەدى. سونىمەن قاتار, ارينە جۇمىسقا باراتىندارعا رۇقسات. بىراق جۇمىسقا جۇرت تاڭەرتەڭگى مەزگىلدە بارىپ, كەشكە قايتادى عوي. ونىڭ ۇستىنە جۇمىس بەرۋشىلەردىڭ ءوز قىزمەتكەرلەرىن ارنايى كولىكپەن جەتكىزۋى مىندەتتەلگەن. سوندىقتان ۇيگە سىيماي, كوشە كەزىپ جۇرگەندەردىڭ «جۇمىسقا بارا جاتىر ەدىم» دەگەنىنە ەشكىم سەنبەيدى. كارى-قۇرتاڭ, اۋرۋشاڭ بىرەۋلەر بولماسا, قالعاندارىنا بىردەن ايىپپۇل سالىنادى. سونداي سىلتاۋ ايتىپ, كوشەدە كولىكپەن جۇرگەن تەحنيكالىق قىزمەت كورسەتۋ ستانتسياسىندا جۇمىس ىستەيتىن ەكى ادام دا ۇستالدى. راس, كارانتين كەزىندە قىزمەتتىڭ بۇل ءتۇرىن كورسەتۋگە رۇقسات ەتىلگەن, بىراق جۇمىس ۋاقىتى شەكتەلگەن. الايدا جۇمىس كۇنىنىڭ ءۇش ساعات بۇرىن اياقتالعانىنا قاراماستان بۇلار قالا بويىنشا جۇرۋلەرىن توقتاتپاعان. دەمەك, ولار كارانتين تالابىن بۇزۋشىلار قاتارىنا ەنگىزىلەدى.
پەتروپاۆل