كاسىپقوي بوكستان ورتا سالماقتاعى WBC (Franchise) جانە WBA (Super) بەلدىگىنىڭ يەگەرى, مەكسيكانىڭ ماقتانىشىنا اينالعان ساۋل «كانەلو» الۆارەس (53-2-1, 36 كو) وتانداسىمىز گەننادي گولوۆكينمەن (40-1-1, 35 كو) ءۇشىنشى جەكپە-جەكتى وتكىزۋگە دايىن ەكەنىن ايتتى. بۇل تۋرالى AS باسىلىمى FOX Sports تەلەارناسىنا سىلتەمە جاساي وتىرىپ حابارلادى.
الۆارەستىڭ سوزىنشە, جەكپە-جەكتىڭ ۋاقىتىن ايتپاستان بۇرىن, كوروناۆيرۋس پاندەمياسىنىڭ اياقتالعانىن كۇتۋ كەرەك. ويتكەنى ەكى بوكسشىنىڭ دا ايقاستارىن تىكەلەي ەفيردە كورسەتەتىن DAZN ستريمينگتىك سەرۆيسى بۇكىل ترانسلياتسيالارىن شىلدەگە دەيىن توقتاتقان.
«مەن بۇگىنگە دەيىن گولوۆكينمەن 24 راۋند جۇدىرىقتاستىم. ەگەر, بيزنەس تۇرعىسىنان قارايتىن بولساق, ءۇشىنشى ايقاس مەن ءۇشىن وتە پايدالى دەپ ەسەپتەيمىن. دەگەنمەن جەكپە-جەك تۋرالى ايتۋعا ءالى ەرتە. سەبەبى قازىر بارلىعى پاندەمياعا بايلانىستى توقتاپ تۇر. بىزدەن تالاپ ەتەتىن بىردەن-ءبىر نارسە, وسى جاعدايدىڭ اياقتالعانىن كۇتۋ», دەيدى ول.
ەسكە سالا كەتەيىك, گولوۆكين مەن الۆارەس شارشى الاڭدا ەكى رەت كەزدەسكەن. 2019 جىلعى ءبىرىنشى ايقاس تەڭ ناتيجەمەن اياقتالعان بولسا, ءبىر جىلدان كەيىنگى ەكىنشى كەزدەسۋدە «كانەلو» تورەشىلەر شەشىمى بويىنشا جەڭىسكە جەتكەن-ءدى.