پەتروپاۆلدا جامان ىندەت شارپىعان جاندار ءبىرىنشى قالالىق اۋرۋحانانىڭ ينفەكتسيا بولىمىنە ورنالاستىرىلعان. جۋىردا وعان وبلىس اكىمى بارىپ, وكپەنى جاساندى جولمەن تازارتاتىن بەس جاڭا اپپارات سىيلاعانىن جازعان بولاتىنبىز. ينفەكتسيالىق بولىمشەنىڭ مەديتسينالىق قىزمەتكەرلەرى جانكەشتىلىكپەن ارەكەت ەتىپ جۇرگەندەرى بەلگىلى. سونىڭ ارقاسىندا ءولىم-ءجىتىم جوق, كەرىسىنشە ءبىر جاس ايەل ەمدەلىپ, كەشە اۋرۋحانادان شىقتى.
بۇل پەندەشىلىك دەگەندى قويساڭىزشى, سول, 1993 جىلى تۋعان ايەل مەنىڭ دەرەكتەرىمدى ايتىپ قويدىڭدار, بارلىق الەۋمەتتىك جەلىلەرگە اتىم شىعىپ كەتتى, مەن سەندەردى سوتقا بەرەمىن دەپ تۇلدانىپ كەتىپتى. ءولىپ قالعاندا بەلگىلى بولماي, ءتىرى قالعانىندا بەلگىلى بولعانى وعان «قيىن» ەكەن...
ەندى اتى جامان ىندەتپەن تىكەلەي كۇرەسىپ جۇرگەن جاندار تۋرالى ايتا كەتەيىك. قاراپايىمدىلىقتارى شىعار, بولىمشەگە حابارلاسقان ەدىك, ءبىز ەشتەڭە دە ايتپايمىز دەپ ولار اۋرۋحانانىڭ باس دارىگەرىنىڭ تەلەفونىن عانا بەرە الدى. باس دارىگەر بوتاگوز سۇلەيمەنوۆا: «مەن ولاردىڭ ءبىرىن جاقسى, ءبىرى جامان ەڭبەك ەتىپ جاتىر دەپ ايتا المايمىن, ءبارى دە ءوز مىندەتتەرىن ادال اتقارۋدا. دارىگەرلەردى ايتاتىن بولسام, ولار: عاليا سىزدىقوۆا, ايناگۇل قاسىباەۆا, اۋباكىر وماراليەۆ, مەدبيكەلەر شتول, شيروچەنكو, پوبەرەجنيك, سەرگەەۆا. ءبارى دە ءوز ىستەرىنە بەرىلگەن, ادال قىزمەت جاسايتىن جاندار. سولاردىڭ ىشىندە مەدبيكە ليدا سەرگەەۆانىڭ بەلسەندىلىگى ءتىپتى جوعارى. ال بولىمشەنىڭ سانيتار – تازالىقشىلارى ايتماعامبەتوۆا, قادىروۆا, روجكوۆا, باجەنوۆا, لۋتسەنكولار. بۇلار دا تەك ماقتاۋعا لايىقتى قىزمەتتەر جاساۋدا», دەدى.
قازىر بولىمشەدە 24 ناۋقاس بار. دەرتتىڭ بەتى قاتتى بولىپ بارا جاتسا, دەرەۋ وكپەنى جاساندى جولمەن تازالايتىن اپپاراتقا جاتقىزىلادى. ال ەمدەۋ ادىستەرى رەسپۋبليكالىق مامانداردىڭ انىقتاعان ادىستەرىمەن جاسالۋدا. وعان قاجەتتى بارلىق ءدارى-دارمەكتەر جەتكىلىكتى. ناۋقاسقا تۇسكەنىنەن باستاپ 14 تاۋلىكتەن كەيىن ساراپ جاسالادى. ەگەر ينفەكتسيا جوعى انىقتالسا, دەرەۋ ءۇستى-باسى تولىقتاي دەزينفەكتسيالانىپ, ۇيىنە ارناۋلى كولىكپەن جەتكىزىلەدى.
ال دارىگەرلەر, مەدبيكەلەر جانە تازالىقشىلار ۇيلەرىنە جىبەرىلمەيدى. ءبىر كۇندىك اۋىسىمىن اتقارعان سوڭ ولاردىڭ ءۇستى-باسى تەگىس دەزينفەكتسيالانىپ, ارناۋلى كولىكپەن, ەشقايدا شىعارماي «التىن وردا» قوناقۇيىندەگى ەشكىممەن ارالاستىرمايتىن جەكە نومىرلەرگە جەتكىزىلەدى. كەلەسى اۋىسىمدارى باستالعانشا ولار وسى جەردە بولادى. ءۇي-ءىشى, بالا-شاعاسىمەن تەك تەلەفون ارقىلى سويلەسە الادى. بوتاگوز سۇلەيمەنوۆانىڭ ايتۋىنا قاراعاندا مۇنداعى جاعداي وتە جاقسى كورىنەدى. دارىگەر قىزمەتكەرلەردىڭ ءبارى دە وعان ريزا ەكەن. سونىمەن بىرگە ب.سۇلەيمەنوۆا: ء«بىزدىڭ دارىگەرلەرىمىزدى قولداپ, ءبىر رەتتىك كوستيۋمدەر اپەرگەن اللا پيسارەنكو باسقاراتىن «ىسكەر ايەلدەر اسسوتسياتسياسى» قوعامدىق ۇيىمى مەن بارىنشا ءدامدى تاعامدار جەتكىزىپ بەرىپ وتىرعان سايران حامزين باسقاراتىن «رەستوراتورلار اسسوتسياتسياسى» قوعامدىق ۇيىمىنا دا العىسىمىز شەكسىز», دەدى. وسىنداي قوعامدىق ۇيىمدار بولماسا قىزىلجاردىڭ 4-5 قاباتتى سۋپەرماركەتتەر تۇرعىزىپ جاتقان شىرىگەن بايلارىنان سىبىس جوق...
قازىر ينفەكتسيالىق بولىمشەنىڭ مەديتسينالىق قىزمەتكەرلەرى ناۋرىز ايىنىڭ قوسىمشا اقىسىن دا تولىق العان ەكەن. بۇل دا ولاردىڭ ەڭبەگىن ىنتالاندىرا تۇسۋگە زور ىقپال ەتىپ وتىرعان كورىنەدى. ەسكە سالا كەتەتىن بولساق, ينفەكتسيالىق ستاتسيوناردىق مەديتسينالىق قىزمەتكەرلەرىنە ونىڭ كولەمى 825 مىڭ تەڭگە. ءبىز ولارعا تەك اماندىق, ىستەرىنە بەرەكە تىلەيمىز. قوماقتى قوسىمشا اقىلارىن قۋانىشتارىنا جاراتۋعا اللا ءناسىپ ەتسىن.
قىزىلجار