توتەنشە توقسان

مينيستر ارىپتەستەرىنىڭ قىس­قا مەرزىمدە ۇلكەن ءىس اتقارىپ, جاڭا فورماتقا بەيىمدەلىپ, نەگىزگى دايىن­دىقتى جۇرگىزگەنىن اتاپ ءوتتى.

– توتەنشە جاعدايداعى جاڭا توقسان – ءبارىمىز ءۇشىن ۇلكەن ەمتيحان, سونىمەن قاتار تاماشا مۇمكىندىك. وسى تاجىريبەدەن كەيىن ەلىمىزدىڭ ءبىلىم بەرۋ سالاسى وزگەرەتىنى ايدان انىق. العاشقى كۇننىڭ باستى ناتيجەلەرىنە توقتالساق, بۇگىندە 3,2 ملن وقۋشى قاشىقتان ءبىلىم الۋدى باستادى. 2,4 ملن وقۋشى ينتەرنەت ارقىلى قاشىقتان ساباق وقىدى. Kundelik.kz جۇيەسىن 2,2 ملن ءبىلىم الۋشى پايدالاندى. Daryn.online پلاتفورماسىنا 300 مىڭنان اسا وقۋشى تىركەلگەن. بۇل پلاتفورمادا دايىن ۆيدەو ساباقتاردى قاراپ, سول ساباق بويىنشا بەرىلگەن تاپسىرمالاردى ورىنداۋعا بولادى. ال BilimLand ءبىلىم بەرۋ پلاتفورماسىن قاشىقتان وقۋدىڭ ءبىرىنشى كۇنى 400 مىڭعا جۋىق ءبىلىم الۋشى قولداندى. تەلەارنالارداعى ساباقتاردى تىڭداعان سوڭ, ءۇش دەڭگەيلى تاپسىرمالاردى ورىنداپ, فورۋمدار ارقىلى مۇعالىممەن تۇسىنبەگەن تۇستارىن تالقىلاي الادى. ءبىر عانا Kundelik.kz جۇيەسىندە 32 ملن رەت سەكتسيا بولىپتى, ياعني وسىنشا رەت سايتقا كىرۋ ارەكەتى تىركەلدى. بۇل – رەكورد. ءبىز Egov پورتالىنداعى 15 ملن سەكتسيانى كوپ دەگەنبىز. سونىمەن سالىستىرعاندا ءبىلىم بەرۋ سالاسىنىڭ ءبىر عانا جۇيەسىندەگى سەكتسيانىڭ ەكى ەسە كوپ ەكەنىن ەسكەرسەك, جۇمىستىڭ جوعارى قارقىنمەن باستالعانىن بىلۋگە بولادى, – دەدى ۆەدومستۆو باسشىسى.

ونىڭ ايتۋىنشا, ينتەرنەتكە قاتىستى پروبلەمالار, تەحنيكالىق اقاۋلار بار, ونى جاسىرۋعا بولمايدى. تەحنيكا, ينتەرنەتكە جاۋاپتى مينيسترلىكتەر مەن مامانداردىڭ ناتيجەلى جانە بەلسەندى جۇمىسىنىڭ ناتيجەسىندە مۇنداي ماسەلەلەر ۋاقىتىندا شەشىلىپ جاتىر.

قاشىقتان وقىتۋدىڭ ءبىر تەتىگى – تەلەديدار ارقىلى ءبىلىم بەرۋ. وسى ورايدا «بالاپان», «ەل ارنا» تەلەارنالارى كەستە بويىنشا تەلەساباقتار بەرۋدى باس­تادى. بۇل جونىندە ا.ايماعامبەتوۆ:

– تەلە-ساباقتار وقۋ جوسپارىنا ساي ازىرلەنگەن. ءبىز جۇرگىزگەن ساۋالدامانىڭ قورىتىندىسىندا ينتەرنەتپەن جۇمىس ىستە­گەن بالالاردىڭ ءوزى قوسىمشا تەلە-ساباقتاردى قاراعانىن بىلدىك. ەڭ باس­تىسى, ءبىز كوبىرەك ۋايىمداعان اۋىلدىق, شالعاي جەرلەردەگى وقۋشىلار تەلەسا­باقتار ارقىلى ۋاقتىلى ءبىلىم الىپ وتىر. تۇسكە تاياۋ ءوزىم ارنايى بىرنەشە اۋىلدىڭ مۇعالىمدەرىمەن, اتا-انالارى­مەن حابارلاستىم. سوندا ولار تەلەارناداعى ساباقتارعا قاتىستى جاعىمدى وي-پىكىرلەرىن جەتكىزدى. بۇل ءبىز ءۇشىن اسا ماڭىزدى,  – دەدى. ءمينيستردىڭ مالىمدەۋىنشە, بارلىق ءبىلىم باسقارلامارى مەن ءبىلىم بولىم­دەرىنە, سونىمەن قاتار مۇعالىمدەرگە قا­شىقتان وقىتۋدىڭ ۇسىنىمى جولدانعان.

وندا مۇعالىم قاشىقتان وقىتۋ پروتسەسىن ۇيىمداستىرۋ بارلىق مەكتەپ ءۇشىن قاتاڭ بەكىتىلگەن ءداستۇرلى كەستە بو­يىنشا ەمەس, يكەمدى, جەكە كەس­تەگە ساي وتەتىنى; ءبىر ءپان بو­يىنشا ساباقتىڭ ۇزاقتىعى كورسەتىلمەيتىنى, بۇل ءبىلىم الۋ­شىلاردىڭ وقۋ ماقساتتارىنا قول جەتكىزۋىنە جانە تاپسىرمالاردى ورىنداۋىنا بايلانىس­تى بولاتىنى; تەلەساباقتاردى كەز كەلگەن ىڭعايلى ۋاقىتتا BilimLand پلاتفورماسىنان, youtube ارنالارىنان قايتادان كورە الاتىنى; ءار كۇنگە وقۋ تاپسىرماسىن الۋ ادىستەرى مەن قۇرالدارى جانە ولاردى ءبىلىم الۋشىعا ىڭعايلى ۋاقىتتا ورىنداۋ; ەلەكتروندى كۇندەلىككە ساباققا قاتىسۋ تۋرالى اقپارات ەنگىزىلمەيتىنى, قاشىقتان وتكىزىلەتىن ساباقتار اتا-انالاردىڭ قول­داۋىن جانە قاتىسۋىن, ءبىلىم الۋشىنىڭ تاپ­سىرمالاردى وزدىگىنەن ورىن­داۋىن تالاپ ەتەتىنى تۋرالى اتا-انالاردى حاباردار ەتۋ كە­رەكتىگى جازىلعان.

ۆەدومستۆو باسشىسى وسى­عان قوسا اتا-انالاردان ءبىلىم الۋشىلاردىڭ تاپسىرمالاردى ورىنداۋىن فوتو, بەينە ارقىلى راستاۋىن تالاپ ەتۋگە بولمايتىنىن, وقۋ تاپ­سىرمالارىنىڭ كولەمى ءبىلىم جانە عىلىم مينيسترلىگى ۇسىن­عان كولەمنەن اسپاۋى ءتيىس ەكەنىن جانە مۇعالىمدەردىڭ جۋر­نال تولتىرۋدان وزگە قو­سىمشا ەسەپ بەرۋگە مىندەتتەل­مەي­تىنىن ەسكەرتتى.