داڭقتى كاسىپقوي بوكسشى, بىرنەشە نۇسقا جانە بىرنەشە سالماق دارەجەسى بويىنشا الەم چەمپيونى اتانعان فيليپپيندىك مەنني پاكياو ءوزىنىڭ سپورتتىق كارەراسىنداعى ەڭ قاۋىپتى قارسىلاستارىنىڭ ەسىمدەرىن اتادى.
ءححى عاسىردىڭ العاشقى ونجىلدىعىنىڭ ەڭ ۇزدىك كاسىپقوي بوكسشىسى اتانعان 41 جاستاعى كيباۆە ءوڭىرىنىڭ تۋماسى 1995 جىلدان بەرى جۇدىرىقتاسىپ ءجۇر. شيرەك عاسىرعا جۋىق ۋاقىت ارالىعىندا ونىڭ جولى نەبىر مىقتىلارمەن قيىستى. بارلىعى 71 كەزدەسۋ وتكىزگەن مەنني 62 رەت جەڭىسكە جەتىپ, 39 قارسىلاسىن نوكاۋتپەن ۇتتى. جەتى مارتە ۇتىلىپ, تاعى ەكى باسەكەدە تەڭ ەسەپ تىركەلدى.
باق وكىلدەرىنە بەرگەن سۇحباتىندا پاكياو ءوزىنىڭ ەڭ قاۋىپتى قارسىلاسى رەتىندە مەكسيكانىڭ ءۇش مىقتىسى – انتونيو مارگاريتو, حۋان مانۋەل ماركەس, ەريك مورالەس جانە پۋرتو-ريكونىڭ وكىلى ميگەل كوتتونى اتادى. ال سولاردىڭ اراسىندا ەڭ كۇشتىسى مارگاريتو بولعانىن ول مويىندادى. «انتونيومەن 2010 جىلدىڭ 13 قاراشاسىندا كۇش سىناستىم. ماعان قاراعاندا ول ەڭسەلى ءارى فيزيكالىق تۇرعىدان مىقتى ەدى. سوققىسى دا زىلدەي. تيگەن جەرىن ۇگىتىپ جىبەرەتىندەي. بىراق مەن دۇرىس تاكتيكا قولدانىپ, ودان ايلامدى اسىرىپ كەتتىم» دەيدى مەنني.
جوعارىدا ەسىمدەرى اتالعان وزگە بوكسشىلار جايىندا ايتار بولساق, مەنني پاكياو حۋان مانۋەل ماركەسپەن ءتورت رەت جۇدىرىقتاستى. ءبىر رەت ۇتىلىپ, ەكى رەت ۇتىپ, تاعى ءبىر تارتىستا تەڭ ەسەپ تىركەلدى. ەريك مورالەسپەن ەكى مارتە قولعاپ ءتۇيىستىردى. فيليپپيندىك ەكى مارتە, مەكسيكالىق ءبىر رەت جەڭىس تويىن تويلادى. ال ميگەل كوتتودان ول ايلاسىن اسىردى.