كاسىپقوي بوكستان كەزىندە اسا اۋىر سالماقتا الەمنىڭ ءابسوليۋتتى چەمپيونى اتانعان ۇلىبريتانيانىڭ وكىلى لەننوكس ليۋيس ءوزىنىڭ سپورتتىق كارەراسىنداعى ەڭ قاۋىپتى قارسىلاس رەتىندە امەريكالىق ەۆاندەر حوليفيلدتى اتادى.
54 جاستاعى تۇماندى البيون ەلىنىڭ وكىلى 1988 جىلى سەۋلە وليمپياداسىنىڭ جەڭىمپازى اتانعاننان كەيىن كاسىپقوي رينگتە كۇش سىناسۋدى قۇپ كوردى. 1989-2003 جىلدار ارالىعىندا 44 كەزدەسۋ وتكىزىپ, 41 رەت جەڭىسكە جەتتى. 32 قارسىلاسىن ەسىنەن تاندىردى. ەكى رەت ۇتىلىپ, تاعى ءبىر باسەكەدە تەڭ ەسەپ تىركەلدى.
الەمنىڭ ءابسوليۋتتى چەمپيونىنىڭ كارەراسىندا مىقتى قارسىلاستار كوپ كەزدەستى. ول رەي مەرسەر, شەنون بريگگس, فرانسۋا بوتا, دەۆيد تۋا, حاسيم راحمان, مايك تايسون, ۆيتالي كليچكو جانە تاعى باسقا دۇلدۇلدەرمەن جۇدىرىقتاستى. الايدا شارشى الاڭداعى ەڭ ازۋلى ءارى قاۋىپتى قارسىلاسى رەتىندە ول ەۆاندەر حوليفيلدتىڭ ەسىمىن اتادى.
– قارسىلاستارىمنىڭ اراسىنداعى ەڭ قاۋىپتىسى حوليفيلد بولعانى راس. سەبەبى, ول ۇزاق جىلدار بويى اۋەسقويلار اراسىندا جۇدىرىقتاسىپ, مول تاجىريبە ءجيدى. 1984 جىلى لوس-اندجەلەس وليمپياداسىنىڭ جۇلدەگەرى اتاندى. ودان كەيىن كاسىپقوي رينگتىڭ كوكجالىنا اينالدى. وسىنداي مەكتەپتەردەن وتكەن ەۆاندەر بوكس ونەرىنىڭ قىر-سىرىنا ابدەن قانىقتى. ارينە, ونداي مىقتىمەن ايقاسۋ كىم-كىمگە بولسا دا, اۋىر سوعاتىنى انىق, - دەيدى لەننوكس ليۋيس.
ەستەرىڭىزگە سالا كەتەيىك, قوس ساڭلاق 1999 جىلى ەكى مارتە كۇش سىناستى. كوكتەمدە نيۋ-يوركتە وتكەن جەكپە-جەكتە تەڭ ەسەپ تىركەلسە, كۇزدە لاس-ۆەگاستا ءليۋيستىڭ اسىعى الشىسىنان ءتۇستى.