1992-1993 جىلدارى رەسەي قۇرامىنداعى شەشەنستان جەكە ەل بولامىز دەپ تۋلادى. ءسويتىپ, ەكى ورتادا قارۋلى قاقتىعىس پايدا بولدى. بىردە شەشەندەر جارالى كۇيدە قولعا تۇسكەن ورىس سولداتى جايلى بەينەجازبانى ونىڭ اتا-اناسى جىبەرەدى. وندا: ء«بىر اپتانىڭ ىشىندە 10 000$» اكەلمەسەڭدەر, ولتىرەمىز» دەلىنگەن. ەلدىڭ قيىر شىعىسى پريمورسكي ولكەسىندە ءومىر ءسۇرىپ جاتقان سولداتتىڭ اتا-اناسى كەدەي ادامدار ەكەن. ولار ۇلىمەن بىرگە وسكەن جان دوسىنا بارىپ «سەرەگا ءبىر امالىن تاۋىپ تۇتقىنداعى دوسىڭدى قۇتقار!» دەپ جالىنادى.
وقيعادان حاباردار سەلو تۇرعىندارى اشقا جيناپ, جىگىتتىڭ «نيۆا» ماشيناسىنا تولتىرىپ بەنزين قۇيادى. بۇل جەردەن شەشەنستانعا دەيىن 13000 شاقىرىم جول. ءبىر اپتانىڭ ىشىندە ۇلگەرۋى ءتيىس. قىسقاسى, سەرەگا دوسىن قۇتقارۋ ءۇشىن جولعا شىعادى.
يتارقاسى قيىردان جانكەشتى جىگىت دوسىن قۇتقارۋ ءۇشىن جولعا شىققانى جايلى «سوۆەرشەننو سەكرەتنو» گازەتى ءبىرىنشى بەتتەن ونىڭ سۋرەتىن قوسىپ ماقالا جاريالايدى. ونى ءار جەردەگى ولكەلىك, اۋداندىق ت.ب. گازەتتەر كوشىرىپ باسىپ, ەلدىڭ ءبارى بىلەدى. ءتىپتى جولاي كەزدەسكەن قاراپايىم ادامدار قولىنداعى ءبىر-ەكى رۋبلدەرىن ۇستاتسا, كەيبىرەۋى ماشيناسىنا تولتىرىپ بەنزين قۇيىپ بەرەدى. پيروجكيلەرىن قاعازعا وراپ الا جۇگىرگەن اپالار قانشاما.
ول كەزدە جالپاق رەسەيدى رەكەت دەگەن تەكتەكتەر جايلاپ جاتقان. ولار سەرەگانىڭ قايدا كەلە جاتقانىن, قانشا اقشاسى بارىن الاقانداعىداي ءبىلىپ وتىردى. بىراق بىردە-بىرەۋى تيىسپەدى. ويتكەنى, جانكەشتى جىگىت «يا ەدۋ درۋگا سپاسات» دەپ جازىپ, ماشيناسىنىڭ ماڭدايشاسىنا جاپسىرىپ قويعان.
ءبىر جولى قوس دوڭگەلەگى قاتار جارىلىپ, نە ىستەرىن بىلمەي قينالىپ تۇرعاندا جول توناۋشى ءبىر توپ قاراقشىلار كەلىپ, «سەرەگا قورىقپا, ءبىز ءبارىن باقىلاپ وتىرمىز, سەن ناعىز ازاماتسىڭ!» دەپ, وزدەرى ءمىنىپ كەلگەن ماشيناسىنىڭ قوس دوڭگەلەگىن سالىپ بەرىپ, ءبىر جاشىك اراقتى جۇكسالعىشقا تيەپ ۇزىن جولعا شىعارىپ سالىپتى.
سودان ءبىر اپتا دەگەندە سەرەگا شەشەنستان شەكاراسىنا تۇمسىق تىرەيدى. الدا قاۋىپتى شەپ. وسى جەردە جولىققان ماي-دىڭ ساقا مايورى «سەرەگا, سەنى كۇتىپ ءجۇر ەدىم, كەلگەن ەكەنسىڭ. ەندى مىنا سوقپاققا ءتۇس. ەشقاشان توقتاۋعا بولمايدى. قازىر كۇز. تاۋدىڭ ارا رايى قاتال. ءما, مىنانى كيىپ ال!» دەپ مايور پوگاندى شينەلىن شەشىپ بەرەدى.
شەشەنستان شەبىنە كىرگەن سەرەگانىڭ جايىنان ەلدى كوبى حاباردار... ءتىپتى كورگەن جان جىلى شىراي تانىتىپ الەك. بىراق مەجەدەن ەكى كۇن اسىپ كەتتى. قىزىق بولعاندا دوسىن كەپىلگە العان شەشەن جاساعى «دوسى ءۇشىن» جانىن جالداپ كەلگەن ازاماتتى سىيلاپ, قالتاسىنداعى اقشاسىن دا الماي, بالا كەزدەن بىرە وسكەن جان سەرىگىن تاۋدان ءتۇسىرىپ, ەكەۋىن امان-ساۋ قوياا بەرگەن.
شىن مانىندە شەشەن جىگىتتەرىنىڭ جۇرەگىن جىبىتكەن سەرەگانىڭ «دوسىم ءۇشىن» («زا درۋگا») دەگەن ادال نيەتى مەن شىنايى ىقىلىسى بولاتىن.