حالىقارالىق دزيۋدو فەدەراتسياسىنىڭ پرەزيدەنتى ماريۋس توكيو وليمپياداسى 2021 جىلعا اۋىستىرعانىنا بايلانىستى دزيۋدودان وليمپيا ويىندارىنا ىرىكتەۋ جارىستارىنىڭ ۋاقىتى سوزىلعانىن حابارلادى. سونىمەن قاتار ول بيىلعى باسەكەلەر 30 ماۋسىمعا دەيىن توقتاعانىن مالىمدەدى دەپ حابارلادى ۇوك ءباسپاسوز قىزمەتى.
«حوك شەشىمىنەن سوڭ حالىقارالىق دزيۋدو فەدەراتسياسى بارلىق شەشىمدەردى قاراستىرۋدا. Covid-19 سالدارىنان توقتاتىلعان جارىستار جالعاسىن تابادى. حوك ۇسىنىسى بويىنشا, وليمپياداعا ىرىكتەۋ ءتۋرنيرى 2021 جىلدى 29 ماۋسىمىنا دەيىن اياقتالادى. IJF وليمپياداعا ىرىكتەۋ ءتۋرنيرىنىڭ جاڭا مەرزىمىندەگى جارىستار تىزبەگىن ساقتايدى. 2021 جىلعى الەم چەمپيوناتى مەرزىمىن دە اۋىستىرىپ, ىرىكتەۋ كەزەڭىنە قوسۋعا بولادى. بىراق كوروناۆيرۋسقا بايلانىستى بۇل تۋرالى ناقتى شەشىم قابىلدانعان جوق. كاتارداعى «Masters» ءتۋرنيرى ىرىكتەۋ ءتۋرنيرىنىڭ ءبىر بولشەگى رەتىندە قالادى. 2020 جىلدىڭ 30 ماۋسىمىنا دەيىنگى جارىستاردىڭ بارلىعى توقتاتىلدى», دەدى IJF پرەزيدەنتى ماريۋس ۆيزەر.
ايتا كەتەلىك, توكيو وليمپياداسى 2021 جىلدىڭ 23 شىلدەسى مەن 8 تامىزى ارالىعىندا وتەدى.