بۇگىن ءماجىلىستىڭ زاڭناما جانە سوت قۇقىقتىق رەفورما كوميتەتى ۆيدەوكونفەرەنتسيا فورماتىندا وتىرىس وتكىزىپ, دەپۋتاتتار بەيبىت جينالىستاردى وتكىزۋ تۋرالى حابارلامالار مەن ءوتىنىش بەرۋ مەرزىمدەرىن, سونداي-اق ولاردى جەرگىلىكتى اتقارۋشى ورگانداردىڭ قاراۋ مەرزىمدەرىن قىسقارتۋ جايىن تالقىلادى. بۇل تۋرالى پالاتانىڭ ءباسپاسوز قىزمەتى حابارلادى.
ءتيىستى تۇزەتۋلەر قازىر پالاتا قاراۋىندا جاتقان زاڭ جوباسى بويىنشا جۇمىس توبىنىڭ وتىرىسىندا پىسىقتالدى. جيىندا دەپۋتاتتار, زاڭ جوباسىن ازىرلەۋشىلەر, ازاماتتىق جانە عىلىمي قوعامداستىق وكىلدەرى مەملەكەتتىك ورگانداردىڭ قۇزىرەتىنە قاتىستى ماسەلەلەردى, بەيبىت جيىنداردى وتكىزۋ تۋرالى حابارلامالار مەن مالىمدەمەلەردى, ولاردى قاراۋ ءتارتىبىن, ۇيىمداستىرۋشىلار, قاتىسۋشىلار مەن جۋرناليستتەر تۋرالى ەرەجەلەردى تالقىلادى.
اتاپ ايتقاندا, زاڭنامالىق دەڭگەيدە مەملەكەتتىك ورگانداردىڭ ينتەرنەت-رەسۋرسىندا ارنايى ورىنداردىڭ ءتىزىمىن ورنالاستىرۋ ۇسىنىلدى.
سونىمەن قاتار زاڭ جوباسىنىڭ ۇكىمەتتىك نۇسقاسىندا بەيبىت جينالىستار, ميتينگ, پيكەتتەردى وتكىزۋ تۋرالى 10-15 جۇمىس كۇنىنەن كەشىكتىرىلمەيتىن مەرزىمدە دەپ كورسەتىلگەن ەدى. وسىعان سايكەس, ءماجىلىس دەپۋتاتتارى بەيبىت جيىنداردى وتكىزۋ تۋرالى حابارلامالاردى بەرۋ جانە قاراۋ مەرزىمدەرىن 5 جۇمىس كۇنىنە دەيىن قىسقارتۋدى ۇسىندى.
پىكىرتالاسقا قاتىسۋشىلار جەرگىلىكتى اتقارۋشى ورگاندار ءۇشىن 3 جۇمىس كۇنىن بەلگىلەۋ ماڭىزدى دەپ سانادى. ول كەزدە اكىمشىلىك حابارلاماعا جاۋاپ بەرە الادى جانە ەگەر سۇرالعان جەر بوس ەمەس بولسا, ۇيىمداستىرۋشىلارعا بەيبىت جينالىس وتكىزۋدىڭ باسقا ورنىن نەمەسە ۋاقىتىن ۇسىنا الادى. ەگەر 3 جۇمىس كۇنى ىشىندە ۇيىمداستىرۋشىلار بيلىك تاراپىنان ەشقانداي جاۋاپ بولماسا, وندا شارا ادەپكى كورسەتىلگەن ۋاقىت بويىنشا وتكىزەدى.
وتىرىس بارىسىندا دەپۋتاتتار ۇكىمەتتىك نۇسقاداعى دەمونستراتسيا, شەرۋ وتكىزىلەتىن جاعدايدا – ول وتكىزىلەتىن كۇنگە دەيىن ون بەس جۇمىس كۇنى دەگەن مەرزىمدى ون جانە جەتى كۇنگە قىسقارۋدى ۇسىندى. سەبەبى مۇنداي وقيعالاردىڭ كوشەلەردى وقشاۋلاۋ قاجەتتىلىگىمەن, وسى وقيعالارعا قاتىسى جوق ازاماتتار مەن بيزنەس ءۇشىن بەلگىلى ءبىر قولايسىزدىقتار تۋدىراتىندىعىن ەسكەرە وتىرىپ, ولاردى ۇيلەستىرۋ كوپ ۋاقىتتى قاجەت ەتەتىندىگىن ەسكەردى.
بۇل ۇسىنىستار جۇمىس توبىنىڭ وتىرىسىندا قولداۋ تاۋىپ, سونىمەن قاتار ۇيىمداستىرۋشىلار, قاتىسۋشىلار مەن جۋرناليستەرگە قاتىستى ماسەلەلەر قارالدى. اتاپ ايتقاندا, بەيبىت جيىنداردى جاريالاۋعا ۇيىمداستىرۋشىلار شاقىرعان جۋرناليستەردىڭ ءتىزىمىن ۇسىنۋ قاجەتتىلىگىن جويۋ ۇسىنىلدى. سونداي-اق, دەپۋتاتتار ۇيىمداستىرۋشىلاردىڭ, قاتىسۋشىلار مەن جۋرناليستەردىڭ مەملەكەتتىك ورگانداردىڭ نەمەسە ولاردىڭ لاۋازىمدى ادامدارىنىڭ ءوتىنىشى بويىنشا بەيبىت جينالىستاردىڭ فوتوسۋرەتتەرى مەن بەينەجازبالارىن ۇسىنۋ جونىندەگى نورمالاردى ارتىق دەپ ەسەپتەيدى.