راسىندا دا قازىر جۇرت نازارى سيريادا. وندا ەكى جارىم جىلداي ۋاقىتتان بەرى سوعىس ءجۇرىپ جاتىر. 100 مىڭنان استام ادام قازا تاپقان. ەندى سول سوعىس جاڭا سيپات الىپ, ول بۇرىنعىدان دا كۇشەيەتىندەي. وعان الەمنىڭ جەتەكشى ەلدەرىنىڭ دە قاتىسۋى قاۋپى تۋىپ وتىر.
پان گي مۋن: «بۇكىل الەم سيرياعا قاراپ وتىر»
راسىندا دا قازىر جۇرت نازارى سيريادا. وندا ەكى جارىم جىلداي ۋاقىتتان بەرى سوعىس ءجۇرىپ جاتىر. 100 مىڭنان استام ادام قازا تاپقان. ەندى سول سوعىس جاڭا سيپات الىپ, ول بۇرىنعىدان دا كۇشەيەتىندەي. وعان الەمنىڭ جەتەكشى ەلدەرىنىڭ دە قاتىسۋى قاۋپى تۋىپ وتىر.
سيرياداعى جاعدايدىڭ جاڭا بەتبۇرىس الۋى وندا حيميالىق قارۋدىڭ قولدانىلۋىنا بايلانىستى بولدى. داماسك قالاسىنىڭ ىرگەسىندەگى مۋاداميادا وسىدان ون كۇن بۇرىن حيميالىق شابۋىل جاسالىپ, ودان بىرنەشە جۇزدەن 1300-گە دەيىن ادام قازا تاپقان. ءالى انىقتالماعان جاي كوپ: سول قارۋدى كىم قولدانعانى دا, قانشا ادام قازا تاپقانى داۋلى. رەسمي بيلىك پەن وپپوزيتسيا ءبىر-بىرىنە جابادى. ءسىرا, ەشقايسىسى كۇنانى ءوز موينىنا الا قويماس.
سىرتتاعىلاردىڭ پىكىرى دە ەكىۇداي. بىراق سوڭعى كەزدە اقش باستاعان ەۋروپانىڭ جەتەكشى ەلدەرى كۇنانى باشار اسادقا ارتىپ وتىر. ال سيريا بيلىگىنە شىرىلداپ ارا تۇسەتىن نەگىزىنەن جالعىز رەسەي. وندا دا ول سيريا ايىپتى ەمەس دەپ كەسىپ ايتا الماي, انىعىنا جەتكەنشە وعان سوعىس اشپاڭدار, بۇۇ قاۋىپسىزدىك كەڭەسىنىڭ رۇقساتىن كۇتىڭدەر دەگەندى ايتۋدان جالىقپايدى. بۇل قۋلىقتىڭ سىرى وڭاي اشىلادى – رەسەي مەن قىتاي, وزدەرىنىڭ ۆەتو قۇقىن پايدالانىپ, سيرياعا قارسى شەشىمدى قابىلداتپاي تاستايدى.
مۇنداي جاعدايدا كۇن تارتىبىنە, بۇۇ قاۋىپسىزدىك كەڭەسىنىڭ شەشىمىنە قاراماي, حيميالىق قارۋدى قولدانعانى ءۇشىن سيريانى جازالاۋ ماسەلەسى مىقتاپ قويىلىپ وتىر. بۇعان اقش پەن ەۋروپانىڭ جەتەكشى ەلدەرى كەلىسىپ قويعانداي. سەيسەنبى كۇنى اقش پرەزيدەنتى باراك وبامانىڭ بۇل جونىندەگى جوسپارى دا ءمالىم بولدى. ول بويىنشا سيرياعا قارسى ەكى كۇندىك اسكەري وپەراتسيا وتكىزىلۋى مۇمكىن. باسقالاردى بىلاي قويعاندا, تەك اقش-تىڭ جەرورتا تەڭىزىندەگى 6-شى فلوتىنىڭ, پارسى شىعاناعىنداعى جانە اراب تەڭىزىندەگى 5-ءشى فلوتىنىڭ كۇشتەرى-اق سيرياعا ەسەڭگىرەتە سوققى بەرە الاتىنى انىق. اقش-تى قولداپ, ىسكە كىرىسەتىنىن ۇلىبريتانيا مەن فرانتسيا بىردەن مالىمدەدى. ال تۇركيا بۇۇ مانداتىنسىز-اق سيرياعا كىرۋگە ازىرلىگىن ءبىلدىردى.
مۇنداي ەكى كۇندىك سوققى بەرۋ مەرزىمى مىناداي ءۇش فاكتورعا قاتىستى بەلگىلەنبەك: الدىمەن داماسك ماڭىنداعى حيميالىق شابۋىل تۋرالى اقپارات تولىق جيناقتالۋى كەرەك, وداقتاستارمەن اقىلداسىپ, اقش كونگرەسىنىڭ كەلىسىمى الىنادى جانە ماسەلەنىڭ قۇقىقتىق جاعىن نەگىزدەۋ. بۇعان ءبىراز ۋاقىت كەتەتىنى انىق. سودان دا بۇگىن-ەرتەڭ قىرقىسۋ باستالا قويماس.
قازىر بۇۇ-نىڭ ارناۋلى كوميسسياسى حيميالىق شابۋىل جاساعان ايماقتا زەرتتەۋ جۇمىستارىن جۇرگىزىپ جاتىر. سيريا باسشىلىعى بۇل كوميسسيانىڭ كەلۋىنە دە ءبىرشاما قارسىلىق كورسەتتى. سونىڭ وزىنەن دە ونىڭ كىناسى اڭعارىلعانداي بولدى. ادال بولسا, الدىمەن سول كوميسسيانى وزدەرى شاقىرۋى كەرەك ەدى عوي دەگەن پىكىردىڭ دە جانى بار. سونداي-اق, دۇيسەنبى كۇنى سول كوميسسيا نۇسقاۋشىلارىنا وق تا اتىلعان. ونى دا ءبىراز جۇرت سيريا بيلىگىنەن كورەدى.
بۇۇ باس حاتشىسى پان گي مۋن اتاپ وتكەندەي, بۇكىل الەم قازىر سيرياداعى جاعدايعا كوز تىگىپ وتىر. وكىنىشكە قاراي, بۇۇ-نىڭ ءوزى دە, ونىڭ قاۋىپسىزدىك كەڭەسى دە ءبۇل شيەلەنىستى شەشۋدە دارمەنسىزدىك كورسەتىپ وتىرعانى دا الەمنىڭ كوز الدىندا. بىرەۋلەر قاۋىپسىزدىك كەڭەسىندە پارمەندى شەشىم قابىلداۋعا مۇمكىندىك بەرمەسە, ونى باس اسسامبلەيانىڭ تالقىلاۋىنا شىعارۋعا دا بولار ەدى عوي دەيسىڭ.
قۇن سۇراعان جۇرت كوبەيدى
قازا بار جەردە قيانات بار. ادىلدىككە جۇگىنسەك, قيانات جاساعاندار جاۋاپ بەرۋگە ءتيىس. ونىڭ دا ءتۇرلى جولى بار. بىرەۋگە جازا كەسىلەدى, بىرەۋ قۇنىن دۇنيەمەن وتەيدى. ارينە, سول قيانات جاسادى دەگەندەر ءوز كىنالارىن مويىنداپ, تاعىلعان ايىپتاردى وتەۋگە دايىن ەكەندىگىن بىلدىرگەن كۇندە عانا ول جۇزەگە اسادى. ال ولاي بولاتىنىنا كۇمان كوپ.
تاريحتا, ءبىر ەلدەردىڭ داستۇرىندە قۇن تولەۋ بولىپ جاتادى. سوعىسقان ەكى ەلدىڭ جەڭىلگەنى, اسىرەسە, سول سوعىسقا سەبەپشى بولعان ەل ايىپتالىپ, اقىرى اسكەري دە, ەكونوميكالىق تا قۇن تولەپ شىعادى. الىسقا بارماي-اق, وعان كەشەگى ەكىنشى دۇنيەجۇزىلىك سوعىستىڭ ناتيجەسى ايقىن مىسال. گەرمانيا, جاپونيا زاۋال تارتتى. ايتپەسە ءبىر ەلدەردىڭ داستۇرىندە ءارتۇرلى قاقتىعىستا ادام قازاسى بولسا, وعان قۇن تولەنەدى. ءتۇرلى گەنوتسيدتىك ساياسات ءۇشىن دە ءبىر ەلدەردەن قۇن سۇ