شىمكەنت قالاسى ەڭبەكشى اۋدانىندا 116 كاسىپكەرلىك نىسانى جۇمىسىن توقتاتتى. اتاپ ايتقاندا, 28 مەيرامحانا, 3 ساۋدا – ويىن-ساۋىق ورتالىعى, 36 مونشا كەشەنى, 13 بيليارد, 18 ينتەرنەت كلۋبى جانە 18 بۋكمەكەرلىك كەڭسە جابىلدى. بۇل تۋرالى اقپاراتتىق-كوممۋنيكاتسيالىق ورتالىقتا وتكەن بريفينگتە ەڭبەكشى اۋدانىنىڭ اكىمى عالىمجان ءىلياسوۆ ايتىپ ءوتتى.
- اۋدان اۋماعىنداعى ەۆرازيا, بەنەفيس, اسەل, التىن وردا بازارلارىنىڭ جۇمىسى توقتاتىلدى. ال, يساتاي, كوكتەم بازارلارى مەن اينا بازارىنىڭ ازىق-ت ۇلىك ساتاتىن بولىگى 10:00-دەن 18:00-گە دەيىن شەكتەۋلى رەجيمدە جۇمىس ىستەۋدە. ەڭبەكشى اۋدانى «اينا» بازارىنداعى «كوكتەم» اۆتوبەكەتى ءوز جۇمىسىن اعىمدىعى جىلدىڭ 25 ناۋرىزىنان باستاپ توقتاتتى, - دەدى اۋدان اكىمى.
ع.ءىلياسوۆتىڭ ايتۋىنشا, «فوسفورشىلار» سارايى مەن «اسەل» بازارىنىڭ الدىندا اپتا سايىن وتەتىن ازىق-ت ۇلىك جارمەڭكەلەرى دە جۇمىسىن توقتاتقان. سونىمەن بىرگە, اۋدانداعى تەلەفون ساتاتىن 7 دۇكەن ۋاقىتشا جابىلعان.