پارلامەنت ءماجىلىسىنىڭ سپيكەرى نۇرلان نىعماتۋليننىڭ توراعالىعىمەن وتكەن پالاتانىڭ جالپى وتىرىسىندا دەپۋتاتتار «ارداگەرلەر تۋرالى» زاڭ جوباسىن ءبىرىنشى وقىلىمدا ماقۇلدادى.
القالى جيىندا دەپۋتاتتار «ارداگەرلەر تۋرالى» زاڭ جوباسىن جان-جاقتى تالقىلاپ, قولداۋ كورسەتتى. بۇل زاڭ جوباسىن تانىستىرعان ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قۇجات ارداگەرلەردى الەۋمەتتىك قورعاۋعا بايلانىستى قوعامدىق قاتىناستاردى رەتتەيتىن زاڭنامالىق اكتىلەردى جۇيەلەۋ, قايتا قاراۋ جانە ارداگەرلەردىڭ جاڭا ساناتتارىن قالىپتاستىرۋ ماقساتىندا ازىرلەنگەنىن اتاپ ءوتتى.
ونىڭ ايتۋىنشا, زاڭ جوباسى ارداگەرلەردىڭ الەۋمەتتىك قورعالاتىن ساناتىنىڭ مارتەبەسىن ايقىنداۋدى كوزدەيدى. ءبىرىنشىسى – ول ۇوس ارداگەرلەرى. بۇل ساناتقا سوعىسقا قاتىسۋشىلار جانە ۇوس مۇگەدەكتەرى جاتادى.
ەكىنشىسى – باسقا مەملەكەتتەردىڭ اۋماعىندا ۇرىس قيمىلدارىنىڭ ارداگەرلەرىنە قاتىستى. زاڭ جوباسىنا سايكەس ولارعا اۋعانستانداعى ۇرىس قيمىلدارىنا قاتىسقان اسكەري قىزمەتشىلەر, سونداي-اق 1992 جىلدان 2001 جىلعا دەيىنگى كەزەڭدە تاجىك-اۋعان ۋچاسكەسىندە تمد-نىڭ سىرتقى شەكارالارىنىڭ سىرتقى قورعانىسىن كۇشەيتۋگە قاتىسقان, 1968 جىلى چەحوسلوۆاكياداعى جانجالدى رەتتەۋگە, تاۋلى قاراباحتاعى ەتنوسارالىق جانجالدى رەتتەۋگە, يراكتاعى بىتىمگەرشىلىك وپەراتسيالارىنا قاتىسقان ۇلتتىق كونتينگەنكە كىرەتىن ازاماتتار ساناتى جاتادى.
ءۇشىنشىسى – جەڭىلدىكتەر بويىنشا ۇوس ارداگەرلەرىنە تەڭەستىرىلگەن تۇلعالار ساناتى. بۇل قاتارعا جەڭىلدىكتەر مەن كەپىلدىكتەر بويىنشا ۇوس قاتىسۋشىلارىنا تەڭەستىرىلگەن ازاماتتاردىڭ 8 ساناتى جانە ۇوس مۇگەدەكتەرىنە تەڭەستىرىلگەن ازاماتتاردىڭ 5 ساناتى كىرەدى.
تورتىنشىدەن, ەڭبەك ارداگەرلەرى قامتىلعان. ولار – سوتسياليستىك ەڭبەك ەرلەرى, ءۇش دارەجەلى داڭق, ءۇش دارەجەلى ەڭبەك داڭقى وردەندەرىنىڭ يەگەرلەرى, قازاقستاننىڭ ەڭبەك ەرى اتاعىنا يە بولعان تۇلعالار, 1941 جىلعى 22 ماۋسىمنان 1945 جىلعى 9 مامىر ارالىعىندا كەمىنە 6 اي جۇمىس ىستەگەن, اسكەري قىزمەت وتكەرگەن جانە ەكىنشى دۇنيەجۇزىلىك سوعىس جىلدارى تىلداعى جانقيارلىق ەڭبەگىمەن ءمىنسىز اسكەري قىزمەتى ءۇشىن بۇرىنعى كسرو وردەندەرىمەن جانە مەدالدەرمەن ماراپاتتالعان ادامدار.
– زاڭ جوباسىندا ارداگەرلەرگە قاتىستى الەۋمەتتىك قولداۋ شارالارى قاراستىرىلعان. مينيسترلىك ءوز كەزەگىندە ارداگەرلەرگە قىزمەت كورسەتۋدى بەلسەندەندىرۋ باعىتىندا قۇقىقتىق اكتىلەرگە تولىقتىرۋلار ەنگىزىپ, اردەگەرلەردىڭ قوعامدىق بىرلەستىكتەرىمەن, كاسىپوداقتارىمەن, جەرگىلىكتى اتقارۋشى ورگاندارمەن بىرلەسىپ, ءتيىستى جۇمىستار اتقارادى. قۇقىقتىق مونيتورينگ ناتيجەلەرى بويىنشا زاڭ جوباسىندا قولدانىستاعى زاڭنامانىڭ ەسكىرگەن جانە تاجىريبەلىك ءمانى جوعالعان نورمالار الىپ تاستالدى, – دەدى مينيستر.
سونىمەن قاتار پالاتا سالىق سالۋ ماسەلەلەرى بويىنشا دەپۋتاتتىق تۇزەتۋلەردى ءبىرىنشى وقىلىمدا ماقۇلدادى. زاڭ جوباسىن دەپۋتاتتار قۇقىقتىق نورمالاردى «ارداگەرلەر تۋرالى» زاڭ جوباسىنا سايكەس كەلتىرۋ ماقساتىندا ازىرلەدى. قۇجاتتا ۇوس قاتىسۋشىلارى مەن ولارعا تەڭەستىرىلگەن تۇلعالاردى كولىك, م ۇلىك سالىقتارى, سوتتاردا مەملەكەتتىك باج تولەۋ, ازاماتتىق حال اكتىلەرىن تىركەۋ كەزىندە جانە تاعى باسقا سالىقتاردان, مەملەكەتتىك باجداردان بوساتۋ ۇسىنىلادى.