قىرعىزدىڭ مادەنيەتى مەن تىلىنە قاتتى قۇمار ماسكەۋلىك 17 جاسار كريستينا پاراشينا ەسىمىن «ايسۇلۋ» دەپ وزگەرتىپ, ونىسىن اتا-اناسىنا بىلدىرمەي, يسلام ءدىنىن قابىلدادى. بۇل تۋرالى «Islam Today» اقپاراتتىق پورتالى حابارلادى.
كريستينا قىرعىز ءتىلىن 4 جىلدان بەرى ۇيرەنىپ ءجۇر ەكەن. سونداي-اق, بۇدان 2 جىل بۇرىن يسلام ءدىنىن قابىلداعان. ول مۇنىڭ ءبارىن جۇرەك قالاۋىمەن ءارى ءوزى قاتتى قىزىعاتىن قىرعىزستانعا بارۋ ءۇشىن جۇزەگە اسىرعان.
«قىرعىزستانعا دەگەن كوزقاراسىم 4 جىلدان بەرى قاتتى وزگەردى. بۇل ەلگە قىزىعامىن, – دەيدى كريستينا. – قىرعىزستان تاريحىن وقىپ, ءتىلىن ءبىلىپ قانا قويماي, سول ەلگە بارعىم كەلەدى».
كريستينا ءوزىنىڭ كۇرت وزگەرگەنىن بىلايشا تۇسىندىرەدى. «ماسكەۋدە قىرعىز بالالارىمەن تانىستىم. ماعان ولاردىڭ ءوزىن-ءوزى ۇستاۋى, ادامدارمەن قارىم-قاتىناسى ۇنادى, – دەيدى كريستينا. – سودان ولاردىڭ ەلى مەن جەرى تۋرالى, سونىمەن بىرگە, جاقسى تاربيەنى قايدان العانىن بىلگىم كەلدى».
«وسىدان ەكى جىل بۇرىن اتا-انامنان جاسىرىنىپ مەشىتكە كەلدىم دە, يسلام ءدىنىن قابىلدادىم, – دەيدى كريستينا. – سودان كەيىن ءوزىمنىڭ ەسىمىمدى ايسۇلۋ دەپ وزگەرتتىم».
كريستينا الداعى ۋاقىتتا ءوزىنىڭ ارمانىنا اينالعان قىرعىزستانعا بارىپ, سونداعى جوعارى وقۋ ورىنداردىڭ بىرىنە ءتۇسۋدى جوسپارلاپ ءجۇر.
ماسكەۋلىك ارۋدى ءتانتى ەتىپ, ءتىپتى, ونى ءدىنىن وزگەرتۋگە دەيىن جەتكىزگەن قىرعىزستان كريستينا-ايسۇلۋ پاراشينانى جاتىرقاماس.
جولدىباي بازاروۆ.