سولتۇستىك قازاقستانعا دا شەكتەۋ شارالارى ەنگىزىلەدى

«پەتروپاۆل قالاسىنىڭ اينالاسىنا باستى باعىتتار بويىنشا بلوك پوستار قويىلادى. شىعۋ مەن كىرۋگە تەك قانا ماڭىزدى قاجەتتىلىك بولعان جاعدايدا عانا رۇقسات بەرىلەدى. سونىمەن قاتار قۇجاتتار عانا تەكسەرىلمەيدى, سانيتارلىق جانە ۆەتەرينارلىق قىزمەتتەر ساۋالناما دا جۇرگىزەتىن بولادى. بلوكپوستاردىڭ نەگىزگى مىندەتى ءجۇرىپ-تۇرۋدى شەكتەۋ. تەك جۇمىسقا, اۋرۋحاناعا نەمەسە ىسكەرلىك ماسەلەلەرمەن عانا جۇرۋگە بولادى», دەدى اكىم. ودان ءارى ق.اقساقالوۆ بارلىق اۋدانداردا دا بلوكپوستار قويىلاتىنىن ەسكەرتتى. بارلىق وتباسىلىق سالتاناتتار, تويلار تج ۋاقىتىندا بولماي, كەيىنگە شەگەرىلەدى. قالانىڭ اۋەجايى قازىردىڭ وزىندە جابىلعان. تەمىرجول بيلەتتەرىن ساتۋ توقتاتىلعان. ۆوكزال تەك 27 ناۋرىزعا دەيىن بيلەت العان جولاۋشىلاردى عانا قابىلدايتىن بولادى. «بۇل شارالار ەسكەرتپەلەر ەمەس, تج بايلانىستى تالاپتار. سوندىقتان ول ءسوزسىز ورىندالۋى كەرەك. پوليتسيا وسى تالاپتاردىڭ ورىندالۋىن قاتتى قاداعالايتىن بولادى», دەي كەلىپ ودان ءارى قۇمار ىرگەباي ۇلى: «ادامدار نەعۇرلىم قوعامدىق ورىنداردا كوبىرەك بولسا, سولعۇرلىم ىندەتكە ۇشىراۋ قاۋپى زور», دەپ ەسكەرتتى. 

وبلىستاعى بارلىق بالاباقشالار جابىلاتىن بولعان, 65-تەن اسقان جاسى ۇلعايعان ازاماتتاردىڭ بارىنە ۇيدەن شىقپاۋ قاجەتتىگى ەسكەرتىلگەن. قوعامدىق ورىنداردا ءۇش ادام جينالعاننىڭ وزىندە ءبىر-بىرىنە جاقىنداۋى ەكى مەتردەن كەم بولماۋى كەرەك. مەملەكەتتىك مەكەمەلەر, قۇقىق قورعاۋ ورگاندارى, اۋرۋحانالار, كوممۋنالدىق قىزمەتتەر قالىپتى رەجىمدە جۇمىس ىستەيدى. قالعان كاسىپورىندار مەن جۇمىس ورىندارى قىزمەتكەرلەرىن مۇمكىندىگىنشە ديستانتسيالىق رەجىمگە اۋىستىرۋى كەرەك. تاماقتاندىرۋ ورىندارى, بانكتەر  كەزەككە تۇراتىن كليەنتتەرىنىڭ سانىن بەسەۋدەن اسىرمايتىن جۇمىس كۇندەرىنە كوشكەنى ءجون. ولاردىڭ ءوزارا قاشىقتىعى دا ەكى مەتردەن كەم بولماۋى  قاداعالانسىن. قوعامدىق كولىك تاڭعى ساعات جەتىدەن كەشكى 20.00 ساعاتقا دەيىن عانا ىستەيتىن بولادى. ديزەنفەكتسيا جاساۋ جۇمىستارى دا جيىلەيدى. بۇگىننەن باستاپ بارلىق قوعامدىق ورىندار ديزەنفەەكتسيالانادى.

وسى ماسەلەلەردىڭ ءبارىن ايتىپ كەلىپ, ءسوزىنىڭ سوڭىندا اكىم پرەزيدەنتتىڭ تاپسىرماسىنا سايكەس ۆيرۋسقا قارسى كۇرەسىپ جاتقان دارىگەرلەردىڭ ەڭبەكاقىلارى وسەتىنىن جەتكىزدى. الدىمىزداعى ءۇش اي بويى مەديتسينا قىزمەتكەرلەرىن ۆيرۋس جۇقتىرۋ تاۋەكەلىنە قاراي ءۇش توپقا بولىنەدى, سونىڭ ىشىندە ينفەكتسيالى ستاتسيوناردىڭ قىزمەتكەرلەرگە ەڭ تومەنگى ەڭبەكاقى كولەمىنىڭ 20 رەت ەسەلەنگەن كولەمىندە, ياعني 850 مىڭ تەڭگە قوسىمشا تولەنەدى. پروۆيزورلىق ستاتسيونارلار مەن «جەدەل جاردەم» دارىگەرلەرىنە  425 مىڭ تەڭگە, ال كارانتيندە جۇمىس ىستەيتىن قىزمەتكەرلەرگە 212 مىڭ قوسىمشا اقى تولەنەدى دەدى ول.

سولتۇستىك قازاقستان وبلىسى