ورال قالاسىندا ۇلتتىق ۇلان ساربازدارى ءبىر جىگىتتىڭ قىمبات سمارتفونىن تارتىپ الىپ كەتكەن توناۋشىنى ۇزاتپاي قولعا ءتۇسىردى.
وقيعا 26 ناۋرىز كۇنى ىڭىردە بولعان ەكەن. قوعامدىق ءتارتىپ كۇزەتىندە جۇرگەن سەرجانت اڭسار امانجولوۆتىڭ پاترۋلدىك توبى ورال قالاسىنداعى مۇحيت پەن دينا كوشەلەرىنىڭ قيىلىسىندا توبەلەسىپ جاتقان جاس جىگىتتەردى بايقاپ قالعان. قۇقىق ساقشىلارىن كورگەن ولار قاشا جونەلگەن. وقيعا ورنىندا قالعان جاس جىگىت بەلگىسىز ادامداردىڭ ودان SamsungGalaxyJ2 تەلەفونىن كۇشپەن تارتىپ العانىن ايتقان.
بىردەن دابىل كوتەرىلىپ, بىرنەشە مينۋت ىشىندە قىلمىسكەرلەردىڭ بىرەۋى قولعا ءتۇستى. تۇتىلعان قاراقشى ۇلان ساربازدارىنا بوساتىپ جىبەرۋ ءۇشىن پارا دا ۇسىنىپ ۇلگەرگەن. ونىڭ قالتاسىنان قىلمىس كۋاگەرى – تونالعان تەلەفون تابىلدى.
- اباي پوليتسيا بولىمىندە بەتتەستىرۋ كەزىندە قاراقشىنى جابىرلەنۋشى دە تانىدى, جاس جىگىت وزىنە جەدەل كومەك بەرىپ, قىلمىسكەرلەردى قاماۋعا العان ۇلان ساربازدارىنا العىس ايتتى, - دەيدى ۇلتتىق ۇلاننىڭ «باتىس» اۋماقتىق قولباسشىلىعىنىڭ ءباسپاسوز قىزمەتىنىڭ جەتەكشىسى, پودپولكوۆنيك ەربولات سۇلتانوۆ.
سەرجانت اڭسار امانجولوۆ, كىشى سەرجانت مەرجان ابىلعاليەۆ جانە قاتارداعى سارباز ايدار مامىشەۆ قىراعىلىعى جانە قوعامدىق ءتارتىپتى ساقتاۋداعى قاجىرلى ەڭبەگى ءۇشىن 5517 اسكەري ءبولىم كومانديرىنىڭ ماراپاتىنا يە بولدى.
باتىس قازاقستان