پرەزيدەنتى جانىنداعى ورتالىق كوممۋنيكاتسيالار قىزمەتىنىڭ الاڭىندا توتەنشە جاعداي كەزىندە ەلورداداعى حالىقتىڭ الەۋمەتتىك ءالسىز توپتارىن مەملەكەتتىك تۇرعىدا قولداۋعا ارنالعان ءباسپاسوز ءماسليحاتى ءوتتى. جيىن برىسىندا نۇر-سۇلتان قالاسى اكىمىنىڭ ورىنباسارى باحتيار ماكەن ەلوردانىڭ مەديتسينا قىزمەتكەرلەرى ءۇشىن قوناقۇيلەر مەن كولىك بەرىلگەنىن جەتكىزدى.
«اتاپ ايتقاندا, نۇر-سۇلتان قالاسىنىڭ ستاتسيونارلارىندا كورونوۆيرۋس ينفەكتسياسىن جۇقتىرعان نەمەسە جۇقتىرعان ادامدارمەن تىكەلەي بايلانىستا بولعاندارمەن جۇمىس ىستەيتىن مەديتسينا قىزمەتكەرلەرىنىڭ قاۋىپسىزدىگىن قامتاماسىز ەتىپ, ولارعا جاعداي جاساۋ ءۇشىن قوناقۇيلەر ءبولىندى. قالالىق شتاب ىستىق تاماقپەن قامتاماسىز ەتىپ, City Transportation Systems (CTS) كومپانياسى 50-دەن استام كولىك ءبولدى. قالانىڭ ەمحانالارى مەن اۋرۋحانالارىندا جۇمىس ىستەيتىن مەديتسينالىق قىزمەتكەرلەر ءۇشىن دە كولىك ۇيىمداستىرىلعان. بۇل قىزمەتتەردىڭ بارلىعى تەگىن. قر پرەزيدەنتى قاسىم-جومارت توقاەۆ سانيتارلىق-ەپيدەميولوگيالىق سالادا جوعارى جۇكتەمە جاعدايىندا جۇمىس ىستەيتىن مەديتسينا قىزمەتكەرلەرى ءۇشىن جاڭا قارجىلىق قولداۋ پاكەتى بەكىتىلەتىنىن حابارلادى. ەكىنشىدەن, №2 قالالىق ەمحانا تاۋلىك بويى جۇمىس جاسايدى. №2 قالالىق ەمحانا بازاسىندا جەدەل رەسپيراتورلى ۆيرۋستىق ينفەكتسياسى بەلگىلەرى بار پاتسيەنتتەردى قابىلداۋ ءۇشىن وبسەرۆاتسيالىق ەمحانا ۇيىمداستىرىلدى. ورۆي بەلگىلەرى بار ناۋقاستاردى تەك №2 قالالىق ەمحانا قابىلدايدى. ەمحانادا ەمدەلۋشىلەرگە كوروناۆيرۋستىق ينفەكتسياعا زەرتحانالىق-دياگنوستيكالىق زەرتتەۋلەر جۇرگىزىلەدى», دەدى ب.ماكەن.
سونىمەن قاتار ول مۇنداي قيىن كەزەڭدە تۇسىنىستىكپەن قابىلداپ, مەديتسينا قىزمەتكەرلەرىنىڭ نۇسقاۋلىقتارىن بۇلجىتپاي ورىنداۋ قاجەت ەكەنىن ەسكەرتتى.
«وزدەرىڭىز كورىپ وتىرعانداي, قالانى كارانتينگە جاۋىپ, قوعامدىق ءتارتىپتى ساقتاۋدى كۇشەيتۋ الەمدىك تاجىريبە. ىندەت وشاعى بولعان قىتاي حالقى قيىن ساتتە بىرلىك تانىتىپ كوروناۆيرۋس قاۋپىن بىرگە ەڭسەردى. اقش, ەۋروپا ەلدەرى دە ءتارتىپتى كۇشەيتىپ جاتىر. بىزدە دە كوروناۆيرۋس ينفەكتسياسىنىڭ تارالۋىن بولدىرماۋ ءۇشىن دەزينفەكتسيالاۋ بويىنشا اۋقىمدى جۇمىستار جۇرگىزىلىپ جاتىر. ادام كوپ جينالاتىن جەرلەرگە ەرەكشە كوڭىل بولىنەدى: الەۋمەتتىك نىساندار, بازارلار, سۋپەرماركەتتەر, تروتۋارلار, بالالارعا ارنالعان ويىن الاڭدارى, كىرەبەرىستەر مەن ت. ب. دەزينفەكتسيادان ءوتىپ جاتىر. دەزينفەكتسيالاۋ ءىس-شارالارىن وتكىزۋگە قالالىق قىزمەتتەردەن باسقا قارۋلى كۇشتەردىڭ بيولوگيالىق قورعاۋ بولىمشەسىنىڭ اسكەري قىزمەتشىلەرى دە جۇمىلدىرىلدى. تەگىن مەديتسينالىق كومەكتىڭ كەپىلدى كولەمى (تمككك) اياسىندا ديسپانسەرلىك ەسەپكە الىنعان ونكولوگيالىق اۋرۋعا شالدىققان ناۋقاستار, جۇكتى ايەلدەر, جاسى 65-تەن اسقان ازاماتتار ماسكامەن قامتىلۋدا. سونىمەن قاتار, نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسى مەديتسينالىق مەكەمەلەرگە تىركەلگەن تۇرعىنداردى ماسكامەن قامتاماسىز ەتۋ ماقساتىندا «سك-فارماتسيا» جشس-نەن 300 000 مەديتسينالىق ماسكا الدى. بۇگىنگى تاڭدا الىنعان مەديتسينالىق ماسكالاردىڭ 10% تۇرعىندار اراسىندا تاراتىلعان. ەگدە جاستاعى پاتسيەنتتەرگە ۆولونتەرلەر مەن مەديتسينالىق مەكەمەلەردىڭ قىزمەتكەرلەرى ماسكا مەن قاجەتتى ءدارى-دارمەكتەردى ۇيلەرىنە جەتكىزىپ بەرۋدە. ەلباسى, «Nur Otan» پارتياسىنىڭ توراعاسى نۇرسۇلتان نازارباەۆتىڭ تاپسىرماسىن قولداۋ ماقساتىندا قالالىق ەرىكتىلەر پارتيانىڭ ۆولونتەرلەرىمەن بىرلەسىپ, «Birgemiz» اكتسياسىنىڭ اياسىندا 3,6 مىڭنان استام وتباسىعا: جالعىز تۇراتىن زەينەتكەرلەرگە, مۇمكىندىگى شەكتەۋلى ازاماتتارعا, حالىقتىڭ الەۋمەتتىك جاعىنان وسال توپتارىنىڭ وكىلدەرىنە اتاۋلى كومەكتى كورسەتتى. كارانتين كەزىندە مۇنداي كومەك 5 مىڭنان استام وتباسىعا كورسەتىلەدى دەپ جوسپارلانۋدا. ەلوردالىق ەرىكتىلەر قالاداعى 7 بلوكپوستتىڭ قىزمەتكەرلەرىنە 3,5 مىڭ رەسپيراتورلىق بەتپەردەنى تاراتتى. سونىمەن قاتار قالالىق ۆولونتەرلەر شتابىنىڭ مۇشەلەرى پوليتسيا قىزمەتكەرلەرىمەن بىرلەسىپ, حالىق اراسىندا, شاعىن جانە ورتا بيزنەس وكىلدەرىنە كارانتين رەجيمىنىڭ بۇزىلۋىنا جول بەرمەۋگە باعىتتالعان ءتۇسىندىرۋ جۇمىستارىن جۇرگىزىپ جاتىر. بۇدان بولەك, 25 ناۋرىزدان باستاپ ەلوردا ۆولونتەرلەرى مەديتسينالىق قىزمەتكەرلەرىمەن بىرلەسىپ, ديسپانسەرلىك ەسەپتە تۇرعان ەگدە جاستاعى ازاماتتارعا ءدارى-دارمەكتەردى ۇيلەرىنە جەتكىزۋدە. كارانتين كەزەڭىندە «قازپوشتانىڭ» قىزمەتكەرلەرى ەرىكتىلەرمەن بىرلەسىپ, زەينەتاقىنى اقشالاي الاتىن ازاماتتارعا ونى ۇيلەرىنە جەتكىزىپ جاتىر. مەملەكەت دەگەنىمىز ءسىز بەن ءبىز. ءبىز ءبىر ءبىرىمىزدى قيىن-قىستاۋ كەزەڭدە ەشقاشان ۇمىت قالدىرمايمىز. الەۋمەتتىك از قامتىلعان وتباسىلار مەن مۇقتاج ازاماتتارعا ازىق-ت ۇلىك, ءدارى-دارمەك ۋاقىتىلى جەتكىزىلىپ جاتىر. بۇل – اۋىرتپالىق كەزەڭى. ءبىر ءبىرىمىزدى سىنايتىن ەمەس, بىرلىگىمىز سىنالاتىن كەز. سوندىقتان, ءتارتىپ ساقتاپ, كۇندىز ءتۇنى ۇيقى كورمەي اۋىرعان ازاماتتاردى ەمدەپ جۇرگەن مەديتسينا قىزمەتكەرلەرىنە ۇيدە وتىرىپ كومەكتەسەيىك», دەدى نۇر-سۇلتان قالاسى اكىمىنىڭ ورىنباسارى.