نۇر-سۇلتان قالاسىندا 6 ساۋىرگە دەيىن جەكە تۇلعالاردىڭ مەنشىكتى كولىگىمەن ءجۇرىپ-تۇرۋىنا شەكتەۋ قويىلدى, دەپ حابارلادى ەلوردا اكىمدىگىنىڭ ءباسپاسوز قىزمەتى.
كوروناۆيرۋس ينفەكتسياسىنىڭ تارالۋىن الدىن الۋ جونىندەگى قالالىق جەدەل شتاب نۇر-سۇلتان قالاسى بويىنشا كارانتين اۋماعىندا قوعامدىق كولىك قوزعالىسىن, جەكە تۇلعالاردىڭ مەنشىكتى كولىگىمەن ءجۇرىپ-تۇرۋىن شەكتەۋ تۋرالى شەشىم قابىلدادى. بۇل رەتتە, قوسىمشاعا سايكەس ۇيىمدار ءۇشىن جۇمىس ورنىنان انىقتاماسى بولعان جاعدايدا (نەمەسە قىزمەتتىك كۋالىگى بولسا) تۇرعىلىقتى جەرىنەن جۇمىسقا دەيىن جانە كەرى قاتىناۋعا, تۇرعىلىقتى جەرىنە نەمەسە جۇمىسىنا جاقىن ماڭداعى ءدارىحانالار مەن دۇكەننەن ازىق-ت ۇلىك, ءدارى-دارمەك پەن مەديتسينالىق بۇيىمدار الۋعا, سونداي-اق شۇعىل جاعدايدا مەديتسينالىق مەكەمەگە بارۋعا رۇقسات ەتىلەدى.
بۇدان بولەك, كارانتين ايماعى شەگاراسىندا مەديتسينالىق كومەكتىڭ جەدەل قىزمەتىنىڭ, سانيتارلىق-ەپيدەميولوگيالىق قىزمەتتىڭ, سونىمەن قاتار مەديتسينا ماماندارىنىڭ, ازاماتتىق قورعاۋ, ورتكە قارسى جانە اپاتتىق قۇتقارۋ جۇمىستارى, كوممۋنالدىق, اۆاريالىق قىزمەتتەردىڭ جۇمىسشىلارىنا, مامانداندىرىلعان ينكاسساتور كولىگىنە, كۇزەت ۇيىمدارى مەن كاسىپورىنداردىڭ جەكە كۇزەت قىزمەتىنە, قۇقىق قورعاۋ ورگاندارىنىڭ قىزمەتكەرلەرى مەن كولىگىنە, ارنايى مەملەكەتتىك ورگانداردىڭ, پروكۋراتۋرا, قورعانىس مينيسترلىگى, ۇلتتىق ۇلان, ءىىم قىلمىستىق-اتقارۋشى جۇيەسىنىڭ مامانداندىرىلعان جانە جەكە كولىكتەرىنىڭ قوزعالىسىنا (قىزمەتتىك كۋالىكتى كورسەتكەن جاعدايدا) توسقاۋىل قويىلمايدى.
سونىمەن بىرگە قۇرىلىس ماتەريالدارى, ازىق-ت ۇلىك پەن ازىق-ت ۇلىككە جاتپايتىن ونىمدەردى, مەديتسينالىق تاۋارلاردى تاسىمالداۋدى جۇزەگە اسىراتىن 1 قوسىمشادا كورسەتىلگەن ۇيىمداردىڭ جۇك كولىكتەرىنىڭ قوزعالىسىنا (قىزمەتتىك كۋالىگىن نەمەسە جۇمىس ورنىنان انىقتاما كورسەتكەن جاعدايدا) شەكتەۋ قويىلمايدى.