ناۋرىزدىڭ 26 كۇنى 1414 call-ورتالىعى ادەتتەگىدەن 30 ەسە كوپ قوڭىراۋ قابىلدادى. اتاپ ايتقاندا, 1414 بىرىڭعاي بايلانىس ورتالىعىنا 598 423 رەت قوڭىراۋ سوعىلعان.
بايلانىس ورتالىعى جۇكتەمەسىنىڭ ارتۋىنا بايلانىستى ازاماتتارعا كەڭەس بەرۋ جۇمىسىنا حقكو-نىڭ 1800-دەن استام قىزمەتكەرى قوسىلدى, سونداي-اق بايلانىس ارنالارىنىڭ وتكىزۋ قابىلەتىن جانە بارلىق قوڭىراۋلارعا قىزمەت كورسەتۋ ءۇشىن تەلەفونيا قۋاتىن ارتتىرۋ بويىنشا شارالار قابىلداندى. ەندى ءبىر مەزگىلدە مىڭنان استام قوڭىراۋدى قابىلداۋعا مۇمكىندىك بار.
«ۇلتتىق اقپاراتتىق تەحنولوگيالار» اق توراعاسىنىڭ ورىنباسارى دياس قادىروۆتىڭ ايتۋىنشا, «ازاماتتار 1414 ورتالىعىنا ساعات 9.00-دەن 12.00-گە دەيىن جانە ساعات 15.00-دەن 17.00-گە دەيىن وتە كوپ حابارلاسقان. ال, ساعات 12.00-دەن 15.00-گە دەيىن بايلانىس ورتالىعىنا حابارلاسۋشىلار سانى ازايعان. وسى ۋاقىتتا ءوتىنىش بىلدىرگەن ازاماتتاردىڭ قاجەتتى كەڭەستى تەز الۋىنا مۇمكىندىگى مول».
قازاقستاندىقتار 1414 ورتالىعىنا ونلاين قىزمەت الۋ ماسەلەلەرى بويىنشا كۇن سايىن دەمالىسسىز, ساعات 9.00-دەن 21.00-گە دەيىن حابارلاسا الادى. بايلانىس ورتالىعى قىزمەتكەرلەرىنىڭ ەتسق الۋعا ءوتىنىش بىلدىرگەن ازاماتتاردى جەكە كۋالىگىندەگى سۋرەتىنە قاراپ, بەينەبايلانىس ارقىلى سايكەستەندىرۋمەن اينالىساتىنىن دا اتاپ وتكەن ورىندى. ەگەر دە حابارلاسقان ادامنىڭ تەلەفون ءنومىرى موبيلدىك ازاماتتار بازاسىندا تىركەلمەگەن جاعدايدا عانا بەينەبايلانىس ارقىلى سايكەستەندىرۋ تالاپ ەتىلەدى.
بۇگىندە مەملەكەتتىك قىزمەتتەردىڭ 80%-ىن ونلاين الۋعا بولادى. ولاردى ازاماتتار egov.kz ەلەكتروندىق ۇكىمەت سايتى, eGov mobile قوسىمشاسى, egovkzbot2.0 تەلەگرام ارناسى جانە Facebook, ۆكونتاكتە الەۋمەتتىك جەلىلەرى ارقىلى الا الادى.