فۋتزالدان قازاقستان ۇلتتىق قۇراماسى مەن الماتىنىڭ «قايرات» كلۋبىنىڭ قاقپاشىسى يگيتا ءتورتىنشى رەت جىلدىڭ ۇزدىك قاقپاشىسىنا بەرىلەتىن Futsal Planet Awards-2019 سىيلىعىن جەڭىپ الدى.
الەمنىڭ ءتۇرلى ەلدەرىنەن 244 رەسپوندەنت قاتىسقان داۋىس بەرۋ ناتيجەسىندە 693 ۇپاي جيناعان قازاقستاندىق قاقپاشى ۇزدىك دەپ تانىلدى. ەكىنشى ورىندى 673 ۇپاي جيناعان يسپانيالىق حۋانحو يەلەنسە, ۇزدىك ۇشتىكتى برازيليالىق قاقپاشى گۋيتتا 655 ۇپايمەن تۇيىندەدى. ايتا كەتەيىك, يگيتا بۇعان دەيىن بۇل سىيلىقتى 2015, 2016 جانە 2018 جىلدارى دا يەلەنگەن بولاتىن.
ال ۇزدىك باس جاتتىقتىرۋشى اتالىمىندا قازاقستان ۇلتتىق قۇراماسى مەن الماتىنىڭ «قايرات» كلۋبىنىڭ باس باپكەرى كاكا ۇزدىك ۇشتىكتىڭ قاتارىنان كورىندى. «بارسەلونا» (يسپانيا) باس جاتتىقتىرۋشىسى اندرەۋ پلازا الۆارەس 689 ۇپايمەن باس جۇلدەنى جەڭىپ السا, نۋنو سەرجيو دوس سانتوس دياس («سپورتينگ», پورتۋگاليا) 602 داۋىس جيناپ, ەكىنشى ورىن يەلەندى. كاكانىڭ ەنشىسىندە 492 ۇپاي بار.