بۇل تۋرالى ءبىلىم جانە عىلىم ۆيتسە-ءمينيسترى شولپان كارينوۆا حابارلادى. ءمينيستردىڭ ورىنباسارى كوروناۆيرۋستىڭ تارالۋىنا قارسى كۇرەس شارالارىن كۇشەيتۋ ماقساتىندا 6 ساۋىردەن باستاپ مەكتەپتەر ءتورتىنشى توقساندى قاشىقتان وقىتۋ فورماتىندا باستايتىنىن جەتكىزدى.
وقۋشىلار كوكتەمگى دەمالىستا جۇرگەندە, مۇعالىمدەردىڭ جۇمىستىڭ جاڭا فورماتىنا دايىندىقتى باستاپ كەتكەنىن جازعان ش.كارينوۆا:
– قاشىقتىق تارتىپتە جۇمىس ىستەۋدە مۇعالىمدەردىڭ جۇيەلىك تاجىريبەسى جوق ەكەنىن ەسكەرەتىن بولساق, ارينە, بۇل - وڭاي شارۋا ەمەس جانە مۇنداي جۇمىس بۇرىن تالاپ ەتىلمەگەن. دەسەك تە, ساباق بارىسىندا مۇعالىمدەر تسيفرلىق ءبىلىم بەرۋ رەسۋرستارىمەن, ەلەكتروندى وقۋلىقتارمەن, ەلەكتروندى جۋرنال جۇيەلەرىمەن بۇعان دەيىن دە جۇمىس ىستەيتىن. بۇنىڭ ءوزى تسيفلىق جۇيەدە جۇمىس ىستەۋدىڭ قانداي دا ءبىر تاجىريبەسى ەكەنى انىق, – دەدى.
ونىڭ ايتۋىنا قاراعاندا, قازىرگى تاڭدا مەكتەپ اكىمشىلىگى, ادىستەمەلىك بىرلەستىك جەتەكشىلەرى, ۇستازدار قاشىقتان وقىتۋعا اۋىسۋ باعىتىندا بەلسەندى جۇمىس اتقارۋدا. ەڭ ماڭىزدىسى – وسى ماسەلەنى دۇرىس ءتۇسىنۋ. قاشىقتىق ساباق – ادەتتەگىدەي قىرىق مينۋت كولەمىندەگى ساباق ەمەس. قاشىقتان بەرىلەتىن ساباقتىڭ ءادىس-تاسىلدەرى, قاعيدالارى دا باسقا.وسىنداي سىن ساتتە ۇستازداردى كۇشتەپ جۇمىسقا تارتىپ, ونلاين-ساباقتار جازۋعا ماجبۇرلەپ وتىر دەگەن ورىنسىز سۇراقتار دا تۋىنداماۋى ءتيىس. قازىرگى جاعدايدا بۇل مۇعالىمنىڭ وزىنە كەرەك نارسە, بۇل مۇعالىم جۇمىسىنىڭ جاڭا شارتى. ەڭ باستىسى, وقۋشىلار مۇعالىمنەن قىزىقتى, تارتىمدى ساباق كۇتەدى.
– قۇرمەتتى اتا-انالار, بىرىنشىدەن, بۇل ماسەلەگە سىزدەر تۇسىنىكپەن قاراۋلارىڭىزدى, بالاعا جاڭا فورماتتا وقۋ ماتەريالىن يگەرۋگە كومەك بەرىپ, مۇعالىم مەن وقۋشى اراسىنداعى بايلانىستىڭ ورناۋىنا ىقپال ەتىپ, قاجەتتى ناتيجەگە جەتۋ ءۇشىن ءوز كومەگىڭىزدى بەرۋدى سۇرايمىز. تەك وسىلاي, بىرلەسە جۇمىس ىستەۋ ارقىلى ءبىز وقۋ ءۇردىسىن دۇرىس ۇيىمداستىرىپ, بالالارعا قاجەتتى ءبىلىم مەن قۇزىرەتىن بەرە الامىز.كەيبىر مەكتەپتەردە ساپالى ينتەرنەت ماسەلەسى, مۇعالىمدەر مەن وقۋشىلاردا كومپيۋتەردىڭ بولماۋى, وتباسىندا بىرنەشە بالا بولعان جاعدايدا كومپيۋتەردى پايدالانۋ سۇراقتارى, دايىن ينتەرنەت-پلاتفورمالاردىڭ جوقتىعى تۇسىنىكتى. بۇل سۇراقتار, ارينە, بار, ولار جەكە تۇرعىدا قاراستىرىلادى, ولاردى شەشۋ جولدارى انىقتالىپ قالدى, – دەدى.
ۆيتسە-مينيستر ءوزىنىڭ فەيسبۋكتەگى رەسمي پاراقشاسىندا بىلىم جانە عىلىم مينيسترلىگىندە, ايماقتىق ءبىلىم بەرۋ باسقارمالارىندا قاشىقتان وقىتۋ جۇيەسىن ۇيىمداستىرۋ بويىنشا جوبالاۋ ءوفيسى قۇرىلىپ وتىرعانىن; پاندەميا كەزەڭىندە وقۋ ءۇردىسىن ۇيىمداستىرۋ بويىنشا ۋاقىتشا شارالار ەنگىزگەن كورشىلەس ەلدەردىڭ تاجىريبەسى, حالىقارالىق تاجىريبە زەردەلەنگەنىن; مەكتەپتەر مەن ۇستازدار ءۇشىن ءتيىستى ۇسىنىمدار دايىندالعانىن; ۇستازدار ءۇشىن ارنايى ونلاين, تەلە-كۋرستار, ۆەبينارلار ازىرلەنگەنىن اتاپ ءوتتى.
ءسوزىنىڭ سوڭىندا:
– سونىمەن قوسا, ۇستازدار مەن بالالارعا "بالاپان" جانە "ەل-ارنا" تەلەارنالارىندا ءتورتىنشى توقسان باستالسىمەن كۇندە 1-11-سىنىپ وقۋشىلارىنا اپتاسىنا بەس كۇن ساباق وتكىزىلەدى. قازىر وسى تەلە-ساباقتاردىڭ ارنايى ءتۇسىرىلىمى جۇرگىزىلۋدە. ول ساباقتار مەملەكەتتىك ستاندارت تالاپتارىنا, وقۋ باعدارلامالارىنا سايكەس قۇرىلعان. وقۋشىلار ءۇشىن 2 مىڭنان استام تەلە ساباق دايىندالادى. بۇعان ۇلكەن كۇش جۇمسالۋدا. نۇر-سۇلتان قالاسىنىڭ, نازارباەۆ زياتكەلىك مەكتەپتەرىنىڭ, رەسپۋبليكالىق, حالىقارالىق جانە جەكە مەكتەپتەردىڭ ۇزدىك ۇستازدارى ەلىمىزدىڭ بارلىق بالالارىنا ساباق بەرەدى. ۇستازدارعا تەك قولداۋ قاجەت, – دەدى ش.كارينوۆا