بالامالى قۋات كوزىن يگەرۋدىڭ سونى شەشىمىنە قول جەتكىزۋ ءۇشىن عالىمدارىمىز تىنىمسىز ەڭبەكتەنۋدە. سونىڭ ىشىندە عارىشتان ەنەرگيا كوزىن ءوندىرۋدىڭ العى شارتىنا قازىردەن باستاپ كىرىسىپ كەتتى. بۇل تۋرالى «ايقىن» گازەتى جازدى.
جاڭا جوبانىڭ ەرەكشەلىكتەرى جونىندە «پاراسات» ۇلتتىق عىلىمي-تەحنولوگيالىق حولدينگىنىڭ باسقارما توراعاسى, تەحنيكا عىلىمدارىنىڭ دوكتورى, پروفەسسور ابدىكەرىم زەينۋللين ايتىپ بەردى: «ەكسپو – 2017» كورمەسىنىڭ «بولاشاق ەنەرگياسى» دەگەن اتاۋىنىڭ وزىندە عىلىم مەن يننوۆاتيكا جاتىر. سوندىقتان ەكسپو-نى وتكىزۋ شەڭبەرىندە ارنايى عىلىمي تەحنيكالىق باعدارلاما ازىرلەدىك. ءبىزدىڭ ول ۇسىنىسىمىز ۇلتتىق جوسپارعا كىردى. قازىرگى تاڭدا ول باعدارلاما ءتيىستى تالاپقا سايكەس عىلىمي-تەحنيكالىق ساراپتامادان ءوتىپ, ۇكىمەت جانىنداعى جوعارى تەحنيكالىق كوميسسيانىڭ ساراپتاماسىنا ۇسىنىلعان. بۇل باعدارلاماعا جيىرما شاقتى جوبا ەندى. وسى باعدارلامانى جاسار الدىندا زەرتتەۋ جۇرگىزدىك. دۇنيەجۇزى ەلدەرىنىڭ بالامالى ەنەرگيا سالاسىنداعى جاڭالىقتارىن زەرتتەدىك. كورمەلەرگە دە قاتىسىپ ءجۇرمىز. سوندا بايقاعانىمىز, بۇل سالادا ايتىلاتىن جاڭالىقتار بالەندەي كوپ ەمەس. ءبارى دە سۋ, جەل, كۇن ەنەرگياسى سياقتى ءداستۇرلى ەنەرگيا كوزدەرىنەن اسا المايدى. ال ءبىز ءوز باعدارلامامىزعا كوسموس ەنەرگەتيكاسىن قوسىپ وتىرمىز. قازاقشا ايتقاندا, عارىش ەنەرگياسى. ول كۇننەن الىناتىن ەنەرگيا. الايدا, بۇگىنگى ءبىز الىپ وتىرعان كۇن ەنەرگياسى وزون قاباتىنان وتكەندە, ءوزىنىڭ نەگىزى قۋاتىنان 100 ەسە ازايىپ كەتەدى. سوندىقتان وزون قاباتىنىڭ جوعارى تۇسىنا كوسموستىق اپپاراتتار قويىلادى. ال جەردە جوعارى جيىلىكتى ساۋلەلەردى قابىلدايتىن قابىلداعىش انتەننا ورناتىلادى دا, ول جوعارى جيىلىكتى ساۋلە شىعارۋدى اينىمالى توكقا تۇرلەندىرەدى دە, ونى تۇتىنۋشىعا جىبەرەدى».
ءبىر ەسكەرە كەتەتىن جايت, كورمەگە دەيىن عارىشتىق اپپاراتتى جاساپ ۇلگەرمەۋىمىز مۇمكىن. سوندىقتان جەردەگى تولقىندى قابىلداپ الاتىن اپپاراتتاردىڭ مودەلىن جاساپ, ۇسىنۋدىڭ عانا مۇمكىندىگى تۋىپ تۇر. وسى ارقىلى عارىش ەنەرگياسىنىڭ تيىمدىلىگى ەكسپو قاتىسۋشىلارى مەن كەلۋشىلەرىنە تانىستىرىلادى.
«ءبىزدىڭ ەكىنشى ءبىر جوبامىز – سۋتەكتى ەنەرگيا. وسىنىڭ ارقاسىندا بولاشاقتا ءاربىر ۇيگە ەلەكتر جەلىسىن تارتىپ, ەلەكتر قۋاتىن كىرگىزۋ قاجەت بولماي قالادى. ويتكەنى ءار ۇيدە قۋاتى كۇشتى اككۋمۋلياتور باتارەيالارى بولادى. ول اككۋمۋلياتورلار ەلەكتر قۋاتىن تەز ءارى مولىنان جيناپ الادى. بۇل جوبانى ءبىز حيۋستون ۋنيۆەرسيتەتىمەن بىرگە جاساپ, كورمەگە ۇسىنۋدى جوسپارلاپ وتىرمىز» دەيدى ءا.زەينۋللين ءسوز ورايىندا.
دانيار تۇيمەباي.