حالىقارالىق اۋىر اتلەتيكا فەدەراتسياسى كوروناۆيرۋس پاندەمياسىنا بايلانىستى التى ءىرى جارىستىڭ وتپەي قالعانىنا بايلانىستى وليمپيا ويىندارىنىڭ ىرىكتەۋ كەزەڭىنە وزگەرىستەر ەنگىزدى دەپ حابارلادى ۇوك ءباسپاسوز قىزمەتى.
ەندى 30 ساۋىردەن كەيىن وتەتىن دودالاردىڭ ۋاقىتى اۋىستىرىلمايدى. IWF اتقارۋشى كەڭەسى لوزاننادا اۋىر اتلەتيكا فەدەراتسيا پرەزيدەنتى قىزمەتىن اتقارۋشى ۋرۋسلى پاپاندرەانىڭ جەتەكشىلىگىمەن وتكەن ەكىكۇندىك وتىرىستا وسىنداي شەشىم قابىلداندى.
ىرىكتەۋ كەزەڭدەرىنە ەنگىزىلگەن وزگەرىس حالىقارالىق وليمپيادا كوميتەتىنە ماقۇلداۋعا جىبەرىلدى. ماقۇلدانعان جاعدايدا ىرىكتەۋ كەزەڭى تۋرالى تولىعىراق حابارلاناتىن بولادى.
2018 جىلدىڭ 1 قاراشاسىندا جاڭا ىرىكتەۋ كەزەڭى باستالعاندا سپورتشىلار ەڭ كەم دەگەندە التى ايلىق كەزەڭدە التى جارىسقا قاتىسۋى ءتيىس بولاتىن. اتاپ ايتقاندا, 2018 جىلدىڭ قاراشاسىنان 2019 جىلدىڭ ساۋىرىنە دەيىن, 2019 جىلدىڭ ساۋىرىنەن قازانىنا دەيىن, 2019 جىلدىڭ قاراشاسىنان 2020 جىلدىڭ ساۋىرىنە دەيىنگى كەزەڭدەرگە بولىنگەن-ءدى.
سونداي-اق سپورتشىلار الەم چەمپيوناتى مەن قۇرلىقتىق بىرىنشىلىكتەرگە دە قاتىسۋ كەرەك بولاتىن. بىراق كوروناۆيرۋس ىندەتىنە بايلانىستى ناۋرىز-ءساۋىر ايلارىندا بەس قۇرلىقتىق بىرىنشىلىك پەن جاستار اراسىنداعى الەم چەمپيوناتى وتپەي قالدى.