«جۇت جەتى اعايىندى» دەيدى دانا حالقىمىز. سول ايتقانداي كورونوۆيرۋستىڭ دۇرمەگىن پايدالانىپ, ءارتۇرلى ماقساتتاعى قانىپەزەرلەر دە باس كوتەرۋى مۇمكىن. سوندىقتان وندايلارعا دا دايىن بولۋ كەرەك. سونىڭ ءبىرى – نىسانداردى تەرروريستىك شابۋىلداردان قورعاۋدىڭ امالدارى.
جۋىردا وبلىستىڭ پوليتسەيلەرى تەرروريزمنىڭ نىسانى بولاتىن كوپشىلىك ورىندارىن, سونىڭ ىشىندە ساۋدا مەن وقۋ ورىندارىنىڭ ساقتىعىن تەكسەرگەن ەدى. جىل باسىنان بەرگى بۇل 70-ءشى تەكسەرىس. سوڭعىدا سونىڭ تورتەۋىندە سالدىر-سالاقتىق تابىلىپ, باسشىلارىنا جاۋاپكەرشىلىك جۇكتەلدى. ماسەلەن, ءبىر وقۋ ورنى بەينەباقىلاۋمەن تولىق قامتىلماعان. ال بەينەجازۋلاردى ساقتاۋ مەرزىمى ەرەجەگە قايشى ەكى ەسە قىسقارتىلعان. قىزمەتكەرلەر دە تەرروريستىك شابۋىل جاسالعان كەزدە نە ىستەۋ كەرەكتىگىنەن حابارسىز. «مۇندايدى ءاربىر قىزمەتكەر جاتقا بىلۋگە ءتيىستى. ەگەر جارىلىس زاتى قويىلدى دەگەن حابار تۇسسە قابىلداعان ادام ونى اياعىنا دەيىن تىڭداۋى جانە سوزدەرى مەن داۋىسى كوبىرەك جازىلىپ قالۋ ءۇشىن انىقتاما سۇراقتار بەرۋلەرى كەرەك», - دەيدى ەكسترەميزمگە قارسى كۇرەس باسقارماسىنىڭ باستىعى سپارتاك قابدەنوۆ. تەرروريزمگە قارسى كۇرەس ەرەجەسىنىڭ تالاپتارىن ورىنداماعان مەكەمەلەردىڭ باسشىلارىنا 100 اەك كولەمىندە ايىپپۇل سالىنۋى مۇمكىن. پەتروپاۆل قالاسىندا تەرروريستىك شابۋىلعا ۇشىراۋى مۇمكىن دەپ سانالاتىن بارلىعى 600-دەي نىسان بار. وسىلاردىڭ ءبارىنىڭ دە ساقتىعى تەكسەرىلىپ وتىرادى.
پەتروپاۆل